ឆ្លើយតបនឹងរូបភាពកូនសិស្សតូចៗ រៀនក្រោមដើមឈើ នៅភូមិរុងរឿង១ ឃុំទឹកក្រហម ស្រុកជាំក្សាន្ត នៅយប់ថ្ងៃទី២៧វិច្ឆិកានេះ អភិបាលស្រុកជាំក្សាន្តលោក ជា គឹមសេង បានបញ្ជាក់ថា នៅព្រឹកស្អែក ក្រោយបញ្ចប់ការចូលរួមកិច្ចប្រជុំបញ្ហាព្រំដែន ជាមួយខេត្តអូរប៊ុន ប្រទេសថៃ លោក និងលោកឧត្តមសេនីយ៍ឯក ស្រី ឌឹក ប្រធានក្រុមការងារចុះជួយស្រុកជាំក្សាន្ត នឹងចុះទៅមើលជាក់ស្តែង ដើម្បីមានដំណោះស្រាយជូន។
លោកអភិបាលបន្តថា រហូតមកដល់ពេលនេះ មិនទាន់មានសំណើណាមួយ ត្រូវបានដាក់មកការិយាល័យអប់រំស្រុក ពីរឿងខ្វះអគាររៀននោះទេ។
សូមរម្លឹកថា នៅសាលាបឋមសិក្សា អូរជុញ ស្ថិតក្នុងភូមិសែនរុងរឿង១ ឃុំទឹកក្រហម ស្រុកជាំក្សាន្ត ខេត្តព្រះវិហារ ពុំទាន់មានថ្នាក់រៀននៅឡើយ។ សព្វថ្ងៃ ក្មេងៗ បានអង្គុយរៀន នៅក្រោមដើមឈើ ដោយក្រាលតង់កៅស៊ូ អង្គុយ និងក្រាបសរសេរអក្សរ។
រូបភាពកុមារ មិនមានថ្នាក់រៀន នៅសាលាបឋមសិក្សា អូរជុញ ត្រូវបានអ្នកគ្រូបង្រៀនម្នាក់ ដែលមានហ្វេសប៊ុកឈ្មោះ Hunny Phim បានសរសេរថា «ថ្ងៃនេះ មានរូបភាពកូនៗ អង្គុយរៀន ក្រោមដើមឈើ។ សូមមាតាបិតា បងប្អូនណា ដែលបានឃើញ សូមមេត្ដាជួយឧបត្ថម្ភជា៖ ឈើ ដែក ឬក៏ជាលុយក៏ដោយ មិនកំណត់ទេ។ សាលាបឋមអូរជុញ កំពុងតែរកជំនួយមកធ្វើរោងដោល ២បន្ទប់ មានលេខទំនាក់ទំនង 097 8044 485/ 097 6892 568/ 097 8564 187/ 097 8910 917»៕
អត្ថបទ៖ swiftnews
