ឧត្តមសេនីយ៍ឯក ប៊ុន សុភាព អនុប្រធានប្រចាំការ នៃគណៈកម្មការប្រឡង បានបញ្ជាក់ថា សម្រាប់ប្រឡងជ្រើសរើសនាយទាហាន នៅឆ្នាំ២០២០នេះ បេក្ខជន បេក្ខនារី រូបណាប្រព្រឹត្តខុសតាមបញ្ជាផ្ទៃក្នុង របស់គណៈកម្មការប្រឡងនឹងត្រូវដេញចេញពីការប្រឡង ដោយមិនតម្រូវលើកលែងទៀតនោះទេ ខណៈបេក្ខជនប្រឡងសរុបទាំងអស់ជាង៨ពាន់នាក់ក្នុងនោះនារីជាងបីពាន់នាក់។
ការព្រមានទុកជាមុនរបស់ឧត្តមសេនីយ៍ឯក ប៊ុន សុភាព បានធ្វើឡើងនៅថ្ងៃទី១៣ ខែធ្នូ ឆ្នាំ២០១៩នេះ នៅក្នុងឱកាសដែលលោក បានអញ្ជើញជាតំណាងលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក និងជាប្រធានអនុគណៈកម្មការប្រឡង ក្នុងពិធីបូកសរុបលទ្ធផលក្រុមការងារថ្នាក់កណ្តាល ការប្រឡងជ្រើសរើសនាយទាហាន នៃកងយោធពលខេមរភូមិន្ទ ឆ្នាំ២០២០ នៅបញ្ជាការដ្ឋានកងយោធពលខេមរភូមិន្ទ។
មន្ត្រីយោធាកងទ័ពជើងគោករូបនេះ បានបញ្ជាក់បន្ថែមថា «ឱ្យតែចាប់បាន គឺថាមិនគោរពតាមបទបញ្ជាផ្ទៃក្នុង អញ្ចឹងហើយ គឺដេញចេញពីប្រឡង ព្រោះថាបេក្ខជន៨០០០នាក់ជាងដាក់ ប្រឡងម្តងនេះ យើងយកតែ៦២០នាក់ ដូចជាមិនលំបាកក្នុងការជ្រើសរើស នាយទាហានដែលល្អ និងមានសមត្ថភាពគ្រប់គ្រាន់ទៅធ្វើនោះទេ»។
ឯកឧត្តមឧត្តមសេនីយ៍ឯក ប៊ុន សុភាព បានថ្លែងថា ការរឹតបន្តឹងបែបនេះ គឺដើម្បីជ្រើសរើសនាយទាហានបន្តវេន ដែលមានសក្តានុពល និងសមត្ថភាពគ្រប់គ្រាន់ ដើម្បីចូលរួមបម្រើការងារជា នាយទាហានបន្តវេន ក្នុងការចូលរួមលើកស្ទួយកិត្យានុភាពកងយោធពលខេមរភូមិន្ទ។
ឯកឧត្តមបានបន្តថា សម្រាប់ការប្រឡងជ្រើសរើសនាយទាហាន នៅឆ្នាំ២០២០នេះ ប្រធានអគារប្រឡងត្រូវចាត់ចែងឱ្យមានអ្នកតាមដានសិស្សណាដែល ចូលក្នុងបន្ទប់ទឹក រហូតចេញមកវិញ ដើម្បីឆែករកមើលសំណើឯកសារនានា ដែលកូនសិស្សលាក់ទុក ដូច្នេះ សូមឱ្យប្រធានមណ្ឌលប្រឡងនានា ត្រូវត្រួតពិនិត្យនៅក្នុងបន្ទប់ទឹក និងទីតាំងផ្សេងៗទៀត ឱ្យបានម៉ត់ចត់ ដើម្បីការពារនូវបាតុភាពខុសប្រក្រតីលើការប្រឡងរបស់បេក្ខជន ដោយសារតែបេក្ខជនខ្លះគាត់លួចយកសំណើរឯកសារចូលក្នុងបន្ទប់ប្រឡងបាន ដូចកាលពីឆ្នាំមុនៗ ជាដើម។
ជាមួយគ្នានោះ ឧត្តមសេនីយ៍ឯក បានអំពាវនាវដល់គណៈកម្មការមេប្រយោគ ការកែពិន្ទុទាំងអស់ ត្រូវកែសំណើរឯកសាររបស់បេក្ខជន ឱ្យមានសុខក្រឹត្យភាព លើសមត្ថភាពជាក់ស្តែងរបស់បេក្ខជនទាំងអស់ ព្រោះថា កន្លងទៅមានការធ្វេសប្រហែសចំពោះពិន្ទុរបស់បេក្ខជនផងដែរ។
នៅឆ្នាំ២០២០ ខាងមុខនេះ មានបេក្ខជន បេក្ខនារី បានដាក់ពាក្យប្រឡងទូទាំងប្រទេសសរុប ចំនួន៨០៦៣នាក់ (ប្រុស៤៦៧០នាក់/ ស្រី៣៣៣នាក់) ស្មើនឹង ៣២៧បន្ទប់ បើប្រៀបធៀបនឹងឆ្នាំ២០១៩កន្លងមក បេក្ខជនបានដាក់ពាក្យប្រឡងសរុបចំនួន ៨៣៥២នាក់ គឺថយចំនួន ២៨នាក់ ស្មើនឹង ៣,៤៦%៕
អត្ថបទ៖ BTV
