អនុវត្តន៍ដីការបស់សាលាដំបូងខេត្តសៀមរាប ដកហូតរថយន្ត Luxus 470១គ្រឿង ពណ៌ស្លែ ស៊េរីឆ្នាំ១៩៩៨ យកទៅរក្សាទុកនៅតុលាការខេត្ត ជាបណ្តោះអាសន្ន រង់ចាំការដោះស្រាយតាមផ្លូវច្បាប់។
ប្រតិបត្តិការនេះ ធ្វើឡើងនៅថ្ងៃទី១២ ខែធ្នូ ឆ្នាំ២០១៩ ស្ថិតនៅហាងលក់ទូរស័ព្ទដៃ យីហោ លាង ហៃ ក្នុងភូមិ តាវៀន សង្កាត់សាលាកំរើក ក្រុងសៀមរាប ក្រោមការដឹកនាំសម្របសម្រួលនីតិវិធីដោយលោក ឡុង សារ៉ាត់ អាជ្ញាសាលានៃសាលាដំបូងខេត្តសៀមរាប ដោយមានការចូលរួមពីសំណាក់អាជ្ញាធរមូលដ្ឋាននិងភាគីទាំងសងខាងចូលរួមផងដែរ។
លោក ឡុង សារ៉ាត់ អាជ្ញាសាលានៃសាលាដំបូងខេត្តសៀមរាប ដែលដឹកនាំប្រតិបត្តិការនេះបានឲ្យដឹងថា ករណីនេះលោកមិនបកស្រាយអ្វីនោះទេ ដោយគ្រាន់តែមកអនុវត្តន៍តាមតែដីកា ប៉ុណ្ណោះ។ចឹងទេ ភាគីទាំងសងខាងមានសិទ្ធិស្វែងរកឯកសារពាក់ព័ន្ធផ្សេងៗយកទៅតទល់គ្នានៅតុលាការ ដើម្បីរកភាពយុត្តិធម៌រៀងៗខ្លួន។
សូមបញ្ជាក់ថា រថយន្តខាងលើនេះ មានម្ចាស់ពីរនាក់ហើយដោយម្ចាស់មុន និងម្ចាស់ក្រោយអះអាងថា សុទ្ធតែមានឯកសារគ្រប់គ្រាន់ដូចៗគ្នា។ ដូច្នេះករណីនេះគេនៅទន្ទឹងរង់ចាំមើលថា តើលទ្ធផលចុងក្រោយនរណាជាម្ចាស់ពិតប្រាកដ ហើយនរណាជាអ្នកក្លែងឯកសារ នោះ៕
អត្ថបទ៖ កម្ពុជាថ្មី
