​អ្នកប្រើប្រាស់​បណ្ដាញ​សង្គមបង្ហោះ​ឱ្យឃើញ​កំណាត់​ផ្លូវ​មួយ​ខ្សែ​ស្ថិតនៅ​តំបន់​អង្គរ មាន​ស្ថានភាព​បែក​ភក់ជ្រាំ​ខ្លាំង ត្រូវ​បាន​អ្នកនាំពាក្យ​អាជ្ញាធរ​ជាតិ​អប្សរា លោក ឡុង កុសល​ឆ្លើយតប​ថា ទីតាំង​នេះ​ មិនមែនជា​ផ្លូវ និង​បាន​ផ្អាក​ដំណើរការ​មួយរយៈ​ហើយ។

លោក ឡុង កុសល បានឱ្យដឹងថា ទីតាំង​នោះ​ដើមឡើយ​ជា​ចំណត​ឡាន​បណ្ដោះអាសន្ន។ អាជីវករ​មួយ​ចំនួន ​បាន​រើ​របា និង​ដុំ​ថ្ម​ហាមឃាត់ ដើម្បី​ធ្វើដំណើរ ខណៈ​មេឃ​ភ្លៀង​ខ្លាំង ទើប​បណ្ដាញ​ឱ្យ​មាន​ភក់ជ្រាំ​បែបនេះ​។ អាជ្ញាធរ​ជាតិ​អប្សរា​កំពុង​រៀបចំ​ដាំ​ស្មៅ និង​ដាំ​ដើមឈើ​នៅ​តំបន់​នោះ ប៉ុន្តែ​ទាមទារ​ឱ្យមាន​ការចូលរួម​ពី​ប្រជាពលរដ្ឋ ជាពិសេស​ក្រុមអាជីវករ​តែម្តង​។លោក​ថា គោលដៅ​ចម្បង​របស់​អាជ្ញាធរ​ជាតិ​អប្សរា គឺ​ប្រែក្លាយ​តំបន់​នោះ​ឱ្យ​ស្រស់បំព្រង មាន​ផ្លូវ​ថ្មើរជើង ប្រព័ន្ធ​បង្ហូរទឹក ដោយ​មិន​អនុញ្ញាតឱ្យ​ឡាន ឬ​ម៉ូតូ​ចូល​ដូច​បច្ចុប្បន្ន​ឡើយ​។

ម្សិលមិញ​នេះ ​អ្នកប្រើប្រាស់​បណ្ដាញ​សង្គម​ម្នាក់​ឈ្មោះ Sophal Sophal បាន​បង្ហោះ​រូបភាព​ជាច្រើន​សន្លឹក​​ ​បង្ហាញ​ពី​ស្ថានភាព​ផ្លូវ​លំបាក​ខ្លាំង​លើ​បណ្ដាញ​សង្គម​របស់ខ្លួន ដោយ​សរសេរ​ថា “​ផ្លូវ​ពិភព​ឋាន​ព្រះ​អង្គារ​នៅមុខ​អង្គរ​”​។ បន្ទាប់ពី​បង្ហោះ​អ្នកប្រើប្រាស់​បណ្ដាញ​សង្គម​ជាច្រើន​ បាន​បញ្ចេញ​មតិយោបល់​ផ្សេងៗ​គ្នា ដោយសារ​តំបន់​អង្គរ​គឺជា​តំបន់​ទេសចរ​ប្រវត្តិ​ដ៏​ធំ​មួយ​របស់​កម្ពុជា​។

កាលពី​ពេល​ថ្មីៗ​នេះ​ អាជ្ញាធរ​ជាតិ​អប្សរា​ បាន​ដាំ​ដើមឈើ​ពី​ប្រលាន​យន្តហោះ​ មក​ប្រាសាទអង្គរវត្ត​ក្នុង​គោលបំណង​លើកកម្ពស់​សោភ័ណភាព បង្កើន​ភាព​ស្រស់ស្អាត និង​ទេសភាព​បៃតង​តាម​ដងផ្លូវ​សំខាន់ៗ​ក្នុង​ក្រុង​សៀមរាប​មកកាន់​រមណីយដ្ឋាន​អង្គរ ហើយ​កូនឈើ​ដែល នឹង​ត្រូវ​ដាំ​លម្អ​តាម​ដងផ្លូវ​នេះ​ មាន​ចំនួន​ជាង ១០០០​ដើម ជា​កូនឈើ​ធ្នង់​ដែល​ជា​ប្រភេទ​ឈើប្រណិត​ដែល​ប្រជាជន​ខ្មែរ​ទូទៅ​និយម​ចូលចិត្ត៕

By admin

Leave a Reply

Your email address will not be published. Required fields are marked *

You missed