លោកតាវ័យ៧១ឆ្នាំម្នាក់ ឈ្មោះ ហៀង ឆៃឡេង និង ប្រពន្ធឈ្មោះ ស្រ៊ី យាន អាយុ៦៩ឆ្នាំ បច្ចុប្បន្នមានទីលំនៅភូមិស្វាយតានី ឃុំព្រែកគយ ស្រុកស្អាង ខេត្តកណ្តាល បានធ្វើការចោទប្រកាន់ លោក ទឿង តាំង មេឃុំព្រែកគយ ថា បានឃុបឃិតគ្នាជាមួយមន្ត្រីមានអំណាចក្នុងខេត្តកណ្តាល រំលោភយកដីទំហំជាង៨ហិកតា ដែលពួកបានកាន់កាប់ អាស្រ័យផល តាំងពីឆ្នាំ១៩៩៥ មកម្ល៉េះ ។
ប៉ុន្តែលោកមេឃុំព្រែកគយ បានបដិសេធការចោទប្រកាន់នេះ ដោយអះអាងថា ដីនេះជាដីអាងទឹករបស់រដ្ឋ ពោលគឺ មិនមែនជារបស់លោកតា ហៀង ឆៃឡេង ទេ ។
លោកតា ហៀង ឆៃឡេង អះអាងប្រាប់ CPC NEWS នៅថ្ងៃទី១៩ ខែវិច្ឆិកា ឆ្នាំ២០១៩ នេះ ថា លោកតាបានកាន់កាប់ដីជាង៨ហិកតាដែលបានទិញពីប្រជាពលរដ្ឋតាំងពីឆ្នាំ១៩៩៥ មកម្ល៉េះ ។ លុះដល់ឆ្នាំ២០០៥ លោកតាបានដាក់ពាក្យស្នើសុំកាន់កាប់និងចេញប័ណ្ណសម្គាល់សិទ្ធិត្រឹមត្រូវពីអាជ្ញាធរមូលដ្ឋាន ។ ប៉ុន្តែអាជ្ញាធរមិនចេញអោយនោះទេ ។
បញ្ហានេះ ធ្វើអោយលោកតាឈឺចាប់យ៉ាងខ្លាំង ខណៈដីមួយនេះ លោកតាបានទិញពីប្រជាពលរដ្ឋ ដោយមានឯកសារត្រឹមត្រូវ និង បានកាន់កាប់តាំងពីឆ្នាំ១៩៩៥ បែរជាអាជ្ញាធរឃុំព្រែកគយ អះអាងថា បានដកហូតអោយរដ្ឋទៅវិញ ។
ទោះបីយ៉ាងណា ជុំវិញករណីនេះ លោកតាបានព្យាយាមទំនាក់ទំនងលោក ទឿង តាំង មេឃុំព្រែកគយ ដើម្បីបញ្ជាក់បន្ថែម តែលទ្ធផលហាក់គ្មានទាល់តែសោះ ទើបលោកតា ដាច់ប្រាប់រឿងរ៉ាវដ៏ឈឺចាប់និងអយុត្តិធម៌នេះ ដល់អ្នកសារព័ត៌មាន តែម្តង ។
ជាមួយគ្នានេះ ប្រជាពលរដ្ឋក្នុងភូមិជាច្រើននាក់ បានរួមគ្នាផ្តិតមេដៃ ដោយបញ្ជាក់ដូចៗគ្នា ថា ដីជាង៨ហិកតា នេះ ពិតជារបស់លោកតា ហៀង ឆៃឡេង ពិតប្រាកដមែន ។ទន្ទឹមនេះ លោកតា សំណូមពរអោយអាជ្ញាធរពាក់ព័ន្ធ ពិសេសសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត មេត្តាជួយអន្តរាគមន៍រកយុត្តិធម៌ ជូនលោកតាផង ។ពាក់ព័ន្ធបញ្ហានេះ លោក ទឿង តាំង មេឃុំព្រែកគយ បានបដិសេធ រាល់ការចោទប្រកាន់ទាំងអស់នេះ ។
លោកមេឃុំព្រែកគយ អះអាងប្រាប់ CPC NEWS នៅព្រឹកថ្ងៃទី១៩ ខែវិច្ឆិកា នេះ ថា ដីទាំងអស់នេះ គឺ ជាដីអាងទឹករបស់រដ្ឋ ដែលលោកអភិបាលខេត្តកណ្តាល បានដកហូតមកវិញ ទុកជាទ្រព្យសម្បត្តិរដ្ឋ ។
លោក ទឿង តាំង មេឃុំព្រែកគយ បន្តថា បើលោកតា ហៀង ឆៃឡេង ចង់បានដីនេះ ឬ យ៉ាងណា នោះ សូមស្នើសុំទៅលោកអភិបាលខេត្តកណ្តាល ព្រោះមានតែលោកអភិបាលខេត្ត ទេ ដែលមានសិទ្ធិសម្រេច ព្រោះដីនេះជាដីអាងទឹករបស់រដ្ឋ ដែលប្រជាពលរដ្ឋ បានកាន់កាប់ជាយូរមកហើយ ។ទោះយ៉ាងនេះក្តី ក៏លោកហៀង ឆៃឡេង សង្ឃឹមថា ដីដែលលោកតាបានកាន់កាប់តាំងពីឆ្នាំ១៩៩៥ មក គួរណាស់ផ្តល់ប័ណ្ណកម្មសិទ្ធិជូនលោកតា ។ បើមិនពុំដូច្នោះទេ គួរមានដំណោះស្រាយ សមធម៌ណាមួយដែរ មិនគួរដកហូតឆៅៗបែបនេះ នោះទេ ៕
អត្ថបទ៖ CPC
