ស្ត្រីជាម្ដាយ ម្នាក់ ចង់ឲ្យកូនរៀបការតាមប្រពៃណី កុំឲ្យអ្នកស្រុកអ្នកភូមពេបជ្រាយ តែមិននឹកស្មានថា ត្រូវកូនបង្កើត និងបង្កើតប្រសា ដែលចុះអេតាស៊ីវិលជាមួយគ្នាមិនទាន់រៀបការ ឲ្យលុយ១ម៉ឺនដុល្លារ ដើម្បីកុំឲ្យគាត់មករកពួកគេទៀត ទើបគាត់ហួសចិត្ត ដេកននៀលដីយំស្រែករៀបរាប់រឿងនេះតែម្ដង។
ហេតុការណ៍នេះ បង្កការភ្ញាក់ផ្អើលដល់សមត្ថកិច្ច កាលពីវេលាម៉ោង៩និង១០នាទីយប់ ថ្ងៃទី៣ ខែធ្នូ ឆ្នាំ២០១៩ ក្នុងបុរីធូលន ស្ថិតក្នុងភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ស្ត្រីជាម្ដាយ ឈ្មោះ នាង ពៅ អាយុ៥០ឆ្នាំ បាននិយាយទាំងហួសចិត្តថា រូបគាត់រស់នៅខេត្តកោះកុង ចំណែកកូនស្រីមានឈ្មោះ អ៊ុក ស្រីម៉ា អាយុ២០ឆ្នាំ មុខរបរជាអ្នកលក់ឡេ រស់នៅជាមួយប្តីឈ្មោះ ឃាង ឆាយអៀង មុខរបរជាមេធាវី។
តាមប្រភពព័ត៌មានពីស្ត្រីជាម្តាយឲ្យដឹងថា កូនស្រីរបស់គាត់បានភ្ជាប់ពាក្យតាំងពីឆ្នាំ២០១៧ មកម្ល៉េះ ដោយកូនប្រសារបស់គាត់បានសន្យាថា នឹងរៀបការនៅឆ្នាំ២០២០។ ស្ត្រីជាម្តាយបានអះអាងថា ពេលដែលភ្ជាប់ពាក្យនោះ កូនស្រីរបស់គាត់មានអាយុទើបតែ១៧ឆ្នាំប៉ុណ្ណោះ ប៉ុន្តែកូនប្រសាប្រុសបាននាំកូនគាត់ទៅចុះអេតាស៊ីវិល និងបានសុំកូនស្រីរបស់គាត់ទៅរស់នៅជាមួយ ដើម្បីរកស៊ីមួយរយៈពេលសិន។ បន្ទាប់ពីមករស់នៅជាមួយប្តី, កូនស្រី គាត់ហាក់ដូចជាបានផ្តាច់ទំនាក់ទំនងរវាងកូន និងម្តាយ ពេលទាក់ទងតាមទូរស័ព្ទ ជួនលើក ជួនមិនលើក។
ប្រភពដដែលបានបន្តទៀតថា បន្ទាប់ពីភ្ជាប់ពាក្យមកមានរយៈពេលជិត៣ឆ្នាំមកហើយ និងជិតដល់ឆ្នាំកំណត់រៀបការទៀតផង ទើបគាត់ទូរស័ព្ទសួរកូនស្រីរឿងរៀបការ តែកូនស្រីប្រាប់ថា គេទើបនឹងទិញផ្ទះ ហើយទិញរថយន្តអស់លុយហើយ។ ស្ត្រីជាម្តាយបាននិយាយថា គាត់ខ្មាសអ្នកស្រុកណាស់កូនគេភ្ជាប់ពាក្យ ក្រោយកូនគាត់ផងគេរៀបការអស់ហើយ ទើបគាត់សម្រេចចិត្តធ្វើដំណើរពីស្រុកកំណើត មកជាមួយម្តាយចាស់ម្នាក់ទៀត មករកកូនស្រីដល់ផ្ទះនៅភ្នំពេញ ដោយមានអ្នករួមការងារជាមួយកូនបាននាំគាត់មកដល់ផ្ទះ។
ពេលមកដល់ឃើញកូនមានផ្ទះធំទ្រនំខ្ពស់ មានរថយន្តទំនើបជិះ គាត់មិនហ៊ានចូលផ្ទះកូនទេ ពេលនោះកូនទាំង២ពីររបស់គាត់ បានហៅគាត់ចូលក្នុងផ្ទះ តែគាត់មិនហ៊ានចូលទេ គាត់បានសួរនាំរឿងរៀបការ ស្រាប់តែកូនប្រសាបានប្រើពាក្យមិនសមរម្យទៅលើគាត់ ហើយឲ្យលុយមួយ១ម៉ឺនដុល្លារ ដើម្បីកុំឲ្យគាត់មករកកូនទៀត ដោយបោះសម្ដីថា “មកនឹងមករកតែលុយ ហើយចោទគាត់ថា ជាម្ដាយមុខលុយ “។ ពាក្យទាំងនេះ ធ្វើឲ្យគាត់ខឹង គាត់បានជេរទៅកូនបង្កើតនិងកូនប្រសាវិញ រហូតឈ្លោះប្រកែកគ្នាទៅវិញទៅមក ដោយសារគាត់ខឹងចិត្តពេកបានដេកននៀលដីយំស្រែករៀបរាប់នៅមុខផ្ទះកូន ក៏ត្រូវកូនប្រសាដែលជាមេធាវី ទូរស័ព្ទប្តឹងសមត្ថកិច្ចឲ្យមកជួយអន្តរាគមន៍ភ្លាមៗផងដែរ និងបម្រុងឲ្យប៉ូលិសចាប់គាត់ទៀតផង។
ពាក់ព័ន្ធនឹងករណីនេះ ភ្នាក់ងារកាសែតកម្ពុជាថ្មី មិនអាចសុំការបកស្រាយពីភាគីកូនប្រសា និងកូនបង្កើតពីរនាក់នោះបានឡើយ ដោយសារគ្មានលេខទូរស័ព្ទ។ អង្គភាពយើងរង់ចាំបកស្រាយជានិច្ច៕
អត្ថបទ៖ កម្ពុជាថ្មី
