ប្រភពបានឲ្យដឹងទៀតថា មន្ត្រីរដ្ឋបាលជលផលនិងមន្ត្រីអាជ្ញាធរថ្នាក់ភូមិ ថ្នាក់ឃុំ ថ្នាក់ស្រុក ឃុបឃិតគ្នាលក់ព្រៃលិចទឹកក្នុងអតីតឡូត៍នេសាទលេខ១៨ យកលុយចែកគ្នាធ្វើមានធ្វើបានយ៉ាងសុខស្រួលតែម្ដង។ ជុំវិញបញ្ហានេះមន្ត្រីរាជការក្នុងមន្ទីរកសិកម្មខេត្តកំពង់ឆ្នាំង បានឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង ព្រមទាំងលោក លី ឡា ជាមេរដ្ឋបាលជលផលខេត្តកំពង់ឆ្នាំង ទេនោះ គឺករណីលក់ដីព្រៃលិចទឹកក្នុងអតីតដែនឡូត៍នេសាទលេខ១៨ ឃុំកំពង់ត្រឡាច មិនអាចប្រព្រឹត្តទៅដោយរលូនបានឡើយ។
ប្រភពព័តមានពីប្រជាពលរដ្ឋបានឲ្យដឹងថា ដីព្រៃលិចទឹកក្នុងអតីតឡូត៍នេសាទលេខ១៨ ត្រូវបានមន្ត្រីជំនាញនិងមន្ត្រីអាជ្ញាធរថ្នាក់ភូមិ ថ្នាក់ឃុំ ថ្នាក់ស្រុក ឃុបឃិតគ្នាលក់ឲ្យក្រុមហ៊ុនចិនដែលមានថៅកែជាម្ចាស់រោងចក្រផលិតស្បែកជើងឈ្មោះ រោងចក្រត្រីប៉ុស្ដិ៍ យ៉ាងរលូន។
ប្រភពពីមន្ត្រីរាជការមន្ទីរកសិកម្មខេត្តកំពង់ឆ្នាំង បានលើកឡើងថា ការដែលលោក គឹម ហេង នាយសង្កាត់រដ្ឋបាលជលផលកំពង់ត្រឡាច ហ៊ានធ្វើអ្វីៗស្រេចតែអំពើចិត្ត គឺដោយសារមានការសម្របសម្រួលពីសំណាក់លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា មេរដ្ឋបាលជលផលខេត្តកំពង់ឆ្នាំង។
សូម្បីតែលោក ឈួរ ច័ន្ទឌឿន អភិបាលខេត្តកំពង់ឆ្នាំង ក៏រក្សាភាពស្ងៀមស្ងាត់ផងដែរ ទុកឲ្យមន្ត្រីអាជ្ញាធរមូលដ្ឋានថ្នាក់ភូមិ ថ្នាក់ឃុំ ថ្នាក់ស្រុក ឃុបឃិតជាមួយមន្ត្រីរដ្ឋបាលជលផលធ្វើអ្វីៗតាមអំពើចិត្ត។ តាមការអះអាងរបស់មន្ត្រីរាជការក្នុងសាលាខេត្តកំពង់ឆ្នាំង មួយចំនួនបានឲ្យដឹងថា បច្ចុប្បន្នលោក ឈួរ ច័ន្ទឌឿន អភិបាលខេត្តកំពង់ឆ្នាំង គិតតែពីរឿងប្រើតួនាទីនិងអំណាចទន្ទ្រានកាន់កាប់ដីព្រៃទ្រព្យសម្បត្តិរដ្ឋយ៉ាងគឃ្លើន ហើយមិនខ្វល់ពីការទប់ស្កាត់បទល្មើសផ្សេងៗនោះទេ។
ប្រភពដែលស្និទ្ធនឹងលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង ក៏ដូចជាប្រភពស្និទ្ធនឹងលោក លី ឡា មេរដ្ឋបាលជលផលខេត្តកំពង់ឆ្នាំង បានឲ្យដឹងថា មន្ត្រីទាំង២នាក់នេះគិតតែពីរឿងផលប្រយោជន៍ផ្ទាល់ខ្លួន ហើយបណ្ដោយឲ្យបទល្មើសនេសាទ ក៏ដូចជាបទល្មើសទន្ទ្រានកាន់កាប់ដីព្រៃលិចទឹកក្នុងអតីតឡូត៍នេសាទជាច្រើនកន្លែងកើតឡើងឥតឈប់ឈរ។
ក្នុងនោះករណីលក់ដីព្រៃលិចទឹកក្នុងអតីតដែនឡូត៍នេសាទលេខ១៨ ក្នុងឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ទាល់តែមានការឃុបឃិតបើកដៃពីសំណាក់លោក ងិន ហ៊ុន និងលោក លី ឡា ទើបអ្វីៗអាចដំណើរការយ៉ាងរលូនគ្មានឧបសគ្គ។ ដូច្នេះថ្នាក់ដឹកនាំក្រសួងមហាផ្ទៃ ក៏ដូចជាថ្នាក់ដឹកនាំក្រសួងកសិកម្ម មិនគួរមើលរំលងភាពអសកម្មរបស់លោក ឈួរ ច័ន្ទឌឿន អភិបាលខេត្តកំពង់ឆ្នាំង ក៏ដូចជាអំពើពុករលួយរបស់លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា ដែលជាមេរដ្ឋបាលជលផលខេត្តកំពង់ឆ្នាំង នោះទេ ៕
អត្ថបទ៖ អរិយធម៌
