រយៈពេល 2 ថ្ងៃគឺចាប់ពីថ្ងៃទី 14 ដល់ថ្ងៃទី 15 ខែធ្នូឆ្នាំ 2019នេះ ប្រតិភូថ្នាក់ដឹកនាំទីក្រុងកឹនថឺ នៃសាធារណរដ្ឋសង្គមនិយមវៀតណាមដឹកនាំដោយឯកឧត្តមត្រាន់ គួកជុង សមាជិគគណះកម្មាធិការមជ្ឈឹមបក្សនិងជាលេខាគណៈកម្មាធិការបក្សទីក្រុងកឹនថឺ បានអញ្ជើញមកបំពេញទស្សននៅក្នុងខេត្តកំពង់ឆ្នាំង។
នៅក្នុងដំណើរទស្សនកិច្ចនេះ ប្រតិភូទីក្រុងកឹនថឺ បានទទួលបដិសណ្ឋារកិច្ចយ៉ាងកក់ក្តៅ ប្រកបដោយភាពស្និតស្នាលបំផុតពីសណាក់ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង សមាជិកក្រុមប្រឹក្សាខេត្ត អភិបាលរងខេត្ត ព្រមទាំងថ្នាក់ដឹកនាំមន្ទីរអង្គភាពជុំវិញខេត្តកំពង់ឆ្នាំងផងដែរ។
ក្នុងដំណើរទស្សនកិច្ចរបស់ប្រតិភូទីក្រុងកឹនថឺ នៅលើទឹកដីខេត្តកំពង់ឆ្នាំងពេលរសៀលថ្ងៃទី១៤ ខែធ្នូ ឆ្នាំ២០១៩នេះ គណៈប្រតិភូ បានអញ្ជើញដាក់កម្រងផ្កាគោរពវិញ្ញាក្ខន្ធនៅវិមានឯករាជ្យខេត្តនិងបានបន្តទៅអុជធូបគោរព្វវិញ្ញាក្ខ័ន្ធដល់វីរៈកងទ័ពកម្ពុជា វៀតណាម នៅស្តូបមិត្តភាពកម្ពុជាវៀតណាមផងដែរ។
បន្ទាប់មកគណប្រតិភូទីក្រុងកឹនថឺ ដឹកនាំដោយឯកឧត្តម ត្រាន់ គួកជុង បានបន្តជួបពិភាក្សាការងារជាមួយឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង នៅសាលាខេត្តកំពង់ឆ្នាំងផងដែរ។ ក្នុងជំនួបពិភាក្សាការងារនេះ ភាគីកម្ពុជា និង វៀតណាម បានផ្លាស់ប្តូរនូវបទពិសោធន៍ការងារពីគ្នាទៅវិញទៅមក លើវិស័យអប់រំ វិស័យកសិកម្ម និង សេដ្ឋកិច្ច។
ឯកឧត្តម ឈួរ ច័ន្ទឌឿនបានមានប្រសាសន៍ដោយគូសបញ្ជាក់ថា សម្រាប់ប្រទេសកម្ពុជា និយាយជារួម និងនិយាយដោយឡែករដ្ឋបាលខេត្តកំពង់ឆ្នាំង គឺមានកិច្ចសហប្រតិបត្តិការយ៉ាងល្អ ជាមួយប្រទេសវៀតណាម ទាំងផ្នែករដ្ឋបាល ក៏ដូចជាវិស័យផ្សេងៗទៀត។ ទំនាក់ទំនងនិងកិច្ចសហប្រតិបត្តិការល្អរវាងរដ្ឋបាលខេត្តកំពង់ឆ្នាំង និងភាគី វៀតណាម ជាពិសេសលើការផ្លាស់ប្តូរប្រតិភូធ្វើទស្សនកិច្ច ដកស្រង់ បទពិសោធន៍ការងារពីគ្នាទៅវិញទៅមកដើម្បីឲកំរិតជីវភាពនៃប្រជាជនប្រទេសទាំង២ កាន់តែធូរធា និង ប្រសើរឡើងថែមទៀត។
ក្នុងឱកាសនោះដែរឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានស្នើសុំទៅប្រតិភូក្រុងកីនថឺនៃសាធារណរដ្ឋសង្គមនិយម វៀតណាមផ្តល់អាហារូបករណ៍ដល់និសិ្សតនៅខេត្តកំពង់ឆ្នាំង បានទៅសិក្សានៅក្រុងកឹនថឺផងដែរ និង ផ្តល់ការហ្វឹកហាត់ដល់ កីឡាករ កីឡាការនីខេត្តកំពង់ឆ្នាំង ដើម្បីបង្កើនសមត្ថភាព ក្នុងការត្រៀមប្រកួតថ្នាក់ជាតិ និង អន្តរជាតិនាពេលខាងមុខ ។
ឯកឧត្តម ត្រាន់ គួកជុង សមាជិគគណកម្មាធិការមជ្ឈឹមបក្ស និង ជាលេខាបក្សទីក្រុងកឹនថឺ បានសំដែងនូវអំណរគុណយ៉ាងជ្រាលជ្រៅបំផុតចំពោះគណៈអភិបាលខេត្ត ក្រុមប្រឹក្សាខេត្ត និង ថ្នាក់ដឹកនាំមន្ទីរអង្គភាពជុំវិញខេត្ត ដែលបានទទួលបដិសណ្ឋារកិច្ច យ៉ាងកក់ក្តៅបំផុតក្នុងដំណើរទស្សកិច្ចនេះ ដែលនេះបង្ហាញឲ្យឃើញ ពីកិច្ចសហប្រតិបត្តិការយ៉ាងរឹងមាំ នឹងបន្តទំនាក់ទំនងល្អរវាងប្រទេសទាំង២ ពិសេសនោះគឺការចងសម្ព័ន្ធភាពរវាង ខេត្តកំពង់ឆ្នាំង និង ទីក្រុងកឹនថឺ។
ឯកឧត្តមប្រធានប្រតិភូបានបញ្ជាក់ទៀតថា ចំពោះសំណើររបស់រដ្ឋបាលខេត្តកំពង់ឆ្នាំងនោះ ខាងទីក្រុងកីនថឺបានឯកភាពតាមការស្នើសុំ របស់គណអភិបាលខេត្ត ក្នុងការផ្តល់អាហាររូបករណ៍ និង ការជួយហ្វឹកហាត់ដល់កីឡាករ កីឡាការនី ខេត្តកំពង់ឆ្នាំង នាពេលខាងមុខ។
ឯកឧត្តមត្រាន់ គួកជុងសមាជិគគណកម្មាធិការមជ្ឈឹមបក្សនិងជាលេខាបក្សទីក្រុងកីនថឺ បានសំដែងនូវការកោតសរសើរ ចំពោះកិច្ចអភិវឌ្ឍន៍របស់ខេត្តកំពង់ឆ្នាំង នាពេលបច្ចុប្បន្នដែលមានការអភិវឌ្ឍន៍ជឿនលឿបានយ៉ាងឆាប់រហ័ស ទាំងវិស័យសាធារណៈ និង វិស័យឯកជនផងដែរ ពិសេសនោះគឺសោភណ្ឌភាព បរិស្ថាន សណ្តាប់ធ្នាប់ នៅក្នុងក្រុងកំពង់ឆ្នាំង គឺមានភាពល្អប្រសើរឡើងគួរឲ្យកត់សម្គាល់ ។ ហើយនៅពេលខាងមុខ ខេត្តកំពង់ឆ្នាំង នឹង មានការអភិវឌ្ឍរីកចម្រើនថែមទៀត លើវិស័យសេដ្ឋកិច្ច ពាណិជ្ជកម្ម និង ទេសចរណ៍ ប្រកបដោយសក្តានុពល និង ចាប់អារម្មណ៍ពីសំណាក់វិនិយោគគិនអន្តរជាតិផងដែរ៕
អត្ថបទ៖ ANN
