នៅល្ងាចថ្ងៃទី២៥ ខែ វិច្ឆិកាក្រសួងទេសចរណ៍ ក្រសួងវប្បធម៌ និងវិចិត្រសិល្បៈ និងស្ថានទូតចិន ប្រចាំនៅកម្ពុជា បានសហការរៀបចំព្រឹត្តិការណ៍សំដែងមិត្តភាពកម្ពុជា-ចិន ក្រោមប្រធានបទ ខ្សែក្រវ៉ាត់និងផ្លូវ ក្នុងដំណើរទស្សនកិច្ចនៅប្រទេសកម្ពុជា។
នៅក្នុងកម្មវិធីនេះ ក្រសួងទេសចរណ៍ និងស្ថានទូតចិន បានបង្ហាញការប្តេជ្ញាចិត្តពង្រីកកិច្ចសហប្រតិបត្តិការ និងជួយគ្នាទៅវិញទៅមក ដើម្បីជំរុញកំណើនវិស័យទេសចរណ៍ និងការវិនិយោគនៃប្រទេសទាំងពីរ។
ក្នុងពិធីនោះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា កម្មវិធីសំដែងសិល្បៈរួមគ្នាកម្ពុជា-ចិន បានរៀបចំឡើងក្នុងន័យពង្រឹងកិច្ចសហប្រតិបត្តិការ និងទំនាក់ទំនងមិត្តភាពលើវិស័យវប្បធម៌ និងសិល្បៈនៃប្រទេសទាំងពីរកម្ពុជា-ចិនផង និងអបអរសាទរគាំទ្រដល់ការរៀបចំឆ្នាំវប្បធម៌ ទេសចរណ៍កម្ពុជា-ចិន និងជាការចូលរួមចំណែកយ៉ាងសកម្មដល់ការអនុវត្តយុទ្ធសាស្ត្រ“ខ្សែក្រវ៉ាត់ និងផ្លូវ”ផង ពិសេសឈានឆ្ពោះទៅ សម្រេចបានការកសាងសហគមន៍ជោគវាសនារួមគ្នាកម្ពុជា-ចិន។
ឯកឧត្តម បានថ្លែងបន្តថា បច្ចុប្បន្នអង្គការទេសចរណ៍ពិភពលោកបានវាយតំលៃថា ចិនគឺជាគោលដៅទេសចរណ៍ធំជាងគេ និងជាប្រភពទីផ្សារទេសចរណ៍ធំជាងគេលើសកលលោក។ ទន្ទឹមនឹងនេះ ខណៈដែលចំនួនភ្ញៀវទេសចរអន្តរជាតិ នឹងកើនឡើងដល់ប្រមាណ១៦០០លាននាក់នៅឆ្នាំ២០២០ ចំនួនទេសចរចិនចេញក្រៅប្រទេសនឹងកើនឡើងដល់ជិត២០០លាននាក់។
ឯកឧត្តម បញ្ជាក់ថា ដោយឡែកសម្រាប់ប្រទេសកម្ពុជាកាលពីឆ្នាំ២០១៨ ទទួលបានទេសចរអន្តរជាតិប្រមាណ៦.២លាននាក់ ក្នុងកំណើន១១% ក្នុងនោះ ទេសចរចិនមានប្រមាណ២លាននាក់ ក្នុងកំណើន ៧០% ដោយឡែកក្នុងរយៈពេល០៩ខែនៅឆ្នាំ២០១៩នេះ កម្ពុជាទទួលបានទេសចរអន្តរជាតិសរុបចំនួនជាង ៤,៨លាននាក់កើនឡើង១០% ធៀបនឹងរយៈពេលដូចគ្នានៅឆ្នាំ២០១៨ ហើយបានធ្វើអោយទេសចរចិនមកកម្ពុជាស្ថិតក្នុងលំដាប់លេខ១ ក្នុងរយៈពេល២ឆ្នាំជាប់គ្នា ក្នុងចំណោមទីផ្សារធំៗទាំង១០នៅកម្ពុជា។
តាមរយៈកិច្ចសហប្រតិបត្តិការ និងការជួយគ្នាទៅវិញទៅមករវាងចិន-កម្ពុជា ឯកឧត្តម ថោង ខុន រំពឹងថា ឆ្នាំ២០២០ កម្ពុជានឹងទទួលបានទេសចរចិនប្រមាណ៣លាននាក់។
ឯកឧត្តម Wang Wen Tuin ឯកអគ្គរដ្ឋទូតចិនប្រចាំនៅកម្ពុជា បានថ្លែងថា កម្មវិធីសំដែងសិល្បៈនេះ គឺបានរៀបចំឡើងនៅតាមបណ្តាប្រទេសមួយចំនួនដូចជា អូស្ត្រាលី, ម៉ាឡេស៊ី, ថៃ, វៀតណាម, ឡាវ និងបណ្តាប្រទេសនានាទៀត ក្នុងគោលបំណងពង្រឹងកិច្ចសហប្រតិបត្តិការក្នុងវិស័យទេសចរណ៍វប្បធម៌នៅក្រៅប្រទេស និងបង្ហាញប្រពៃណីវប្បធម៌ចិនជូនប្រជាជនចិននៅតាមបណ្តាប្រទេសនានាបានទស្សនាផងដែរ៕
អត្ថបទ៖ BTV
