ការប្រើប្រាស់បច្ចេកវិទ្យាថ្មីដោយប្រើគ្រឿងចក្រទំនើបខួងដី(ជែកឃីង)ជម្រៅ៨ម៉ែត្រដាក់លូដោយស្វ័យប្រវត្តិមិនបាច់ប្រើប្រាស់មនុស្សចុះទៅក្នុងការដ្ឋានក្រោមដីបានបញ្ចប់ជំហានទី១ហើយដែលមានប្រវែង៣០០ម៉ែត្រ។
លោកជូម៉េងទ្រីអនុប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា គម្រោងនៃការប្រើប្រាស់បច្ចេកវិទ្យាថ្មីជំហានទី១នេះ មានប្រវែង៣០០ម៉ែត្រ។ ដោយចាប់ផ្តើមពីមុខវិទ្យាល័យប៊ុនរ៉ានីហ៊ុនសែនវត្តភ្នំខណ្ឌដូនពេញរហូតដល់ផ្លូវលេខ៧០ទំនប់ទួលគោកកាត់ក្រោមរង្វង់មូលគួចកាណុង។
គិតមកដល់ពេលនេះគម្រោងជំហានទី១បានបញ្ចប់ហើយក្រុមការងារបានបន្តជំហានទី២នៅក្នុងខែធ្នូនេះដោយចាប់ផ្តើមពីមុខវិទ្យាល័យប៊ុនរ៉ានីហ៊ុនសែនវត្តភ្នំក្នុងខណ្ឌដូនពេញរហូតដល់មុខស៊ីឌីស៊ី CDCឬក្រុមប្រឹក្សាអភិវឌ្ឍន៍កម្ពុជា មានប្រវែងជាង១.០០០ម៉ែត្រ។
គួរបញ្ជាក់ថា៖បច្ចេកវិទ្យាថ្មីដោយប្រើគ្រឿងចក្រទំនើបដោយខួងដីនេះបានចាប់ផ្ដើមបើកការដ្ឋានឱ្យដំណើរការកាលពីព្រឹកថ្ងៃទី១០ខែកញ្ញាឆ្នាំ២០១៩នៅមុខវិទ្យាល័យប៊ុនរ៉ានីហ៊ុនសែនវត្តភ្នំខណ្ឌដូនពេញ។ក្រោមវត្តមានលោកសាំពិសិដ្ឋប្រធានមន្ទីរសាធារណការនិងដឹកជញ្ជូនរាជធានីភ្នំពេញតំណាងស្ថានទូតជប៉ុនប្រចាំនៅកម្ពុជា និងតំណាងអង្គការចៃកា។
គម្រោងខួងដីដាក់លូស្វ័យប្រវត្តិដោយមិនបាច់ប្រើប្រាស់មនុស្សចុះទៅក្នុងការដ្ឋានក្រោមដីនេះទើបតែមានជាលើកទី១នៅរាជធានីភ្នំពេញហើយជាគម្រោងនិងខួងដីដាក់លូជាស្វ័យប្រវត្តិនៅក្រោមដីនេះលើចម្ងាយផ្លូវប្រវែង១៥៦០ម៉ែត្រក្នុងជម្រៅក្រោមដី៨ម៉ែត្រ។ការប្រើប្រាស់បច្ចេកវិជ្ជាថ្មីមួយនេះវាមិនរំខានទៅដល់ការកកស្ទះចរាចរនិងប៉ះពាល់ដល់ហេដ្ឋារចនាសម្ព័ន្ធនានានោះទេព្រោះវាខួងនៅក្រោមដីជម្រៅរហូតដល់៨ម៉ែត្រ។
លោកសាំពិសិដ្ឋប្រធានមន្ទីរសាធារណការនិងដឹកជញ្ជូនរាជធានីភ្នំពេញធ្លាប់បញ្ជាក់ថា៖គម្រោងការពារទឹកជំនន់និងកែលម្អរប្រព័ន្ធប្រឡាយលូក្នុងរាជធានីភ្នំពេញជំហានទី៤នេះមានទឹកប្រាក់សរុបប្រមាណ៣០លានដុល្លារអាមេរិកដែលជាជំនួយឥតសំណងរបស់រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA ។ គម្រោងនេះនឹងត្រូវអនុវត្តការដ្ឋាន ដូចខាងក្រោមក្នុងនោះរួមមាន៖ ១-ដាក់បណ្តាញលូមេ នៅក្នុងភូមិសាស្ត្រខណ្ឌទួលគោក ប្រវែង ៨.២គីឡូម៉ែត្រ។
២ដាក់បណ្តាញលូមេនៅក្នុងភូមិសាស្ត្រខណ្ឌដូនពេញប្រវែង៤.៤គីឡូម៉ែត្រ។៣សាងសង់អាងស្តុកទឹកក្រោមដីនិងសាងសង់ស្ថានីយ៍បូមទឹកនៅសួនច្បារមុខក្រុមប្រឹក្សាអភិវឌ្ឍន៍កម្ពុជាCDC។៤តម្លើងរបាមេកានិចស្វ័យប្រវត្តិដើម្បីប្រមូលសំរាមនៅមុខផ្លូវបង្ហូរទឹកនៅស្ថានីយ៍បូមទឹកចតុមុខព្រះគន្លង់១ព្រះគន្លង់២និងផ្សារចាស់។៥ផ្តល់រថយន្តបូមទឹកចល័ត ចំនួន ២គ្រឿង៕
អត្ថបទ៖ ដើមរាំង
