ក្រោយចប់ការប្រកួតរវាងក្រុមជម្រើសជាតិអាយុក្រោម ២២ឆ្នាំរបស់កម្ពុជា ជាមួយក្រុមវៀតណាម នៅវគ្គពាក់កណ្តាលផ្តាច់ព្រ័ត្រ នៃព្រឹត្តិការណ៍កីឡាស៊ីហ្គេម លើកទី៣០ នៅទីក្រុងម៉ានីល ប្រទេសហ្វីលីពីន បញ្ចប់ក្នុងលទ្ធផល ៤ទល់នឹង០ ខ្សែប្រយុទ្ធរបស់ក្រុមគោព្រៃកម្ពុជា កែវ សុខផេង ត្រូវបានរងការរិះគន់យ៉ាងខ្លាំងថា ជាប់ខ្សែស្រឡាយវៀតណាម។
ទាក់ទងករណីនេះដែរ ខ្សែប្រយុទ្ធ ចាន់ វឌ្ឍនាកា បានបង្ហោះក្នុងហ្វេសប៊ុកថា “បាល់ទាត់សំខាន់ណាស់គឺកែប្រែកំហុសពីមួយប្រកួតទៅមួយប្រកួត ហើយសំខាន់នោះគឺការលើកទឹកចិត្ត គាត់គឺជាចំណែកមួយក្នុងវិស័យបាល់ទាត់កម្ពុជា គាត់បានពាក់អាវដែលប្រើទង់ជាតិកម្ពុជាខ្ញុំជឿថាបេះដូងគាត់គឺកម្ពុជា កុំបោះបង់សម្លាញ់ត្រូវរឹងមាំ អ្វីដែលត្រូវធ្វើបន្តរទៀតគឺត្រូវនាំកីឡាមួយនេះអោយពិភពលោកបានស្គាល់”។
ដោយឡែក សម្រាប់អ្នកគាំទ្រក្រុមគោព្រៃកម្ពុជាវិញ បង្ហាញអារម្មណ៍មិនសប្បាយចិត្តចំពោះការផ្សាយ និងការរិះគន់ចំពោះខ្សែប្រយុទ្ធ កែវ សុខផេង ផងដែរ។ យ៉ាងណាក៏ដោយ អ្នកគាំទ្រក្រុមកម្ពុជា បានបង្ហាញពីលទ្ធផលដែលខ្សែប្រយុទ្ធរូបនេះបាននឹងកំពុងបានធ្វើក្នុងវិស័យកីឡាបាល់ទាត់នេះ ព្រោះខ្សែប្រយុទ្ធរូបនេះ បានរួមចំណែកយ៉ាងច្រើនក្នុងការបំពេញតួនាទីជាកីឡាបាល់ទាត់កម្ពុជា។
ជាមួយគ្នានេះ អតីតក្រុមជម្រើសជាតិកម្ពុជា និងជាបងប្រុសបង្កើតរបស់ កែវ សុខផេង កីឡាករ កែវ សុខងន បានប្រតិកម្មនឹងការចុះផ្សាយនេះថា “ការពិតនោះគឺ យើងកើតនៅទីនេះ ដូច្នេះកម្ពុជា គឺជាទីកំណើតរបស់យើង។ យើងស្រលាញ់ និងតែងតែចាត់ទុកប្រយោជន៍នៃមាតុភូមិសំខាន់ជាងអ្វីទាំងអស់”។ លោកបន្តថា សូមកុំយកបញ្ហាកូនកាត់មកវាយតម្លៃពួកយើងព្រោះបេះដូងរបស់យើងដឹងច្បាស់ថា យើងកំពុងធ្វើអ្វី ដើម្បីអ្វី ហើយគួរលះបង់បែបណាដើម្បីដែនដីដ៏មានគុណនេះ។
គួររម្លឹកថា ប្រជាជន និងអ្នកគាំទ្រកម្ពុជាយ៉ាងច្រើនកុះករ បានលើកទឹកចិត្តដល់ខ្សែប្រយុទ្ធ កែវ សុខផេង សូមឲ្យមានភាពរឹងមាំ និងបន្តការខិតខំប្រឹងប្រែងបន្ថែមទៀតក្នុងជំនួបដ៏សំខាន់ជាមួយក្រុមមីយ៉ាន់ម៉ា ដើម្បីដណ្តើមមេដាយសំរឹទ្ធ ក្នុងព្រឹត្តិការណ៍កីឡាស៊ីហ្គេមលើកទី៣០ នៅប្រទេសហ្វីពីននេះ៕
អត្ថបទ៖ CPC
