អ្នកចម្រៀងសម័យ ប្រចាំផលិតកម្មរស្មីហង្សមាស លោកស្រី ឱក សុគន្ធកញ្ញា ដែលបានរៀបការជាមួយកូនប្រុសថៅកែផលិតកម្មរស្មីហង្សមាស លោក អ៊ឹង សុខលី កាលពីម៉ោង ១ រសៀល ថ្ងៃទី១១ ខែវិច្ឆិកា ឆ្នាំ២០១៩ បានកើតកូនប្រុស នៅមន្ទីរពេទ្យថៃ Bumrungrad International នៅទីក្រុងបាងកក ប្រទេសថៃ។ កូនប្រុសរបស់លោកស្រី ឱក សុគន្ធកញ្ញា និងលោក អ៊ឹង សុខលី មានឈ្មោះថា ឆលី។
ក្រោយមហាជនមានការងឿងឆ្ងល់ថា ហេតុអ្វីអ្នកនាងឱក សុគន្ធកញ្ញា សម្រាលកូនហើយ មិនបង្ហាញមុខកូនជាសាធារណៈ ស្រាប់តែវេលាម៉ោង៨និង១៦នាទីយប់ ថ្ងៃទី១៣ ខែវិច្ឆិកា ឆ្នាំ២០១៩ អ្នកនាងបានបង្ហាញមុខកូនជាលើកដំបូងក្នុងផេកផ្លូវការរបស់អ្នកនាង ហើយព្រមទាំងបញ្ជាក់យ៉ាងច្បាស់ពីថ្ងៃខែឆ្នាំ និងពេលវេលាដែលអ្នកនាងសម្រាល ដើម្បីកុំឲ្យអ្នកគាំទ្រ មានចម្ងល់ទៀត។
ក្នុងផេក របស់អ្នកនាង ដដែលបានសរសេររៀបរាប់ យ៉ាងដូច្នេះថា “ឆ្លងកាត់ពេលវេលាដ៏វែង អារម្មណ៍នៃការរង់ចាំ ការព្រួយបារម្ភ និងរូបភាពពិតនៃការបង្កើតកូនដ៏លំបាករបស់ម្តាយគ្រប់រូប ទីបំផុតអារម្មណ៍ជាឪពុកម្តាយដ៏ពិតប្រាកដបានមកដល់។ នៅពេលនេះ ស្វាគមន៍ Charlie មកកាន់ពិភពលោកដ៏ស្រស់ស្អាត។ Mommy និង Charlie មានសុវត្ថិភាព មានសុខភាពល្អ។ អរគុណចំពោះការបារម្ភ និងពាក្យជូនពរ របស់អ៊ុំពូមីងបងប្អូនទាំងអស់គ្នា.. ថ្ងៃទី11-11-2019 ម៉ោង 01:31pm ទម្ងន់ 3.75kg “។
សូមបញ្ជាក់ផងដែរថា កាលពីថ្ងៃទី១១ ខែវិច្ឆិកា ឆ្នាំ២០១៩ ត្រូវនឹងថ្ងៃទី២ នៃព្រះរាជពិធីបុណ្យអុំទូក អកអំបុក និង សំពះព្រះខែ អ្នកនាងឱក សុគន្ធកញ្ញា បានសម្រាលកូនប្រុស នៅក្នុងមន្ទីរពេទ្យ Bumrungrad ក្នុងប្រទេសថៃ ប្រកបដោយសុខសុវត្ថិភាព ធ្វើឲ្យលោកអ៊ឹង សុខលី ជាស្វាមី ដែលត្រូវបានមហាជនស្គាល់ថា ជាប្អូនប្រុសបង្កើតរបស់លោក អ៊ឹង ឆៃងួន ម្ចាស់ផលិតកម្មហង្សមាស និងក្រុមគ្រួសារ សប្បាយចិត្តយ៉ាងខ្លាំង ចំពោះវត្តមានកូនដំបូងរបស់អ្នកនាង៕
គេនៅចាំបានថា ពិធីមង្គលការរបស់អ្នកចម្រៀងដ៏ល្បី ឱក សុគន្ធកញ្ញា និងលោក អ៊ឹង សុខលី បានធ្វើឡើងយ៉ាងអធិកអធ័ម កាលពីថ្ងៃទី១៦ ខែឧសភា ឆ្នាំ២០១៩ នៅសណ្ឋាគារ សុខា ភ្នំពេញ ទល់មុខព្រះបរមរាជវាំង៕
