ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា របបកម្មសិទ្ធិដីធ្លី មានការចុះបញ្ជីដី មានប្រព័ន្ធសុរិយោដីចុះបញ្ជីច្បាស់លាស់តាមគោលការណ៍នីតិរដ្ឋ ដោយបានចុះបញ្ជីដីធ្លីប្រមាណជាង ៥,៤លានប័ណ្ណ ត្រូវជា ៧៨ភាគរយ នៃក្បាលដីសរុប ដែលមានប្រមាណ ៧លានក្បាលដី គ្រោងបញ្ចប់នៅឆ្នាំ២០២១។ ការលើកឡើងនេះ ធ្វើឡើងក្នុងវេទិកានគរូបនីយកម្មកម្ពុជា ស្តីពី «ការអភិវឌ្ឍទីក្រុងប្រកបដោយភាពឆ្លាតវៃ ចីរភាព និងបរិយាប័ន្ន» នៅថ្ងៃទី២៧ ខែវិច្ឆិកា ឆ្នាំ២០១៩នេះ នៅសណ្ឋាគារសូហ្វីតែលភ្នំពេញភូគីត្រា។
វេទិកានេះ ត្រូវបានសហការរៀបចំឡើងដោយ ក្រសួងដែនដី នគរូបនីយកម្ម និង សំណង់ និងអង្គការសហប្រជាជាតិនៅកម្ពុជា ដោយមានការចូលរួមពីអ្នកជំនាញគោលនយោបាយខាងផ្នែកអភិវឌ្ឍន៍ទីក្រុងថ្នាក់ជាតិ និងអន្តរជាតិ តំណាងក្រសួងស្ថាប័នពាក់ព័ន្ធ តំណាងអង្គការសហប្រជាជាតិនិងដៃគូអភិវឌ្ឍន៍ ស្ថានទូតបរទេស ស្ថាប័នសិក្សា សភាពាណិជ្ជកម្មកម្ពុជា និងវិស័យឯកជន សរុបអ្នកចូលរួមមានប្រមាណ ២៥០នាក់៕
