អំពូលភ្លើងវៃឆ្លាត ដែលផលិតនៅក្នុងប្រទេសកម្ពុជា គ្រោងនឹងយកទៅបំពាក់នៅប្រទេសជប៉ុនប្រមាណ ២ម៉ឺនអំពូល។នេះបើតាមការលើកឡើងដោយ លោក យូស៊ីហ៊ីដសា កៃណូម៉ា (Yoshihisa Kainuma) ប្រធានក្រុមហ៊ុនមីនីបៀ របស់ប្រទេសជប៉ុន ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីពេលថ្មីៗនេះ។
លោក យូស៊ីហ៊ីដសា កៃណូម៉ាបានលើកឡើងថា កន្លងមកក្រុមហ៊ុនរបស់លោកដែលមានមូលដ្ឋាននៅក្នុងប្រទេសកម្ពុជា បាននាំអំពូលភ្លើងឆ្លាតនេះទៅបំពាក់នៅបរទេស និងនៅប្រទេសជប៉ុន បានប្រមាណ ២ម៉ឺនអំពូលរួចមកហើយ ហើយគ្រោងនឹងបំពាក់បន្ថែមចំនួន ២ម៉ឺនអំពូលទៀត ក្នុងទីក្រុងហ៊ីរ៉ូស៊ីម៉ា ប្រទេសជប៉ុន។
លោកបានបន្ថែមថា អំពូលភ្លើងឆ្លាតនេះ មានគុណភាពល្អកាត់បន្ថយការប្រើប្រាស់ថាមពលអគ្គិសនីបានច្រើន ជួយដល់បរិស្ថានផង ហើយនិងបំភ្លឺភ្លើងតាមផ្លូវសាធារណៈ ឲ្យមានភាពភ្លឺស្មើគ្នាទាំងស្រុងថែមទៀតផង។
សូមជម្រាបថា ក្រុមហ៊ុនមីនីបៀ របស់ប្រទេសជប៉ុនមួយនេះ បានបោះទុនវិនិយោគនៅកម្ពុជាប្រមាណ ៣៧២លានដុល្លារអាមេរិចកាលពីឆ្នាំ២០១៨ ហើយនៅឆ្នាំ២០១៩ទុនវិនិយោគនឹងរីកឡើងទៅរហូតដល់ ៤០០លានដុល្លារអាមេរិក៕
អត្ថបទ៖ CPC
