ខណៈដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ទៅកាន់ប្រទេសកូរ៉េ ខាងត្បូង ខិតជិតដល់នោះ ពលករ និងនិស្សិតខ្មែរជាច្រើន ដែលកំពុងធ្វើការ និងសិក្សា នៅប្រទេសកូរ៉េ បានបង្ហាញពីការត្រៀមខ្លួនស្វាគមន៍សម្ដេចដោយក្ដីគោរពស្រឡាញ់។
និស្សិត និងពលករខ្មែរ ដែលកំពុងរស់នៅធ្វើការ និងសិក្សា នៅប្រទេសកូរ៉េខាងត្បូង បានបង្ហាញ ចំណាប់អារម្មណ៍របស់ខ្លួន តាមរយៈការបង្ហោះជាវីដេអូឃ្លីប លើបណ្តាញទំនាក់ទំនងសង្គមហ្វេសប៊ុក ដោយប្រកាសទទួលស្វាគមន៍យ៉ាងកក់ក្តៅចំពោះវត្តមានរបស់សម្តេចតេជោ ហ៊ុន សែន ដែលសម្តេច នឹង ឆ្លៀតឱកាសជួបសំណេះសំណាលជាមួយពលករ និងនិស្សិត នៅប្រទេសកូរ៉េខាងត្បូង។
តបតាមការអញ្ជើញរបស់ឯកឧត្តម មូន ចែអ៊ីន (Moon Jae-in) ប្រធានាធិបតី នៃប្រទេសកូរ៉េ ខាងត្បូង សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា នឹងដឹកនាំគណៈប្រតិភូជាន់ខ្ពស់ អញ្ជើញ ទៅចូលរួមកិច្ចប្រជុំកំពូល រំលឹកខួបអនុស្សាវរីយ៍អាស៊ាន-កូរ៉េ និងកិច្ចប្រជុំកំពូលមេគង្គ-កូរ៉េ លើកទី១ ចាប់ពីថ្ងៃទី២៤ ដល់ថ្ងៃទី២៧ ខែវិច្ឆិកា នេះ ។
ក្នុងដំណើរទស្សនកិច្ចនេះ សម្តេចតេជោ នឹងជួបប្រជុំទ្វេភាគីជាមួយឯកឧត្តមប្រធានាធិបតី មូន ចែអ៊ីន ដើម្បីពិភាក្សាលើកិច្ចសហប្រតិបត្តិការទ្វេភាគី រួមទាំងប្រធានបទនានាពាក់ព័ន្ធនឹងបញ្ហាតំបន់ និង អន្តរជាតិ ដែលជាការយកចិត្តទុកដាក់ និងការបារម្ភរួម។ បន្ទាប់មក ថ្នាក់ដឹកនាំទាំងពីរ នឹងអញ្ជើញធ្វើជា សាក្សីក្នុងពិធីចុះហត្ថលេខាលើឯកសារសំខាន់ៗមួយចំនួន រវាងប្រទេសទាំងពីរ។
នៅក្នុងក្របខណ្ឌកិច្ចប្រជុំកំពូល រំលឹកខួបអនុស្សាវរីយ៍អាស៊ាន-កូរ៉េ សម្តេចតេជោ នឹងអញ្ជើញ ថ្លែងសុន្ទរកថាចំនួនពីរដង ដោយផ្តោតជាសំខាន់ទៅលើ ទី១. ទំនាក់ទំនងដៃគូសន្ទនាអាស៊ាន-កូរ៉េ រយៈ ពេល៣០ឆ្នាំ និងទិសដៅអនាគត ក្នុងកិច្ចខិតខំដើម្បីសម្រេចឲ្យបាននូវសមាហរណកម្មតំបន់ និងការអភិវឌ្ឍប្រកបដោយចីរភាព នៅក្នុងវិស័យនយោបាយ-សន្តិសុខ សេដ្ឋកិច្ច និងសង្គម-វប្បធម៌ និងទី២– ការ លើកកម្ពស់ការតភ្ជាប់៕
អត្ថបទ៖ btv
