ក្រុមយុវជនចំនួន ៣ នាក់ ដែលមិនមានទោសពៃរ៍អ្វីបន្តិចសោះនោះ ត្រូវបានមេបញ្ជាការកងរាជអាវុធហត្ថ ស្រុកសំឡូត រួមជាមួយនិងកូនចៅ ពួតគ្នាវាយយ៉ាងដំណំ ដោយខ្លះប្រើដៃ ខ្លះប្រើជើងនិងខ្លះទៀតប្រើស្វ័យ AK វាយទៅលើក្បាល ដោយក្នុងនោះមានយុវជនខ្លះត្រូវបានអស់លោកប៉េអឹម ដាក់ខ្នោះជាប់នៅនឹងដៃផងដែរ ដែលបញ្ហានេះត្រូវបានមជ្ឈដ្ឋានជាច្រើនបានរិះគន់ថា វាគឺជាអំពើព្រៃផ្សៃបំផុតព្រមទាំងបានបំពានទៅលើច្បាប់ផងដែរ។
តាមការរៀបរាប់ពីយុវជនម្នាក់ ក្នុងចំណោមពួកគេទាំង៣នាក់ ដែលមានឈ្មោះ ជួន សារ៉ាក់ អាយុ ២៩ ឆ្នាំ រស់នៅភូមិកំពង់ល្ពៅ ឃុំកំពង់ល្ពៅ ស្រុកសំឡូត ជាជនរងគ្រោះបាននិយាយថា ហេតុការណ៍នេះបានកើតឡើង តាំងពីថ្ងៃទី១ ខែធ្នូ ឆ្នាំ២០១៩ វេលាម៉ោង ៣ និង ០៧ នាទី រសៀល ត្រង់ចំណុចអូរ ពល័ក្ខណ៍នៅក្នុងជួរស្ទឹងគ្រញូង ស្ថិតក្នុងភូមិតាសាញ ឃុំតាសាញ ស្រុកសំឡូត។
យុវជនរូបនេះបានបន្តថា នៅពេលនោះគឺខ្លួនកំពុងឈរមើលយុវជន២នាក់ទៀត ដែលគេកំពុងអូសដើមឈើគគីរ មួយដើម ដែលរលើងធ្លាក់ក្នុងស្ទឹងរាប់ឆ្នាំមកហើយ ដែលក្នុងនោះមានឈ្មោះ ចាន់វ៉ិត រស់នៅភូមិ អន្លង់ពួក ឃុំតាសាញ និង ឈ្មោះ ឈួន ឈុនលី រស់នៅភូមិកញ្ចាំង ឃុំស៊ុង។
ពេលនោះស្រាប់តែមានមន្ត្រីប៉េអឹមស្រុកចំនួន ៥ នាក់ប្រដាប់ដោយកាំភ្លើង AK ចំនួន ៣ ដើម ដែលក្នុងនោះគេស្គាល់ ៣ នាក់ មានឈ្មោះ ព្រះ សារ៉ន ឈ្មោះ ស្រួច និងឈ្មោះ ស្កាយ បានចូលទៅចាប់ពួកគេវ៉ៃខ្នោះ ដោយមិនបានសួរនាំអ្វីបន្តិចទាល់តែសោះ គ្រាន់តែនិយាយថាមេបញ្ជាឲ្យមក។ នៅពេលនោះដែរខ្លួន ( ជួន សារ៉ាក់ ) បានរើមិនព្រមឲ្យគេដាក់ខ្នោះឡើយ ដោយសំអាងថា ខ្លួនមិនមានកំហុសទាល់តែសោះ។
នៅក្នុងការប្រកែកនោះហើយ ដែលរូបគេត្រូវបានប៉េអឹមទាំងនោះរោមគ្នាវ៉ៃ ទាត់ ធាក់ ពិសេសគឺគេបានយកស្វ័យកាំភ្លើង AK បុកទៅលើក្បាល បណ្តាលឲ្យហើមប៉ោង និងរងរបួសពេលខ្លួន ហើយឈ្មោះស្កាយ បានឆក់យកទូរស័ព្ទពីខ្លួនទៅបាត់ ដោយឈ្មោះព្រះសារ៉ន និយាយថា យកទុកទៅ វាមិនហ៊ានធ្វើអីយើងទេ បន្ទាប់ពីនោះ ខ្លួនក៏ត្រូវ ធ្លាក់ទៅក្នុងទឹកស្ទឹងគ្រញូង លង់ស្ទើរស្លាប់ ស្ទើររស់ ដោយខ្លួនខំប្រឹងហែលឆ្លងទៅត្រើយម្ខាងដើម្បីគេចខ្លួន ពីអំពើហិង្សាដោយមានស្ថានទម្ងន់នេះ ឯទូរស័ព្ទម៉ាក oppo ដែលមានតម្លៃ ជាង ៣០០ នោះ គឺខ្លួនខំលក់គោអស់មួយក្បាល ទម្រាំទិញបាន។ ក្រោយពីនោះខ្លួនបានទៅសម្រាកព្យាបាលនៅក្នុងមន្ទីរពេទ្យមួយកន្លែង អស់រយៈពេល ៣ ថ្ងៃ ទើបបានធូរស្រាល។
ដោយឡែកយុវជនចំនួន ២ នាក់ទៀត ដែលត្រូវបានប៉េអឹមដាក់ខ្នោះយកទៅកាន់ ទីតាំងប៉េអឹមស្រុកសំឡូតបាននិយាយថា នៅពេលទៅដល់កន្លែងប៉េអឹម គឺឈ្មោះ ជួប ណូ ហៅចូវ ដែលជាមេបញ្ជាការ បានដើរចូលមកក្នុងស្ថានភាពស្រវឹង ( មកពីឡើងផ្ទះគេ ) បានសួរថា អ្ហែងទាញឈើចឹង មានអាខ្មៅឬអត់ ? ( គ្រញូង ) ប៉ុន្តែក្រោយពីឮចម្លើយឆ្លើយថា អត់មានទេ មានតែគគីរមួយដើមដែលលិចនៅបាតស្ទឹងតែប៉ុណ្ណោះ ក៏ស្រាប់តែលោកមេបញ្ជាការរូបនេះ ទាញដបទឹកមកវ៉ៃកណ្តាលក្បាល ថែមទាំងដើរចូលមកធ្វើទារុណកម្ម លើរាងកាយបន្ថែមទៀត ទំាងដៃជាប់ខ្នោះ ដោយសារមានការឈឺចាប់ពេក ខ្លួនក៏បានលើកដៃរងទៅលើក្បាល បណ្តាលឲ្យខ្សែខ្នោះបោកត្រូវក្បាលបែកឈាមតែម្តង។
ទីបំផុត ក្រោយពីរកឈើគ្រញូងដើម្បីផលប្រយោជន៍ផ្ទាល់ខ្លួនមិនបាន លោកមេបញ្ជាការដ៏ឃោរឃៅរូបនេះ បានបញ្ជាឲ្យកូនចៅ ធ្វើការដោះលែងពួកគេឲ្យត្រឡប់ទៅលំនៅឋានវិញ ទាំងគ្មានហេតុផល ថែមទាំងឈឺខ្លួនឥតប្រយោជន៍ផងដែរ ដោយក្នុងនោះដែរក៏មានយុវជនម្នាក់ មានបំណងចង់ដាក់ពាក្យប្តឹង ប៉ុន្តែស្ថិតក្នុងការពិចារណា ដោយសារតែខ្លាចអស់លោកប៉េអឹមមានគំនុំ។
នៅល្ងាចម្សិលមិញនេះ តាមរយៈទូរស័ព្ទ លោក ជួប ណូ មេបញ្ជាការកងរាជអាវុធហត្ថស្រុកសំឡូត បានធ្វើការបដិសេធ ដោយបានអះអាងថា ខ្លួនមិនបានធ្វើទារុណកម្មទៅលើពួកគេនោះឡើយ៕
អត្ថបទ៖ ដើមរាំង
