ប៉ុស្តិ៍នគរបាលរដ្ឋបាលព្រែកលៀប ខណ្ឌជ្រោយចង្វា តម្លៃជិត២លានដុល្លារ ត្រូវបានគេក្រុមហ៊ុន ឡុង ម៉ា អ៊ិនវេសអេន រៀល អ៊ីស្ទេច រត់ការទិញយកបាត់ទៀតហើយ និង បានដេញមន្រ្តីនគរបាលចេញពីទីតាំងនោះ ទៅរកទីតាំងថ្មីផងដែរ។
ប្រភពព័ត៌មានច្បាស់ការណ៍មួយ បង្ហើបប្រាប់ CPC NEWS នៅថ្ងៃទី៥ ខែធ្នូ នេះ ថា ដីស្នាក់ការនគរបាលប៉ុស្តិ៍ព្រែកលៀប មានក្បាលដីទំហំប្រមាណ២៨ម៉ែត្រ គុណនឹង៣០ម៉ែត្រ ព្រមទាំងចំណីទន្លេមេគង្គជាច្រើនម៉ែត្រទៀត ស្ថិតនៅស្រមតាមមាត់ទន្លេមេង្គក្នុងភូមិ ព្រែកលៀប សង្កាត់ព្រែកលៀប ។
ដំណឹងនៃការលក់នេះ ធ្វើអោយមានការភ្ញាក់ផ្អើលដល់មន្រ្តីនគរបាលប៉ុស្តិ៍ បន្ទាប់ពីក្រុមហ៊ុនយកឯកសារដោះដូរមកបង្ហាញព្រមទាំងចរចារ ជាមួយប្រជាលរដ្ឋមួយគ្រួសារ ដែលបានរស់នៅស្នាក់ការប៉ុស្តិ៍ នេះ ទៅនៅជាមណ្ឌលសុខភាពស្រុកមុខកំពូល អោយចាកចេញជាថ្នូរនឹងប្រាក់៤ម៉ឺនដុល្លារ ។
ក្រុមហ៊ុន ដែលមានភ័ព្វសំណាង នេះ គឺ ក្រុមហ៊ុនឡុង ម៉ា អ៊ិនវេសអេន រៀល អ៊ីស្ទេច ដែលគេអះអាងថា ជាក្រុមហ៊ុនមួយដែលមានខ្សែពួរធំៗ ។នៅក្នុងការដូរស្នាក់ការប៉ុស្តិ៍ នេះ ត្រូវក្រុមហ៊ុន នោះបានរត់ការរួចហើយ និងបានទិញផ្ទះ មួយល្វែង ដែលមានកម្ពស់៣ជាន់ តម្លៃប្រមាណជាង១០ម៉ឺនដុល្លារតែ ។
ការលក់ស្នាក់ការប៉ុស្តិ៍នគរបាលរដ្ឋបាលព្រែកលៀបនេះ ធ្វើអោយមន្រ្តីនគរបាលប៉ុស្តិ៍ មានប្រតិកម្មផងដែរតែហាក់មិនហ៊ានចេញស្តី ព្រោះបើមិនមានភ្លើងខៀវពីមេៗឬថ្នាក់ក្រសួងនោះទេប្រហែលជាមិនអាចទៅរួចនោះទេ ។តាមព័ត៌មាន បានអោយដឹងថា ដីប៉ុស្តិ៍ចាស់នេះ គឺ មានតម្លៃប្រមាណជិត២លានដុល្លារ ឯណោះ ។
តាមលិខិតស្នើសុំរបស់ក្រុមហ៊ុនឡុង ម៉ា អ៊ិនវេសអេន រៀល អ៊ីស្ទេច បានអោយដឹងថា ទីតាំងស្នាក់ការប៉ុស្តិ៍ ព្រែកលៀប បានសភាពចាស់ទ្រុឌទ្រោម ពុកផុយ តូចចង្អៀត ហើយមានប្រជាពលរដ្ឋ មួយគ្រួសារ រស់នៅក្នុងទីតាំងប៉ុស្តិ៍ នេះផងដែរ ។
ម្យ៉ាងទៀត ក្រុមហ៊ុនមានបំណងចូលរួមចំណែកអភិវឌ្ឍន៍ កែលំអរ សោភ័ណភាពទីក្រុង អោយស្រស់បំព្រង់ស្រមតាមយុទ្ធសាស្រ្តចតុកោណក្រោមការដឹកនាំប្រកបដោយគតិបណ្ឌិតដ៏ខ្ពស់ខ្ពស់របស់សម្តេច អគ្គមហាសេនាបតីតេជោហ៊ុន សែន ។
នៅក្នុងលិខិត នេះ ក៏បានអោយដឹងទៀតថា នៅក្នុងការដោះដូរ ទីតាំងប៉ុស្តិ៍ជាថ្នូរផ្ទះល្វែមួយល្វែង ដែលមានទំហំ ៤,១០ម៉ែត្រ គុណ១៦ ម៉ែត្រកំពស់៣ជាន់ (E0 E1 E2) ដែលស្ថិតនៅ សង្កាត់ព្រែកលៀប ខណ្ឌជ្រោយចង្វារ និងដោះស្រាយ គោលនយោបាយជូនគ្រួសារដែលរស់នៅប៉ុស្តិ៍ព្រែកលៀបចំនួន៤ម៉ឺនដុល្លារ ព្រមទាំងរៀបចំបណ្តាញទឹកភ្លើង និងបំពាក់សម្ភារះតុទូ កៅអីសម្រាប់ដាក់ឯកសារជូនជាថ្នូរវិញ ។នៅក្នុងលិខិតនោះ ត្រូវបានគេរិះគន់ថា អភិវឌ្ឍន៍មែន ពីដីធំទូលាយមកផ្ទះល្វែងសល់លុយចែកគ្នា ។
ជុំវិញបញ្ហានេះ លោកវរៈសេនីយ៍ឯក សៀម សុត្ថាវុធ អធិការនគរបាលខណ្ឌជ្រោយចង្វា រ បានអោយដឹងថា ការដោះដូរស្នាក់ការប៉ុស្តិ៍នគរបាលរដ្ឋបាលព្រែកលៀបនេះ លោកបានឃើញឯកសារ និងស ជ ណ ប្រគល់អោយក្រុមហ៊ុនមួយ តែពុំទាន់ដឹងថាស្នាក់ការថ្មីនៅកន្លែងណាមួយពិតប្រាកដឡើយ ៕
អត្ថបទ៖ CPC
