លោក អ៊ឹម ជីវ៉ា បានប្រកាសលាលែងពីតំណែងជាក្រុមប្រឹក្សាភិបាលសមាគមសិល្បករខ្មែរយ៉ាងតក់ក្រហល់នៅរសៀលនេះ បង្កឲ្យមានការភ្ញាក់ផ្អើលក្នុងសង្គមសិល្បៈ ដោយជាមួយគ្នានេះ លោកបានស្នើថ្នាក់ដឹកនាំសមាគមទាំងពីរ គឺសមាគមសិល្បករស្ម័គ្រចិត្តជួយសង្គម ដែលមានលោក ហេង ឡុង ជាប្រធាន និងសមាគមសិល្បករខ្មែរ អ្នកនាង ចន ច័ន្ទលក្ខិណា ជាប្រធាន សូមធ្វើការបកស្រាយលើបញ្ហាមួយចំនួនផង។
លោក អ៊ឹម ជីវ៉ា បានលើកយកបញ្ហា ៩ចំណុច ធ្វើជាកម្មវត្ថុសម្រាប់ការសុំលាលែងពីសមាគមសិល្បករខ្មែរ ដែលលោកអះអាងថានឹងមានសុពលភាពចាប់ពីថ្ងៃនេះតទៅ។ ចំណុចទាំងនោះរួមមាន៖ លោក ជីវ៉ា លើកឡើងថា តំណែង ជាក្រុមប្រឹក្សាភិបាលរបស់លោក ក្នុងសមាគមសិល្បករខ្មែរ គ្រាន់តែជាការរៀបចំដើម្បីល្អមើលតែប៉ុណ្ណោះ ឯមុខ និងតួនាទីគឺមិនដូចអ្វីដែលនិយាយមុនពេលបោះឆ្នោត ឬការធ្វើការងារដូចអាណត្តិប្រធានមុនៗឡើយ មានន័យថាការងារសមាគមធ្វើជាលក្ខណៈបុគ្គល មិនសូវបានមានពេលកោះហៅប្រជុំឬពិភាក្សាឡើយ។
ចំណុចផ្សេងទៀត សិល្បកររូបនេះ បញ្ចេញថាមានពាក់ព័ន្ធនឹងការឲ្យតម្លៃសមាជិកមិនស្មើភាពគ្នា ប្រកាន់បក្សពួក និងបញ្ហាផ្សេងទៀត អំពីភាពច្បាស់លាស់នៃកិច្ចការរបស់សមាគមទាំងពីរ គឺសមាគមសិល្បករស្ម័គ្រចិត្តជួយសង្គម ដែលមានលោក ហេង ឡុង ជាប្រធាន និងសមាគមសិល្បករខ្មែរ អ្នកនាង ចន ច័ន្ទលក្ខិណា ជាប្រធានជាដើម។ លោក ជីវ៉ា អះអាងថា លោកហាក់មិនច្បាស់ថា អ្នកណា ជាប្រធានសមាគមមួយណាឲ្យប្រាកដ រវាងសមាគមទាំងពីរ។
ចំណុចសំខាន់ផ្សេងទៀត ដែលមានក្នុងកម្មវត្ថុនៃការលាឈប់របស់លោក អ៊ឹម ជីវ៉ា គឺលោកស្នើឲ្យថ្នាក់ដឹកនាំសមាគមទាំងពីរ ជួយបង្ហាញរបាយការណ៍គ្រប់គ្រងចំណូលចំណាយរបស់សមាគម ដែលទទួលបានការឧបត្ថម្ភពីថ្នាក់ដឹកនាំប្រទេស និងឧកញ៉ាធំៗមួយចំនួន មានជាអាទិ៍ សម្ដេចតេជោឧបត្ថម្ភ ៥០០០០ ប្រាំម៉ឺនដុល្លារក្នុងមួយឆ្នាំ រយៈពេល៥ឆ្នាំ ! លោកឧកញ៉ា ហុងពីវ ឧបត្ថម្ភ៥០០០០ ប្រាំម៉ឺនដុល្លាររយៈពេល៥ឆ្នាំដូចគ្នា រួមទាំងថវិកាជំនួយរបស់ថ្នាក់ដឹកនាំមួយចំនួនទៀត។
ជុំវិញបញ្ហាខាងលើនេះ លោក ហេង ឡុង ជាប្រធានសមាគមសិល្បករស្ម័គ្រចិត្តជួយសង្គម និងជាប្រធានក្រុមប្រឹក្សាភិបាលសមាគមសិល្បករខ្មែរផងនោះ នៅមិនទាន់អាចសុំអធិប្បាយដោយផ្ទាល់បានទេនៅរសៀលនេះ ដោយការសុំអធិប្បាយតាមរយៈហ្វេសប៊ុក លោកមិនទាន់បានឆ្លើយតប គិតត្រឹមម៉ោង ៤ និង ១១នាទីថ្ងៃនេះ។ ប៉ុន្តែនៅក្នុងគ្រុបរបស់ខ្លួន លោក ហេង ឡុង បានដឹងពីករណីប្រកាសលាឈប់ពីសមាគមសិល្បករខ្មែររបស់លោក អ៊ឹម ជីវ៉ា ហើយ។
ថ្នាក់ដឹកនាំសមាគមរូបនេះ បញ្ជាក់ថា លោកនឹងឲ្យក្រុមមេធាវីរបស់លោកធ្វើការលើករណីនេះ ក្នុងនោះនឹងឲ្យមេធាវីរបស់លោកសើរើ និងពិនិត្យចំពោះការលើកឡើងទាំង ៩ចំណុចនោះ មានប៉ះពាល់ ឬជាការបរិហាកេរ្តិ៍សមាគមទាំងពីរឬអត់។
វិលមកលោក អ៊ឹម ជីវ៉ា វិញ បានឆ្លើយតបជាមួយ Sabay ថា នោះជាការសម្រេចចិត្តចុងក្រោយរបស់លោក ហើយថា មិនថ្វីទេ ដែលលោក ហេង ឡុង នឹងឲ្យមេធាវីពិនិត្យលើករណីនេះ ពីព្រោះជារឿងធម្មតា ដែលលោកជាអ្នកសុំលាលែង ត្រូវតែភ្ជាប់ជាមួយមូលហេតុ។ ដោយលោក ហេង ឡុង ជាថ្នាក់ដឹកនាំសមាគម ក៏មានសិទ្ធិប្រើប្រាស់មេធាវីអនុវត្តនីតិវិធីដែលពាក់ព័ន្ធ លើមូលហេតុនៃការលាឈប់របស់សមាជិកដូចគ្នា។
យ៉ាងណាលោក បញ្ជាក់ថា អ្វីដែលលោកបញ្ចេញនៅថ្ងៃនេះ គឺជារឿងពិត ហើយលោកនឹងទទួលខុសត្រូវលើសំដីលោកដូចគ្នា។ “បើគាត់រកឃើញថាចំណុចណាមួយដែលខ្ញុំខុស ដែលខ្ញុំវាយប្រហារសមាគម គាត់ប្ដឹងខ្ញុំទៅ តែខ្ញុំក៏មានក្រុមមេធាវីខ្ញុំសម្រាប់ធ្វើការលើរឿងហ្នឹងដូចគ្នាដែរ!” លោក អ៊ឹម ជីវ៉ា ថ្លែង៕
