បុរសម្នាក់បើករថយន្តមួយគ្រឿងបោះពួយយ៉ាងលឿន បានជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តហោះគងលើក្បាលរបាំងថ្ម ទៅមុខលែងរួច ហើយសំណាងល្អម្ចាស់រងរបួសស្រាល។ ហេតុការណ៍នេះ កើតឡើងនៅវេលាម៉ោង៩:៣០នាទីយប់ ថ្ងៃអាទិត្យ ទី២៤ ខែវិចិ្ឆកា ឆ្នាំ២០១៩ ស្ថិតតាមបណ្ដោយផ្លូវ២១៧(មុនីរ៉េត) ចំណុចគល់ស្ពានក្រោមដីស្ទឹងមានជ័យ ក្នុងសង្កាត់ស្ទឹងមានជ័យទី២ ខណ្ឌមានជ័យ។
បើតាមប្រភពបានឲ្យដឹងថា មុនពេលកើតហេតុ គេឃើញបុរសម្នាក់ បើករថយន្តព្រូស ពណ៌ក្រហម ពាក់ផ្លាកលេខ ភ្នំពេញ 2BD 0273 ធ្វើដំណើរតាមបណ្តោយផ្លូវ២១៧(មុនីរ៉េត) ក្នុងទិសដៅពីត្បូងទៅជើងបោះពួយយ៉ាងលឿន ខណៈមកដល់ចំណុចកើតហេតុខាងលើ បានជ្រុលចង្កូតទៅបុករបាំងថ្មពុះចែកទ្រូងផ្លូវពេញ ទំហឹង បណ្ដាលឲ្យរងការខូចខាត រថយន្តបង្កគងលើក្បាលរបាំងថ្ម ទៅមុខលែងរួច។ ចំណែកម្ចាស់រថយន្តរងរបួសស្រាល បានចេញពីកន្លែងកើតហេតុបាត់បន្សល់ទុករថយន្តចោលឲ្យសមត្ថកិច្ច។
នៅថ្ងៃដដែល រថយន្តម៉ាកព្រូសយ៉ាងលឿនទៅបុកខឿនសួនច្បារ និងបង្គោលភ្លើងបំភ្លឺផ្លូវមួយដើម បណ្ដាលឲ្យទ្រេត ចំណែករថយន្ដរងការខូចខាតយ៉ាងដំណំ កាលពីវេលាម៉ោង ១:៣០នាទីយប់រំលងអធ្រាត្រឈានចូលថ្ងៃចន្ទ ទី២៥ ខែវិច្ឆិកា ឆ្នាំ២០១៩ ត្រង់ចំណុចខាងត្បូងរង្វង់មូលសម្ដេចជួនណាត ប្រមាណ២០ ម៉ែត្រ ទល់មុខនឹងមជ្ឈមណ្ឌលវប្បធម៌ ទេសចរណ៍និងពាណិជ្ជកម្មភ្នំពេញ ស្ថិតនៅក្នុងសង្កាត់ទន្លេបាសាក់ ខណ្ឌចំការមន។
ម្ចាស់រថយន្តបង្កមិនត្រូវបានស្គាល់អត្តសញ្ញាណនោះទេ ក្រោយពីកើតហេតុបានចាកចេញពីកន្លែងកើតហេតុបាត់ បើករថយន្តម៉ាកព្រូស ពណ៌ស ពាក់ផ្លាកលេខ ភ្នំពេញ 2BA 4759។
ប្រភពបានឲ្យដឹងថា មុនកើតហេតុគេឃើញរថយន្តខាងលើបើកតាមបណ្ដោយផ្លូវព្រះសីហនុ ទិសដៅពីលិចទៅកើតយ៉ាងលឿន ខណៈមកដល់ចំណុចកើតហេតុស្រាប់តែរេចង្កូតឡើងលើខឿនសួនច្បារបុកបង្គោលភ្លើងបំភ្លឺផ្លូវបណ្ដាលឲ្យទ្រេត រថយន្តខូចខាតយ៉ាងដំណំ តែសំណាងល្អមិនបង្កឲ្យ នរណាម្នាក់រងរបួសនោះទេ។ ភ្លាមៗគេឃើញម្ចាស់រថយន្តចេញពីក្នុងរថយន្តចាកចេញពីកន្លែងកើតហេតុនេះ បន្សល់ទុកតែរថយន្តឲ្យសមត្ថកិច្ច។
ចំនែកឯករណីមួយទៀតមានរថយន្តចំនួន២គ្រឿង បុកគ្នានៅផ្លូវបំបែកជាបួនបណ្តាលឲ្យរថយន្តទាំង២គ្រឿងរងការខូចខាត។ហេតុការណ៍នេះបានកើតឡើងកាលពីម៉ោង ១និង៥០នាទីរំលងអធ្រាត្រ ថ្ងៃទី២៥ ខែវិច្ឆិកា ឆ្នាំ២០១៩ នៅតាមបណ្តោយផ្លូវលេខ១៩កែងផ្លូវលេខ១៣៦ ស្ថិតក្នុងសង្កាត់ផ្សារកណ្ដាលទី២ ខណ្ឌដូនពេញ រាជធានីភ្នំពេញ ។
ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសបីនាក់ បើករថយន្តមួយគ្រឿង ម៉ាកតូយូតាព្រូស ពណ៌ស ពាក់ស្លាកលេខ ភ្នំពេញ 2BA-1051 ធ្វើដំណើរក្នុងទិសដៅពីត្បូងទៅជើង តាមបណ្ដោយផ្លូវលេខ១៩ យ៉ាងលឿន ។ ខណៈនោះ ក៏មានរថយន្តមួយគ្រឿងទៀត ម៉ាកលុចស៊ីស RX330 ពណ៌ស ពាក់ស្លាកលេខ ភ្នំពេញ 2BC-8021 បើកបរដោយបុរសម្នាក់ តាមបណ្តោយផ្លូវលេខ១៣៦ ក្នុងទិសដៅពីលិចទៅកើតយ៉ាងលឿន ។ លុះមកដល់ចំណុចកើតហេតុ ដែលជាផ្លូវបំបែកជាបួន រថយន្តទាំងពីរគ្រឿងបុកគ្នាពេញទំហឹង បណ្តាលឲ្យរថយន្តទាំង២គ្រឿងខូចខាតផ្នែកខាងមុខ និងបុរសម្នាក់ ដែលរួមដំណើរនៅក្នុងរថយន្តតូយ៉ូតាព្រូស រងរបួសបែកក្បាល។
បន្ទាប់ពីកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ ហើយបានឲ្យភាគីទាំងពីរសម្របសម្រួលដោះស្រាយគ្នា ប៉ុន្តែចរចាមិនត្រូវគ្នា ក៏រាយការណ៍ជូនសមត្ថកិច្ចជំនាញចរាចរ ចុះមកវាស់វែង និងស្ទូចយករថយន្តទាំងពីរគ្រឿង ទៅរក្សាទុកនៅការិយាល័យចរាចរផ្លូវគោក នៃស្នងការដ្ឋាននគរបាល រាជធានីភ្នំពេញរង់ចាំដោះស្រាយគ្នានៅពេលក្រោយ ៕
