នេះចាត់ទុកថា ជាសញ្ញាណល្អប្រសើរមួយ ដែលអ្នកសិល្បៈមួយចំនួន ចាប់ផ្តើមបដិសេធមិនថតពាណិជ្ជកម្មគ្រឿងស្រវឹង ដែលសន្មត់ថា ជាការចូលរួមចំណែកមួយ នៃការកាត់បន្ថយបញ្ហាផ្សេងៗក្នុងសង្គម ជាពិសេសនោះ គឺ បញ្ហាគ្រោះថ្នាក់ចរាចរណ៍តែម្តង ។
នាពេលថ្មីៗនេះ មានការរិះគន់យ៉ាងខ្លាំងខ្លាពីសំណាក់មហាជន ទៅលើសិល្បករ សិល្បការិនីជាច្រើន ដែលបានចូលរួមផ្សព្វផ្សាយយ៉ាងគគ្រឹកគគ្រេង ឲ្យផលិតផលគ្រឿងស្រវឹង ដោយពួកគាត់ចាត់ទុកថា ជាការជំរុញឲ្យមានអ្នកសេពគ្រឿងស្រវឹងកាន់តែច្រើន ខណៈគ្រឿងស្រវឹងជាដើមចមនៃអំពើហិង្សា វិបត្តិសុខភាព ភាពក្រីក្រ ពិសេសគ្រោះថ្នាក់ចរាចរណ៍តែម្តង។
ទោះជាយ៉ាងណា ក៏មានអ្នកសិល្បៈមួយចំនួន បានប្រកាន់ជំហរមិនទទួលផ្សព្វផ្សាយគ្រឿងស្រវឹងជាដាច់ខាត បើទោះឲ្យតម្លៃខ្ពស់យ៉ាងណាក៏ដោយ មានដូចជាលោក នី កូ និងកញ្ញា ពេជ្រ ចរណៃ ជាដើម។
កញ្ញា ពេជ្រ ចរណៃ ដែលជាតារាសម្តែង និងជាគ្រូគុនល្បុក្កតោផងដែរនោះ បានថ្លែងប្រាប់ CPC NEWS នៅថ្ងៃទី១៤ ខែធ្នូ នេះ ថា កន្លងមកម្ចាស់ផលិតផលគ្រឿងស្រវឹងមួយចំនួនបានទំនាក់ទំនងមកកញ្ញាដើម្បីថតពាណិជ្ជកម្មគ្រឿងស្រវឹង ដោយហ៊ានឲ្យតម្លៃខ្លួនកញ្ញា គុណនឹង ២០ដង បើធៀបនឹងតម្លៃដែលកញ្ញាបានទទួលពីការថតរឿង ក៏ដូចជាថតពាណិជ្ជកម្មធម្មតា ដែលមិនមែនជាផលិតផលគ្រឿងស្រវឹង។
កញ្ញាបន្តថា ក្នុងអំឡុងពេលដែលកញ្ញាធ្វើជាតារាសម្តែងអស់រយៈពេលជិត ១០ឆ្នាំមកនេះ កញ្ញាបានប្តេជ្ញាចិត្តថា នឹងមិនទទួលថតគ្រឿងស្រវឹងឡើយ បើទោះជាម្ចាស់ផលិតផលគ្រឿងស្រវឹង ហ៊ានឲ្យតម្លៃខ្ពស់យ៉ាងណាក៏ដោយ។
កញ្ញាបន្ថែមថា “គ្រឿងស្រវឹងគឺជាដើមចម នៃអំពើហិង្សាក្នុងគ្រួសារ ការឈ្លោះទាស់ទែងក្នុងវង់ផឹកស៊ី និងធ្វើឲ្យមានការកើនឡើងនៃគ្រោះថ្នាក់ចរាចរណ៍ ដូចនេះក្នុងនាមខ្ញុំជាសិល្បៈមួយរូប ជាមនុស្សរបស់មហាជន ប្រសិនបើខ្ញុំចេញផ្សព្វផ្សាយគ្រឿងស្រវឹង ហាក់បីដូចជាជំរុញអ្នកដែលស្គាល់ និងគាំទ្រខ្ញុំទាំងក្មេងទាំងចាស់ទៅហូបគ្រឿងស្រវឹងយ៉ាងដូច្នេះដែរ ចំណុចនេះហើយដែលធ្វើឲ្យខ្ញុំមិនទទួលថតគ្រឿងស្រវឹងដើម្បីចូលរួមកាត់បន្ថយបញ្ហានេះ”។
ជុំវិញការផ្សព្វផ្សាយ និងការដាក់លក់គ្រឿងស្រវឹងនេះផងដែរ កញ្ញាបានលើកឡើងពីបទពិសោធន៍កញ្ញាដែលធ្លាប់បានចេញទៅក្រៅប្រទេស ដោយកញ្ញាបានអះអាងថា ប្រទេសណាក៏មានលក់គ្រឿងស្រវឹងដែរ គ្រាន់តែមានកម្រិត ដូចជាក្មេងអាយុក្រោម ១៨ឆ្នាំមិនលក់ឲ្យទេ ហើយការលក់ទៀតសោត ត្រូវបានកំណត់ពេលវេលាច្បាស់លាស់ មិនមែនលក់គ្រប់ពេល គ្រប់វេលាឡើយ។
សូមជម្រាបជូនថា សេចក្តីព្រាងច្បាប់ស្តីពី ការត្រួតពិនិត្យផលិតផលគ្រឿងស្រវឹង បានលេចរូបរាងជាច្រើនឆ្នាំមកហើយ ប៉ុន្តែមិនទាន់ត្រូវបានអនុម័តចូលជាធរមាននៅឡើយទេ ប៉ុន្តែប្រសិនបើច្បាប់នេះបានចូលជាធរមាន ដាក់ឲ្យប្រើប្រាស់ជាផ្លូវការ នោះអ្នកដែលអាចទទួលទានគ្រឿងស្រវឹងបាន លុះត្រាតែមានអាយុចាប់ពី ២១ឆ្នាំឡើងទៅ និងហាមប្រាមការលក់គ្រឿងស្រវឹងចន្លោះពីម៉ោង១២យប់ដល់ម៉ោង៦ព្រឹក៕
អត្ថបទ៖ CPC
