បុរស៣នាក់ឪពុកក្មេកនិងកូនប្រសាបានជួបជុំគ្នាផឹកស៊ីនៅផ្ទះរបស់ខ្លួនដោយចាក់ធុងបាស់កំដរផង លាន់ឮទ្រហឹងពេញភូមិ ធ្វើឱ្យអ្នកជិតខាងម្នាក់ថ្លង់ពេកទ្រាំមិនបាន ក៏ស្រែកជេររហូតផ្ទុះជាជម្លោះឈានដល់អំពើហិង្សា ដោយភាគីឪពុកក្មេកនិងកូនប្រសាបានព្រួតគ្នាវាយទៅលើអ្នកជិតខាងបណ្តាលឱ្យរងរបួសធ្ងន់ ទីបំផុតត្រូវសមត្ថកិច្ចចាប់ក្របួច៣នាក់ឪពុកក្មេកកូនប្រសានាំយកទៅចាត់ការតាមច្បាប់។
ករណីអំពើហិង្សាដោយចេតនាខាងលើនេះ បានកើតឡើងកាលពីវេលាម៉ោង៨និង៤៥នាទីយប់ ថ្ងៃទី០៩ ខែធ្នូ ឆ្នាំ២០១៩ នៅចំណុចភូមិភូមិធំ ឃុំភូមិធំ ស្រុកកៀនស្វាយ។
ជនរងគ្រោះដែលខឹងគេចាក់ធុងបាស់ថ្លង់ពេកស្រែកជេរ រហូតត្រូវគេព្រួតវ៉ៃឱ្យរងរបួសធ្ងន់ មានឈ្មោះហ៊ុ សុភា អាយុ៣២ឆ្នាំ មុខរបរបុគ្គលិកក្រុមហ៊ុន មានលំនៅក្នុងភូមិឃុំកើតហេតុខាងលើ។
ចំណែកក្រុមជនសង្ស័យមានចំនួន៣នាក់ ត្រូវជាឪពុកក្មេកនិងកូនប្រសានឹងគ្នា រួមមាន៖ទី១-ឈ្មោះខន ថុនា ភេទប្រុស អាយុ៣៤ឆ្នាំ មុខរបរចុងភៅ មានលំនៅក្នុងភូមិឃុំកើតហេតុ។ទី២-ឈ្មោះស្រី ម៉ាច ភេទប្រុស អាយុ៥៨ឆ្នាំ មុខរបរកមμករសំណង់ មានលំនៅក្នុងភូមិឃុំកើតហេតុ។និងទី៣-ឈ្មោះស្រី ភារុន ភេទប្រុស អាយុ២៨ឆ្នាំ មុខរបរចុងភៅ មានលំនៅក្នុងភូមិឃុំកើតហេតុ។
តាមប្រភពព័ត៌មានពីសមត្ថកិច្ច បានឱ្យដឹងថា នៅមុនពេលកើតហេតុខាងលើជនរងគ្រោះឈ្មោះហ៊ុ សុភា ឃើញផ្ទះជនសង្ស័យឈ្មោះ ស្រី ម៉ាច ភេទប្រុស មានការផឹកស៊ីហើយបើកឧបករណ៍បំពងសំឡេង (ស្ពិកឃ័រ) ខ្លាំងៗ ធ្វើឱ្យជនរងគ្រោះខឹងក៏បានស្រែកជេរប្រមាថទៅលើជនសង្ស័យឈ្មោះស្រី ម៉ាច ទើបធ្វើឱ្យកើតមានជម្លោះនិងការជេរប្រមាថគ្នាទៅវិញទៅមក រហូតឈានដល់ការវាយប្រតាយប្រតប់គ្នាទៀតផង។
សមត្ថកិច្ចបន្តថា ឃើញដូច្នេះឈ្មោះខន ថុនា ដែលជាកូនប្រសាររបស់ឈ្មោះស្រី ម៉ាច បានរត់ចេញពីក្នុងផ្ទះទាញយកដំបងឈើមូលមកវាយលើជនរងគ្រោះចំនួន៣ដំបង ហើយឈ្មោះស្រី ភារុណ ក៏ស្ទុះទៅព្រួតវាយជនរងគ្រោះឈ្មោះហ៊ុ សុភា បន្ថែមទៀតបណ្តាលឱ្យរងរបួសបែកក្បាលដាច់សាច់រយះខ្នងជាច្រើនកន្លែង។
ក្រោយកើតហេតុ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលភូមិធំ ដើម្បីឱ្យសមត្ថកិច្ចជួយអន្តរាគមន៍។
បន្ទាប់ពីទទួលបានពាក្យបណ្តឹងភ្លាម កម្លាំងប៉ុស្តិ៍នគរបាលរដ្ឋបាលភូមិធំ បានសហការជាមួយកម្លាំងជំនាញនគរបាលយុត្តិធម៌ ចុះទៅដល់កន្លែងកើតហេតុ និងបាននាំខ្លួនជនសង្ស័យទាំង៣នាក់ខាងលើ នាំយកមកប៉ុស្តិ៍ដើម្បីធ្វើការសាកសួរ។
ជនសង្ស័យទាំង៣នាក់ខាងលើ ត្រូវបានសមត្ថកិច្ចរៀបចំកសាងសំណុំរឿងបញ្ជូនទៅចាត់ការតាមនីតិវិធី៕
អត្ថបទ៖ នគរធំ
