មកដល់ថ្ងៃនេះអំបិលនាំមកពីប្រទេសឥណ្ឌា ដែលខ្មែរយើងទិញសំរាប់បំពេញការខ្វះខាតពីការផលិតអំបិលក្នុងស្រុកមិនគ្រប់គ្រាន់បានចំនួន៥០០០០តោនហើយ។ នេះបើតាមការអះអាងពីលោក ប៊ុន បារាំង ប្រធានសមាគមន៍ផលិតអំបិលកំពត-កែប ឲ្យដឹងនៅថ្ងៃទី២៥ ខែវិច្ឆិកានេះ។
លោកបារាំងបានអួតប្រាប់ទៀតថាអំបិលឥណ្ឌានេះ គឺគេផលិតដូចអំបិលខ្មែរយើងនៅខេត្តកំពត -កែបអញ្ចឹង។គាត់ថាអំបិលនេះល្អ មានគុណភាពលេខ១ សឹងតែគ្មានអំបិលណាល្អដូច។ ទៅឃើញផ្ទាល់ដល់កន្លែងធ្វើអំបិលគឺគេធ្វើស្រែដូចយើងអញ្ចឹង។ អំបិលឥណ្ឌានេះលោកបារាំងថា មកដល់ពេលនេះលក់ជិតអស់ហើយ។ នៅពេលសួរថា តើយើងត្រូវការនាំចូលប៉ុន្មានតោនសំរាប់តម្រូវការប្រចាំឆ្នាំ។
លោកបារាំងបានប្រាប់ថា មិនកំណត់ចំនួនទេ បើយើងផលិតអំបិលយើងមិនគ្រប់ហូបគឺនៅតែនាំចូល ពីព្រោះយើងត្រូវការអំបិលសំរាប់ហូបប្រចាំឆ្នាំអស់ប្រមាណ១១ម៉ឺនតោន។ រីឯយើងផលិតក្នុងស្រុកបានតែប្រមាណ៣ម៉ឺនតោនប៉ុណ្ណោះ។ អំបិលនេះគេបញ្ចូលអ៊ីយ៉ូដរួចជាស្រេច។
នៅពេលសួរថាតើអំបិលនាំពីចិនយ៉ាងម៉ិចដែរ?។ លោកបារាំងឆ្លើយថា ឆ្នាំនេះខេត្តដែលយើងទិញអំបិលនោះ គឺត្រូវជន់លិចមិនអាចមានអំបិលលក់អោយយើងទេ។ បើនៅតែមានភ្លៀងយើងមិនអាចផលិតអំបិលបានគ្រប់តម្រូវការបានទេ។ អញ្ចឹងមានតែនាំចូលពីឥណ្ឌាមកថែមទៀត។ យ៉ាងហោចណាស់ក៏បាននាំចូលអំបិលពីឥណ្ឌាបន្ថែម៥០០០តោនទៀតដែរសំរាប់ប្រើប្រាស់ឆ្នាំ២០២០នេះ។កាលពីដើមឆ្នាំ២០១៩អំបិលនាំចូលទិញពីចិនមានចំនួន១ម៉ឺនតោន៕
អត្ថបទ៖ រស្មីកម្ពុជា
