ក្រោយរត់គេចខ្លួន៤ខែ កម្លាំងនគរបាលនៃស្នងការដ្ឋាននគរបាលខេត្ដកំពតបាន ឃាត់ខ្លួនអ្នកបើកបររថយន្តដឹកភ្ញៀវហើយបង្កគ្រោះថ្នាក់ចរាចរណ៍ឲ្យភ្ញៀវទេសចរសញ្ជាតិចិន៣នាក់ស្លាប់ និងរបួសជាច្រើននាក់កន្លងមក នៅលើផ្លូវភ្នំគូលែនស្ថិតនៅ ភូមិពេញ ឃុំខ្នងភ្នំ ស្រុកស្វាយលើ ខេត្តសៀមរាបហើយរត់គេចខ្លួន កាលពីព្រឹកថ្ងៃ២៩ វិច្ឆិកា ឆ្នាំ ២០១៩ វេលា ម៉ោង០៩ និង១៥នាទី ។
លោក ឧត្តមសេនីយ៍ត្រី ហួត សុធី ស្នងការរងទទួល ការងារសន្តិសុខ នៃស្នងការដ្ឋាននគរបាលខេត្តសៀមរាបដែលដឹកនាំកម្លាំងសហការ ជាមួយកម្លាំងសមត្ថកិច្ចខេត្តកំពតឃាត់ខ្លួនតៃកុងរថយន្តដែលបង្ក គ្រោះថ្នាក់ចរាចរណ៍ នៅលើ ភ្នំគូលែនបានឲ្យដឹងថា ដោយបានការចង្អុលណែនាំដ៏ខ្ពង់ខ្ពស់ពី លោក ទៀ សីហា អភិបាល នៃគណៈអភិបាលខេត្តសៀមរាប និង លោកឧត្ដមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប
បានបញ្ជាកម្លាំងផែន ការងារសន្តិសុខផ្ទៃក្នុង ចុះសហការស្រាវជ្រាវជាមួយកម្លាំងស្នងការដ្ឋាននគរបាលខេត្តកំពតបានធ្វើការឃាត់ខ្លួនអ្នកបើកបរថយន្តសាំ យ៉ុងដឹកភ្ញៀវទេសចរណ៍ជនជាតិ ចិន ដែលបង្កគ្រោះថ្នាក់លើផ្លូវ ភ្នំគូ លេន ក្រឡាបរថយន្ដបណ្ដាលឲ្យស្លាប់អ្នកជិះ៣ នាក់ និងរបួសជាច្រើននាក់កាលពីថ្ងៃទី ២១ ខែកក្កដា ឆ្នាំ ២០១៩ ក្រោយ ហេតុការណ៍អ្នកបើកបររថយន្តបានរត់គេចខ្លួនអស់រយៈពេលជិត៤ខែ ។
លោកឧត្តមសេនីយ៍ត្រី ហួត សុធី ស្នងការរងផែនការងារសន្តិសុខបាន ដឹកនាំកម្លាំងស្រាវជ្រាវនិងសហការជាមួយស្នងការដ្ឋាននគរបាលខេត្តកំពតឃាត់ខ្លួនជនសង្ស័យតាមដីកាបង្គាប់ឲ្យនាំខ្លួនរបស់លោក មុយ សុភ័ក្ត្រ ចៅក្រម ស៊ើបសួរនៃសាលាដំបូងខេត្តសៀមរាប ។
លោក ឧត្តមសេនីយ៍ត្រីបានបន្តទៀតថា កាលពីថ្ងៃទី ២១ ខែកក្កដា ឆ្នាំ ២០១៩ មានករណីគ្រោះថ្នាក់ចរាចរណ៍ មួយកើតឡើងនៅលើចំណុច ខ្នងភ្នំគូលេន ក្នុងនោះមានជនជាតិចិន ចំនួន១៤នាក់ ដែលជាភ្ញៀវរបស់ ក្រុមហ៊ុន ឆាង យ៉ុង ទីតាំងស្ថិតនៅភូមិ មណ្ឌលមួយ សង្កាត់សៀមរាប ក្រុង / ខេត្តសៀមរាប ។ ក្រោយពីបានធ្វើដំណើរតាមកម្មវិធីរបស់ក្រុមហ៊ុនរួចមកក្រុមភ្ញៀវបានធ្វើដំណើរចុះពីភ្នំគូលែនត្រឡប់មកវិញតាមផ្លូវ ថ្មីភូមិពេញឃុំខ្នងភ្នំស្រុកស្វាយលើខេត្តសៀមរាប ។ លុះមកដល់កន្លែងកើតហេតុក៏បានជួបឧប្បត្តិហេតុក្រឡាប់ឡានចុះមកក្រោមបណ្តាលឲ្យ ស្លាប់និងរបួសអ្នកដំណើរជាច្រើននាក់ ។ តាមការសន្និដ្ឋានរបស់សមត្ថកិច្ចជំនាញគឺមូលហេតុនៃគ្រោះថ្នាក់ចរាចរណ៍នេះបណ្តាលមកពីការធ្វេសប្រហែសរបស់អ្នកបើកបររថយន្ត សាំយ៉ុង ។
សូមរំលឹកថា ថ្ងៃទី២៤ខែកក្កដាឆ្នាំ២០១៩ អាជ្ញាធរជាតិអប្សរា បានចេញសេចក្ដីជូនដំណឹងមួយស្ដីពីការបិទចរាចរទាំងស្រុងលើផ្លូវថ្មីនេះរហូតដល់ស្ថាបនារួចរាល់ជាស្ថាពរ ។
ការសម្រេចបិទផ្លូវជាបណ្ដោះអាសន្ន នេះ គឺបន្ទាប់ពី ក្រុមការងារបច្ចេកទេសចម្រុះ បានឯកភាពគ្នា ដែលមានសមាសភាពមកពីសាលាខេត្តសៀមរាប មន្ទីរសាធារណការនិងដឹកជញ្ជូនខេត្តសៀមរាប មន្ទីរបរិស្ថានខេត្តសៀមរាប មន្ទីរទេសចរណ៍ខេត្តសៀមរាប នាយកដ្ឋានទ្រទ្រង់បច្ចេកទេស គម្រោងអន្តរវិស័យអាជ្ញាធរជាតិអប្សរា និង អាជ្ញាធរស្រុកស្វាយលើ។
បើយោងតាមសេចក្តីជូនដំណឹងបានបញ្ជាក់ថា បន្ទាប់ពីសង្កេតឃើញថាមានផ្នែកមួយចំនួននៃផ្លូវមិនទាន់មានសុវត្ថិភាព ក្នុងការធ្វើចរាចរណ៍នៅឡើយ។ ក្នុងនោះមានទីតាំងមួយចំនួននៅមានគ្រាប់គ្រួសដែលអាចបណ្ដាលឲ្យរថយន្ត ក្នុងស្ថានភាពចុះចំណោទងាយរអិលចំណុច បត់កោងមួយចំនួនទៀតមានសភាពតូចចង្អៀតនិងមិនទាន់ បានធ្វើជម្រាលសុវត្ថភាពត្រឹមត្រូវនៅឡើយជាដើម។ល។ ទើបសម្រេចផ្អាកបិទផ្លូវនេះជាបណ្ដោះអាសន្នសិន ។
គួបញ្ជាក់ដែរថា កំណាត់ផ្លូវខាងលើគឺកសាងដោយក្រុមហ៊ុន ទ្រី ភាពគ្រុប ដែលតភ្ជាប់ពីស្រុកស្វាយលើ ឡើងទៅដល់ខ្នងភ្នំគូលែន ដោយឆ្លងកាត់ផ្លូវបត់បែនច្រើនកន្លែង ដែលមិនទាន់រៀបរយជាហេតុនាំ ឱ្យងាយគ្រោះថ្នាក់ចរាចរបំផុត ។
គួររំលឹកដែរថា កាលពីថ្ងៃទី១៥ខែកក្កដាឆ្នាំ២០១៩ មានរថយន្តដឹកអ្នកដំណើរ មួយគ្រឿងបានក្រឡាប់ជាច្រើនត្រឡប់បណ្តាលឱ្យប្រជាពលរដ្ឋ រងរបួសធ្ងន់និង ស្រាល ចំនួន១២នាក់។ ដូចគ្នានេះដែរ កាលពីថ្ងៃទី២១ ខែកក្កដាឆ្នាំ២០១៩ នេះក៏ មានរថយន្តមួយគ្រឿងទៀត
ដឹកភ្ញៀវបរទេសជនជាតិចិនធ្វើដំណើរចុះពីលើភ្នំគូលែន បានក្រឡាប់ជាច្រើនត្រឡប់ផងដែរ បណ្តាលឱ្យជនជាតិចិន ចំនួន២នាក់បានស្លាប់ និង១១នាក់ទៀតបានរងរបួសធ្ងន់និងស្រាលព្រមៗគ្នា ដោយមើលឃើញថាស្ថានភាពផ្លូវមិនទាន់មានសុវត្តិភាពបែបនេះហើយទើបអាជ្ញាធរក៏ដូចមន្ដ្រីពាក់ព័ន្ធសម្រេចផ្អាកមិនឲ្យធ្វើចរាចរជាបណ្ដោះអាសន្នសិនរងចាំរួចរាល់ជាស្ថាពរទើបបើកឲ្យដំណើរការវិញ ៕
