សពបុរសម្នាក់ ត្រូវបានស្ត្រីជាប្រពន្ធប្រាប់ថា កាលពីព្រលប់ពួកគាត់បាននាំគ្នាផឹកស៊ីអស់ស្រាបៀរ១កេសកន្លះ ក្រោយមកនាំគ្នាចូលដេកលង់លក់បាត់ស្ងាត់ឈឹង លុះព្រឹកឡើងដាស់មិនភ្ញាក់ហៅមិនក្រោក ដល់ទៅអង្រួនមើលទើបដឹងថា ស្លាប់រឹងបាត់ទៅហើយ មិនដឹងជាស្លាប់តាំងពីពេលណានោះទេ បង្កឲ្យមានការភ្ញាក់ផ្អើលដល់អ្នកជិតខាងហៅប៉ូលិសជំនាញមកពិនិត្យ បញ្ជាក់ថា ជនរងគ្រោះស្លាប់ដោយសារគាំងបេះដូង។
ករណីនេះ ត្រូវបានដឹងថា ជនរងគ្រោះបានស្លាប់កាលពីវេលាម៉ោង៦និង៣០នាទីព្រឹក ថ្ងៃទី០៦ ខែធ្នូ ឆ្នាំ២០១៩ នៅបន្ទប់ជួលលេខ៧ ក្រុម៣ ភូមិថ្មគោល២ សង្កាត់ចោមចៅ៣ ខណ្ឌពោធិ៍សែនជ័យ។
សពមានឈ្មោះ សន សំបូរ ភេទប្រុស អាយុ៣៤ឆ្នាំ មុខរបរដឹកទឹកសុទ្ធលក់ មានស្រុកកំណើត ភូមិអូរម៉ាល់ ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង មានប្រពន្ធឈ្មោះ ពុំ សឹម អាយុ២៧ឆ្នាំ មុខរបរកម្មការិនីរោងចក្រ មានស្រុកកំណើតភូមិល្វាស ឃុំល្វាសរ ស្រុកល្វាឯម ខេត្តកណ្តាល និងមានកូនស្រីម្នាក់ រស់នៅជាមួយជីដូន នៅឯស្រុកល្វាឯម។ ប្តី-ប្រពន្ធទាំង២នាក់ ស្នាក់អាស្រ័យនៅបន្ទប់ជួលកន្លែងកើតហេតុខាងលើ។
តាមការបំភ្លឺពីស្ត្រីជាភរិយារបស់សព នៅចំពោះមុខសមត្ថកិច្ចបានឲ្យដឹងថា កាលពីល្ងាចថ្ងៃទី០៥ ប្តីរបស់គាត់ ក្រោយវិលមកពីលក់ទឹកសុទ្ធវិញ បានជួបជុំគ្នាជាមួយបងប្អូន អ្នកជិតខាងចំនួន៤នាក់ ទិញស្រាបៀរ១កេសកន្លះ មកហូប រហូតដល់វេលាម៉ោង៩និង៣០នាទីយប់ ទើបផឹកអស់ ក៏ចែកផ្លូវគ្នាចូលសម្រាករៀងៗខ្លួន។
ប្រភពបន្ដថា ប្តីរបស់គាត់ ក្រោយឈប់ហូបស្រា បានហូបបាយ រួចក៏ចូលដេកសម្រាកដែរ លង់លក់រហូត ទាំងមិនចាប់អារម្មណ៍អាកាសធាតុ ត្រជាក់ ធ្លាក់ត្រសៀក ហើយអ្វីដែលមិននឹកស្មានដល់ ស្រាប់តែនៅវេលាម៉ោង៦និង៣០នាទីព្រឹក ថ្ងៃទី០៦ធ្នូនេះ ខណៈក្រោកពីដំណេក នាងងើបស្លៀកពាក់រៀបចំចេញទៅធ្វើការដាស់ប្តី មិនកម្រើក ពិនិត្យជាក់ស្ដែង ទើបដឹងថា ប្តីស្លាប់បាត់ទៅហើយ មិនដឹងតាំងពីពេលណា នាំគ្នាឆោឡោ ផ្អើលអ្នកជិតខាង សាច់ញាតិ បន្ទប់ក្បែរខាង នឹកអាណិត ស្រណោះរកសឹងតែមិនជឿ ថាមានរឿងសោកសៅបែបនេះ សម្រាប់គ្រួសារ និងបានរាយការណ៍ទៅសមត្ថកិច្ចចុះទៅពិនិត្យជាក់ស្តែង នៅកន្លែងកើតហេតុ។
សាកសព ក្រោយពីនគរបាលជំនាញ ពិនិត្យ កោសល្យវិច័យ ឃើញថា ស្លាប់ដោយគាំងបេះដូង រួចប្រគល់ជូនក្រុមគ្រួសារចាត់ចែងដឹកយកទៅធ្វើបុណ្យតាមប្រពៃណីនៅឯស្រុកល្វាឯម៕
អត្ថបទ៖ កម្ពុជាថ្មី
