ជើងខ្លាំងម្នាក់រួមនឹងបក្ខពួក នាំគ្នាព្រួតវ៉ៃបែកចិញ្ចើមហូរឈាមពេញផ្ទៃមុខ បន្ទាប់ពីរូបនាងនិងបក្ខពួក ទារលុយពីបុរសម្នាក់ជាអ្នកលក់ចាខ្វៃលើចំណីផ្លូវក្បែរផ្សារច្បារអំពៅ មិនបានកាលពីវេលាម៉ោង៤៖៥0នាទីទៀបភ្លឺ ថ្ងៃទី២១ ខែវិច្ឆិកា ឆ្នាំ២០១៩ នៅចំណុចគល់ស្ពានច្បារអំពៅចាស់ ក្នុងសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
សមត្ថកិច្ច អះអាងថា បុរសរងគ្រោះបែកចិញ្ចើមខាងលើមានឈ្មោះ សុខ ប្រុស អាយុ៤២ឆ្នាំ មុខរបរលក់ ចាខ្វៃតាមរទេះរុញ ស្នាក់នៅផ្ទះលេខ ៤៨២ ផ្លូវលេខ៣៦៩ ក្នុងសង្កាត់ច្បារអំពៅ២ ខណ្ឌច្បារអំពៅ ។
ចំណែកស្ត្រីដៃដល់ មានឈ្មោះទូច ជាអ្នកលក់ផ្លែឈើនៅលើផ្លូវសាធារណៈ គល់ស្ពានព្រះមុនីវង្សចាស់ត្រើយខាងកើត នៅជាប់ច្រលចូលផ្សារច្បារអំពៅប៉ែកខាងត្បូង ។
បុរសរងគ្រោះ បានរៀបរាប់ថា រាល់ថ្ងៃនាពេលជិតភ្លឺ រូបលោកតែងតែរុញរទេះទៅលក់ចាខ្វៃនឹងស្លឹកតយ នៅចំណុចគល់ស្ពានច្បារអំពៅ ត្រង់ចំណុចកើតហេតុដូចសព្វដង ព្រមទាំងមានស្ត្រីម្នាក់តែងតែមកទារលុយពីគាត់ចំនួន២មុឺនរៀល ថ្លៃភាសុី ដោយយកឈ្មោះលោកប្រធានផ្សារអំពៅ ជាអ្នកឲ្យដើរប្រមូល ។ ប៉ុន្តែដោយសាររូបលោកមិនដឹងប្រវត្តិ និងតួនាទីស្ត្រីរូបនេះជាអ្វីអោយពិតប្រាកដ ទើបគាត់មិនឲ្យលុយ ខណៈស្ត្រីជាងល្អខាងលើបានមកទារ២ទៅ៣ដងមកហើយមិនបាន ។
រហូតនៅថ្ងៃកើតហេតុ ស្ត្រីរូបនោះនិងបក្ខពួកបាននាំគ្នាឈ្លោះជាមួយគាត់ ព្រមទាំងប្រើហិង្សាវាយគាត់បែកចិញ្ចើមហូរឈាមពេញផ្ទៃមុខ និងយកកាំបិតទៅអុកលើរទេះរបស់គាត់ទៀត តែមិនបណ្ដាលឲ្យខូចខាតនោះទេ ។
ក្រោយកើតហេតុ ភាគីខាងស្ត្រីជើងល្អក៏បាននាំគ្នារត់ចេញទៅអស់ ។ រីឯបុរសរងគ្រោះបានត្រឹមទៅលាងរបួស និង ដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលច្បារអំពៅ២ ដើម្បីអោយសមត្ថកិច្ចជួយរកយុត្តិធម៌ដល់រូបលោក ។
ជាមួយគ្នានេះដែរ លោកប្រធានផ្សារច្បារអំពៅ អះអាងថា តើរូបលោកមានឲ្យស្ត្រីម្នាក់ ឬបុគ្គលណា ដើរយកលុយពីប្រជាពលរដ្ឋលក់ដូរតាមចញ្ចើមផ្លូវក្បែរផ្សារច្បារអំពៅ ឬទេ ? ហើយលោកប្រធានផ្សារក៏បានឆ្លើយថា គាត់មិនដែលឲ្យនរណាម្នាក់យកលុយពីប្រជាពលរដ្ឋលក់ដូរលើចំណីផ្លូវនោះទេ ។
ករណីនេះមិនអាចសុំការបំភ្លឺពីភាគីខាងស្ត្រីខាងលើបាននោះទេ មានតែរង់ចាំមើលសមត្ថកិច្ចជំនាញរបស់ប៉ុស្ដិ៍នគរបាលច្បារអំពៅ២ រកដំណោះស្រាលដល់បុរសរងគ្រោះតែប៉ុណ្ណោះ ៕
អត្ថបទ៖ រស្មីកម្ពុជា
