មន្ត្រីជាន់ខ្ពស់រដ្ឋាភិបាលបានអំពាវនាវឲ្យប្រជាពលរដ្ឋមានការប្រុងប្រយ័ត្នចំពោះការប្រើប្រាស់ផលិតផលថែរក្សាសុខភាពខណៈបច្ចុប្បន្នផលិតផលទាំងនេះកំពុងផ្សព្វផ្សាយនិងដាក់លក់យ៉ាងព្រោងព្រាត់នៅលើទីផ្សារ។
ថ្លែងនៅក្នុងពិធីបើកសម្ពោធក្រុមហ៊ុនខូរៀនរ៉ូយ៉ាល់ហ៊ែល&ប៊ីយូធីសេនធ័រ កាលពីព្រឹកថ្ងៃទី២៩ខែវិច្ឆិកា ឆ្នាំ២០១៩ លោក ង៉ែត វ៉ាន់ធួក ទីប្រឹក្សាផ្ទាល់សម្តេចក្រឡាហោមស ខេង និងជាអនុរដ្ឋលេខាធិការក្រសួងមហាផ្ទៃបានលើកទឹកចិត្តឲ្យពលរដ្ឋត្រូវប្រើប្រាស់ផលិតផលថែរក្សាសុខភាពទាំងឡាយណា ដែលមានចុះបញ្ជិកាត្រឹមត្រូវពីក្រ សួងស្ថាប័នពាក់ព័ន្ធដើម្បីជៀសវាងនូវផលិតផលក្លែងក្លាយ ឬ គ្មានគុណភាព ឬ ផលិតផលហាមឃាត់ដែលអាចធ្វើឲ្យមានគ្រោះថ្នាក់ដល់អាយុជីវិត។
លោកបានមានប្រសាសន៍ថា ការប្រើប្រាស់ផលិតផលដែលមានគុណភាព និងសុវត្ថិភាពនឹងជួយលើកកម្ពស់ក្នុងការថែរក្សាសុខភាពក៏ដូចជាថែរក្សាសម្រស់ដល់ប្រជាពលរដ្ឋបានល្អប្រសើរ។
លោកបានបន្តថា កន្លងមកនេះ បើទោះជាក្រសួងស្ថាប័នពាក់ព័ន្ធមានយន្តការ ការពារទប់ស្កាត់យ៉ាងណា ក៏មានជនឱកាសនិយមមួយចំនួន បានលួចលាក់លក់នូវផលិតផល ថែរក្សាសុខភាពដោយគ្មានការអនុញ្ញាតបណ្តាលឲ្យមានផលប៉ះពាល់ ដល់សុខភាពអ្នកប្រើប្រាស់និងរហូតមានដល់បាត់បង់ជីវិតផងដែរ។
លោក សុខ សំណាង ប្រធានក្រុមប្រឹក្សាភិបាលក្រុមហ៊ុនខូរៀនរ៉ូយ៉ាល់ហ៊ែល&ប៊ីយូធីសេនធ័របានមានប្រសាសន៍ថា ផលិតយ៉ិនសិនក្រហមកូរ៉េ ម៉ាកអាឈីមម៉ាដាំងនេះ អាចព្យាបាលជំងឺបានច្រើនប្រភេទ ដែលជួយលើកកម្ពស់ដល់សុខុមាលភាពរបស់ប្រជាពលរដ្ឋឲ្យបានកាន់តែល្អប្រសើរឡើងថែមទៀត។
លោក ម៉ម ប៊ុននាង អ្នកនាំពាក្យនិងជាប្រធានគណៈកម្មាការអង្កេតបោសសំអាតនិងប្រឆាំងអំពើពុករលួយដែលបានចូលរួមក្នុងពិធីសម្ពោធនាឱកាសនោះបានសន្យាថានឹងខិតខំជំរុញការអនុវត្តច្បាប់ឲ្យកាន់តែមានប្រសិទ្ធភាពខ្ពស់ ថែមទៀតដើម្បីទប់ស្កាត់ការប្រើប្រាស់ផលិតផលក្លែងក្លាយឲ្យកាន់តែមានប្រសិទ្ធភាពថែមទៀត។
យ៉ាងណាក៏ដោយ លោកម៉ម ប៊ុននាង បានជំរុញឲ្យប្រជាពលរដ្ឋមុននឹងប្រើប្រាស់ផលិតផលអ្វីមួយត្រូវត្រួតពិនិត្យមើលពីប្រភពផលិតផលនោះក៏ដូចជាច្បាប់អនុញ្ញាតប្រើប្រាស់ឲ្យបានច្បាស់លាស់ដើម្បីជៀសវាងកុំឲ្យចំណាយពេលវេលានិងថវិកាដោយឥតប្រយោជន៍ពិសេសការពារកុំឲ្យប៉ះពាល់ដល់សុខភាព ឬ អាយុជីវិតផងដែរ។
គួរបញ្ជាក់ថា បច្ចុប្បន្ននេះមានផលិតផលថែរក្សាសម្ផស្សនិងសម្រស់យ៉ាងច្រើនបាននាំចូលនិងលក់យ៉ាងព្រោងព្រាត់នៅលើទីផ្សារប្រទេសកម្ពុជាពិសេសផ្សព្វផ្សាយនៅតាមបណ្តាញសង្គមហ្វេប៊ុកដែលមានផលិតផលខ្លះបានធ្វើការផ្សព្វផ្សាយភូតកុហកបោកប្រាស់ថា ផលិតផលរបស់ខ្លួនអាចព្យាបាលជំងឺបានរាប់រយមុខដែលធ្វើឲ្យប្រជាពលរដ្ឋមានការយល់ច្រឡំជឿនិងទុកចិត្តទិញប្រើប្រាស់បង្កឲ្យមានបញ្ហាដល់សុខភាពនិងគ្រោះថ្នាក់ដល់អាយុជីវិត៕
អត្ថបទ៖ កម្ពុជាថ្មី
