ព្រះទេវសត្ថា ពឿយ មេត្តា តំណាងគណៈសង្ឃនាយក និងជាប្រធានសមាគមសមណនិស្សិតកម្ពុជា ព្រះចៅអធិការវត្តខ្មែរទាំង៨ នៅដែនដីពុទ្ធភូមិ បានធ្វើសន្និសីទសារព័ត៌មាន ផ្សព្វផ្សាយពីព្រឹត្តិការណ៍បុណ្យមួយចំនួន ដើម្បីឱ្យពុទ្ធបរិស័ទបានជ្រាបនិងអាចចាប់មគ្គផលតាមសទ្ធាជ្រះថ្លា នៅព្រឹកថ្ងៃទី៩ ខែធ្នូ នេះ ស្ថិតនៅវត្តព្រះមេត្តាពោធិវង្ស ក្នុងភូមិកោះអណ្តែត សង្កាត់ទួលសង្កែ២ ខណ្ឌឬស្សីកែវ ។
នៅក្នុងសន្និសីទ ព្រះទេវសត្ថា ពឿយ មេត្តា មានថេរៈដីកាឱ្យដឹងថា វត្តខ្មែរពុទ្ធគយា នៅដែនដីពុទ្ធភូមិ ដែលមានតម្លៃជាង ៧៥ម៉ឺនដុល្លារ គ្រោងធ្វើពិធីឆ្លងមហាកុដិនៅថ្ងៃទី២៥-២៦-២៧ ខែកុម្ភៈ ឆ្នាំ២០២០ ខាងមុខនេះ បន្ទាប់ពីសាងសង់រួចកាលពីកំឡុងឆ្នាំ២០១៤- ២០១៥ ។
ព្រះតេជគុណ បន្តថា មហាកុដិនេះមានកម្ពស់ ៣ជាន់ មានបន្ទប់ចំនួន ៥១បន្ទប់ សម្រាប់ទទួលស្វាគមន៍ពុទ្ធបរិស័ទទៅស្នាក់អាស្រ័យចន្លោះពី ៤៨០នាក់ ទៅ ៥០០នាក់ ដោយចំណាយថវិកាសាងសង់រហូតដល់ជាង ៧៥ម៉ឺនដុល្លារអាមេរិក ។
ជាមួយគ្នានេះ វត្តខ្មែរលុមពនី ដែលជាទីស្ថានព្រះសម្មាសម្ពុទ្ធទ្រង់ប្រសូត្រ គឺចាប់ផ្តើមគម្រោងស្ថាបនាព្រះសត្យមុនីចេតីយក្នុងទម្រង់រចនាបទខ្មែរ ដែលមានកម្ពស់៣៥ម៉ែត្រ ចំណាយថវិកាចន្លោះពី ៦០ម៉ឺន ទៅ ៧០ម៉ឺនដុល្លារអាមេរិក ។
បច្ចុប្បន្ន ព្រះសត្យមុនីចេតីយ សាងសង់បានប្រមាណជា ៦០ភាគរយហើយ ដោយគ្រោងនឹងបញ្ចប់ជាស្ថាពរនៅពេលឆាប់ៗខាងមុខនេះ ។ ចំពោះការសាងសង់ព្រះសត្យមុនីចេតីយនេះ ព្រះតេជគុណ បញ្ជាក់ថា នៅខ្វះថវិកាប្រមាណជាង ៥០ម៉ឺនដុល្លារអាមេរិកផងដែរ ។
បន្ថែមពីនេះ គឺគម្រោងតម្លើងព្រះសុវណ្ណកោដ្ឋចំនួន ១០៨តម្លឹង ដើម្បីតម្កល់ព្រះសិរីរឹកធាតុព្រះសមា្មសម្ពុទ្ធបរមគ្រូនៃយើង ។ គម្រោងនេះ បើតាមការបញ្ជាក់គឺមានការចូលរួមចំនួន ៨០តម្លឹងហើយ នៅខ្វះចំនួនជិត ៣០តម្លឹងទៀត និគ្រោងឆ្លងនៅឆ្នាំ២០២១ខាងមុខនេះ ។
គួរជម្រាបថា ក្រៅពីគម្រោងកសាងសមិទ្ធិផ្សេងៗ ក៏នៅមានកម្មវិធីធម្មយាត្រាស្វែងបុណ្យទៅកាន់ដែនដីពុទ្ធភូមិ ដើម្បីទៅថ្វាយបង្គំព្រះសម្មាសម្ពុទ្ធ និងតំបន់ព្រៃហេមពាន្វ ក្នុងបំណងបង្កើនផល្លានិសង្ឃសម្រាប់បច្ចុប្បន្នជាតិនិងអនាគតជាតិ ។ កម្មវិធីធម្មយាត្រាមានរយៈពេលពី ១៨ ទៅ ២០ថ្ងៃ ដោយក្នុងម្នាក់ចំណាយខ្ទង់ ១៨០០ដុល្លារអាមេរិក ៕
អត្ថបទ៖ CPC
