អភិបាលខេត្តព្រះសីហនុ លោក គួច ចំរើន បានអះអាងថា ខេត្តមួយនេះ កំពុងក្លាយជាតំបន់ប៉ូលអភិវឌ្ឍន៍ជាតិមួយដ៏សំខាន់ នៅតំបន់ឆ្នេរសមុទ្រកម្ពុជា និងជាខេត្តដែលមានសក្តានុពលសេដ្ឋកិច្ចខ្ពស់ ក្នុងការទាក់ទាញវិនិយោគិន និងភ្ញៀវទេសចរ។
លោក គួច ចំរើន បានលើកឡើងបន្ថែមថា ការវិនិយោគលើវិស័យអចលនទ្រព្យ រួមមាន សំណង់អគារទំនើបខ្ពស់ៗ មជ្ឈមណ្ឌលពាណិជ្ជកម្ម អគារស្នាក់នៅរួម សណ្ឋាគារ និងមណ្ឌលកម្សាន្តគឺកំពុងកើនឡើងខ្លាំងនាប៉ុន្មានឆ្នាំចុងក្រោយនេះ។
បើតាមលោក គួច ចំរើន សន្ទុះរីកចម្រើននៅក្នុងខេត្តនេះ ពិសេសលើវិស័យអចលនទ្រព្យ គឺដោយសារតែការធានាបាននូវស្ថេរភាពនយោបាយ សន្តិសុខ និងសណ្តាប់ធ្នាប់សង្គម ធ្វើឱ្យប្រទេសជាតិ មានការអភិវឌ្ឍរីកចម្រើនលើគ្រប់វិស័យ និងទំនុកចិត្តពីអ្នកវិយោគផ្ទាល់។
លោកអភិបាលខេត្ត ក៏បានឱ្យដឹងដែរថា នៅក្នុងខេត្តនេះ វិស័យសំណង់កំពុងមានការអភិវឌ្ឍរីកចម្រើនយ៉ាងគំហុកគួរឱ្យកត់សម្គាល់ ក្នុងនោះ បើគិតចាប់ពីឆ្នាំ២០១៧ ដល់ខែវិចិ្ឆកា ឆ្នាំ២០១៩ មានចំនួន ១,០៧៦ គម្រោង អគារកម្ពស់ចាប់ពី ៥ ជាន់ ដល់ ៤៥ជាន់ មានចំនួន ៨០១ គម្រោង។
ជាមួយគ្នានោះ លោក គួច ចំរើន ក៏បានឱ្យដឹងថា ក្នុងរយៈពេល ១០ខែ ឆ្នាំ២០១៩ ខេត្តព្រះសីហនុ ទទួលបានភ្ញៀវទេសចរសរុបចំនួនជិត ២ លាននាក់ កើនឡើង ១០.៦២% ក្នុងនោះ ភ្ញៀវជាតិ ជាង ១ លាន ២សែននាក់ និងភ្ញៀវអន្តរជាតិជាង ៧៣ ម៉ឺននាក់។
លោកបន្តថា បើពិនិត្យមើលមូលដ្ឋានអាជីវកម្ម សេវាកម្មទេសចរណ៍វិញ គិតត្រឹមខែតុលា ឆ្នាំ២០១៩ មានចំនួនសរុប ៨៨០កន្លែង ក្នុងនោះសណ្ឋាគារ ១០៨កន្លែង ស្មើនឹង ៧,១៦២បន្ទប់ ផ្ទះសំណាក់ ២៣៧កន្លែង ស្មើនឹង ២,៩៣៦បន្ទប់ បឹងហ្គាឡូចំនួន ៣១កន្លែង ស្មើនឹង ៤៣១បន្ទប់ ភោជនីយដ្ឋាន ៣១៣កន្លែង ស្មើនឹង ១៣,៨៣៣តុ និងសេវាកម្មផ្សេងៗជាច្រើនទៀត។
លោក បានអះអាងថា នេះពិតជាសមិទ្ធផលថ្មីមួយទៀត របស់ខេត្តព្រះសីហនុ ដែលបានឆ្លុះបញ្ចាំងនូវការលូតលាស់ទៅមុខឥតឈប់ឈរនៃវិស័យឯកជននៅកម្ពុជា ជាពិសេស ការទាក់ទាញអ្នកវិនិយោគតែម្តង៕
អត្ថបទ៖ Clicknews
