ក្រោយពីក្រសួង អប់រំ យុវជន និងកីឡា បើកការស្រាវជ្រាវ បានរកឃើញថា អ្នកគ្រូម្នាក់បង្រៀននៅ សាលាបឋមសិក្សាសន្ធរម៉ុក ពិតជាបាន យកលុយពីសិស្សមួយ ខែ ៦ម៉ឺនរៀល ដូចអ្វីដែលអាណាព្យា បាលសិស្សបង្ហោះ នៅលើបណ្តាញសង្គមមែន។
ជាវិធានការវិន័យអ្នកគ្រូរូបនេះ ត្រូវបានផ្លាស់ ចេញពីសាលាបឋមសិក្សាសន្ធរម៉ុក ឱ្យទៅបង្រៀននៅ សាលាបឋមសិក្សាសែនសុខ ក្នុងខណ្ឌសែនសុខវិញ។ តែអ្នកគ្រូនោះ នៅតែបន្តប្រព្រឹត្តខុសឆ្គង បែបនេះទៀត អាចនឹង ប្រឈមចំពោះការ លុប ឈ្មោះចេញពីក្របខណ្ឌក្រសួង អប់រំ យុវជន និងកីឡា។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ បណ្តាញសារព័ត៌មានថា ក្រោមកិច្ចសហការរវាងសាលា និងមន្ទីរអប់រំ យុវជន និងកីឡារាជធានីភ្នំពេញ បានរកឃើញនូវការ ប្រព្រឹត្តកំហុសឆ្គង របស់អ្នកគ្រូរូបនេះដូចនឹង អ្វីដែលអាណាព្យាបាលសិស្សបានលើកឡើងប្រាកដមែន។
ក្រោមកិច្ចសហការរវាងមន្ទីរអប់រំ យុវជន និងកីឡារាជ ធានីភ្នំពេញ និងគណៈគ្រប់គ្រងសាលាបឋមសិក្សាសន្ធរម៉ុកដោះស្រាយ បញ្ហាមិនប្រក្រតីខាងលើនេះ គ្រូបង្រៀនកម្រិតបឋមបម្រើការងារ នៅសាលាបឋម សិក្សាសន្ធរម៉ុក ខណ្ឌទួលគោក ត្រូវបាន ផ្លាស់ឱ្យទៅបម្រើការងារ នៅសាលាបឋមសិក្សា សែនសុខ ខណ្ឌសែនសុខ ។
អ្នកនាំពាក្យរូបនេះ បន្តថា ជាទូទៅនៅពេល មានគ្រូបង្រៀនរូបណាប្រព្រឹត្តខុសពីគោលការណ៍របស់ក្រសួងណែនាំនោះ នឹងត្រូវរងពិន័យ ផ្នែករដ្ឋបាលដូចជា អាចជាការស្តីបន្ទោសលាយលក្ខណ៍អក្សរ អាចជា ការចុះកិច្ចសន្យាក្រោយ ការប្រព្រឹត្តមិនប្រក្រតី ឬមួយក៏ការផ្លាស់ប្តូរកន្លែងធ្វើ ឬអាចឈាន ទៅដល់លុប ឈ្មោះ ចេញពីក្របខណ្ឌមន្ត្រីរាជការក្រោមឱវាទរបស់ក្រសួង អប់រំ យុវជន និងកីឡា។
លោក រស់ សុវាចា បញ្ជាក់ថា ការផ្លាស់ប្តូរសាលាបង្រៀន ជាវិធានការវិន័យធ្ង.ន់.ធ្ងរមួយកម្រិតទៀត សម្រាប់អ្នកគ្រូ បង្រៀនរូបនេះ។ បើគាត់នៅតែ បន្តប្រព្រឹត្តខុសឆ្គង បែបនេះទៀត អាចនឹងប្រឈម ចំពោះការលុប ឈ្មោះ ចេញពីក្រប ខណ្ឌក្រសួងអប់រំ យុវជន និងកីឡា។
សូមបញ្ជាក់ថា កាលពីថ្ងៃទី២៨ ខែមករា ឆ្នាំ២០២១ មានគណនីហ្វេសប៊ុកឈ្មោះ Bunthoeun Ev បានបង្ហោះ សារថា «កូនស្រីខ្ញុំត្រូវបានអ្នក គ្រូសាលាសន្ធរម៉ុក បណ្តេញចេញពីថ្នាក់ តាមសម្តីអ្នកគ្រូបាន និយាយថា បើមិនរៀនគួរទេ ទៅរកគ្រូរ កសាលាណារៀនផ្សេងទៅ នៅសាលាសន្ធម៉ុក បើមិនរៀនគួរក៏ត្រូវបង់លុយដឹងគុណគ្រូមួយខែ ៦០០០០៛
ដែរ sic តើខ្ញុំរស់បានដល់ពេលណា បើខ្ញុំខំរកលុយអោយកូន រៀនគួរមិនបានផង»។ស្រដៀងគ្នានេះដែរ គណនីហ្វេសប៊ុក ឈ្មោះ Srey Neth SreyNeth ក៏បានបង្ហោះសំណេរបញ្ជាក់បន្ថែមថា «សុំទោស ទុកជាមុន បើនាងខ្ញុំpostទៅមានការ ប៉ះពាល់ ដោយសារករណីនេះ ស្រដៀងគ្នាជា មួយកូនខ្ញុំដែរ។
កូនប្រុសពៅខ្ញុំរៀនថ្នាក់ទី៦ នៅសាលាសន្ធរម៉ុក ដែរ គ្រូទារលុយ៦ម៉ឺនរៀល តាំងពីថ្ងៃចូលរៀនទី១ ខ្ញុំសួរថាថ្លៃអីគេអ្នកគ្រូ គាត់ថា វាជាការដឹងគុណរបស់ ឪពុកម្តាយ ចំពោះគ្រូ ដែលគាត់មើលនឹងបង្រៀនកូនយើង អុញ…ខ្ញុំគាំងម៉ង ព្រោះខ្ញុំអត់ចង់ និយាយច្រើនជាមួយគាត់ នៅមានច្រើនទៀត ដែលគាត់និយាយម កកាន់ខ្ញុំ អស់អារម្មណ៍គោរពអាលីង បន្ទាប់មកទៀត ទារលុយម្នាក់២ម៉ឺនរៀល ទិញកង្ហារ
ហើយថ្នាក់គាត់ សិស្សសរុបជាង៣០នាក់។ ខ្ញុំសុំសួរដូចឆោត អារឿងលុយទិញកង្ហារហ្នឹង គឺទិញរាល់ឆ្នាំ ឲ្យតែពេលចូលរៀនគឺប្រមូលហើយ អត់យល់! នៅមានទៀត មិនទាន់អស់ទេ យកពីសិស្ស១ថ្ងៃ៥០០រៀលផ្សេងទៀត និងរៃលុយ ពីសិស្សម្នាក់ ៥០០រៀលរាល់ មួយអាទិត្យម្តង ថ្លៃទិញទឹកជូនអ្នក គ្រូពិសារ ចា៎……នេះចូលរៀនអត់ទាន់ ដល់មួយខែទេ ចាំមើលតើខែបន្ទាប់ៗនៅមានអីកើតឡើងទៀត…. ហើយសូមបញ្ជាក់ផងដែរ អា៦ម៉ឺនថ្លៃទឹកចិត្តហ្នឹង គឺជូនជារៀងរាល់ខែ ខកបានតែហាមខាន។
សុំបញ្ជាក់មួយទៀត: បើលុយរៀនគួរ ខ្ញុំមិនថាទេ ព្រោះនេះជារឿងធម្មតា ដែលគាត់បង្រៀនកូនយើងបន្ថែមក្រៅពីម៉ោងសិក្សា ជូនដោយក្តីគោរព។ លោកគ្រូអ្នកគ្រូ ប្រៀបដូចជាឪពុកម្តាយទីពីរ សូមរក្សា ភាពថ្លៃថ្នូរ ដើម្បីឲ្យសិស្សដឹងគុណទៅថ្ងៃក្រោយ»។ គ្រូបង្រៀនម្នាក់ នៅសាលាបឋមសិក្សាសន្ធរម៉ុក ដែលសុំមិនបញ្ចេញឈ្មោះ បានបញ្ជាក់ថា អ្នកគ្រូដែលយកលុយពីសិស្សក្នុងម្នាក់៦ម៉ឺនរៀលនោះ គឺជាគ្រូបង្រៀនសិស្សថ្នាក់ទី៦ នៃសាលាបឋមសិក្សាសន្ធរម៉ុក ៕
