ខណៈបវរកញ្ញាអាហ្វ្រិកខាងត្បូងដណ្តើមបានមកុដកញ្ញាឯកនៅការប្រកួតបវរកញ្ញាចក្រវាលកាលពីថ្ងៃអាទិត្យទី៨ធ្នូ បវរកញ្ញាមីយ៉ាន់ម៉ាបានទម្លាយដំណឹងអំពីខ្លួននាងឱ្យគ្រប់គ្នាបានដឹង។ តាមពិត នាងគឺជាមនុស្សភេទទីបីដំបូងគេបង្អស់ ដែលបានចូលរួមប្រឡងបវរកញ្ញាចក្រវាល។
នាង ស្វេ ស៊ីន ថេត អាយុ២១ ឆ្នាំបានប្រកាសជាសាធារណៈបែបនេះតែប៉ុន្មានថ្ងៃប៉ុណ្ណោះ មុនពេលឡើងឆាកនៅស្ទូឌីយ៉ូថៃល័រភើរីក្នុងទីក្រុងអាត្លង់តា រដ្ឋចចចា កាលពីថ្ងៃទី៨ធ្នូ។
ហើយឥឡូវនេះ នាងបានប្រើប្រាស់វត្តមានរបស់នាងនៅក្នុងការប្រឡងបវរកញ្ញាចក្រវាលដើម្បីជួយដល់សហគមន៍ LGBTQ (ស្រឡាញ់ភេទដូចគ្នា) ជាពិសេសនៅមាតុភូមិមីយ៉ាន់ម៉ារបស់នាង កន្លែងដែលការស្រឡាញ់ភេទដូចគ្នាគឺជាអំពើខុសច្បាប់។
នាងថេត ដែលគ្រងមកុដបវរកញ្ញាមីយ៉ាន់ម៉ាកាលពីថ្ងៃទី៣១ឧសភា លាតត្រដាងថានាងជាមនុស្សស្រីខ្ទើយនៅក្នុងបទសម្ភាសន៍ជាមួយវេបសាយសម្រស់ Missosology គឺមួយសប្តាហ៍មុនពេលការប្រឡងបវរកញ្ញាចក្រវាលផ្តាច់ព្រ័ត្រចូលមកដល់។
នាងបាននិយាយថា “ខ្ញុំបានដឹងអំពីទំនោរផ្លូវភេទរបស់ខ្ញុំជាយូរមកហើយ។ ខ្ញុំបានដឹងថាខ្ញុំគឺស្ថិតក្នុងចំណោមពួកគេ (មនុស្សស្រឡាញ់ភេទដូចគ្នា) តាំងពីឆ្នាំ២០១៥”។
នាងនិយាយថា ការប្រកាសជាសាធារណៈបែបនេះមិនមែនជារឿងងាយស្រួលទេ ប៉ុន្តែនាងចង់ប្រើឱកាសឡើងឆាកបវរកញ្ញាចក្រវាលដើម្បីជួយដល់មនុស្សស្រឡាញ់ភេទដូចគ្នានៅមីយ៉ាន់ម៉ា។
នាងបាននិយាយថា “វាជាការប្រឈមខ្លាំងមែនទែនសម្រាប់ខ្ញុំ ប៉ុន្តែខ្ញុំមានអារម្មណ៍ថាខ្ញុំមានសំឡេងអស្ចារ្យជាងពួកគេនិងស្ថានភាពល្អជាងពួកគេដើម្បីលើកកម្ពស់បុព្វហេតុនេះ។ អ្នកគាំទ្របវរកញ្ញាខ្លះបានដឹងអំពីរឿងនេះ ហើយពួកគេនៅតែគាំទ្ររូបខ្ញុំ ប៉ុន្តែនេះជាលើកដំបូងដែលខ្ញុំអាចនិយាយអំពីរឿងនេះជាសាធារណៈ។ ខ្ញុំជឿថាគ្រប់ប្រទេសទាំងអស់មិនមែនសុទ្ធតែអនុញ្ញាតអាពាហ៍ពិពាហ៍ភេទដូចគ្នានោះទេ។ ខ្ញុំចង់ឱ្យពិភពលោកទទួលយកសហគមន៍ស្រឡាញ់ភេទដូចគ្នានិងសិទ្ធិរបស់ពួកគេក្នុងការជ្រើសរើសវិថីនិងស្វែងរកសុភមង្គលដោយខ្លួនឯង”៕
អត្ថបទ៖ រស្មីកម្ពុជា
