ប្រទេសអារ៉ាប់រួម(United Arab Emirate) ត្រូវបានគេចាត់ទុកថា ជាប្រទេសអ្នកមានក្នុងលំដាប់ទី៤ក្នុងចំណោមប្រទេសទាំង២០ដែលមានជាងគេតំបន់អាស៊ី និងមានជាង គេក្នុងលំដាប់ទី៨នៅក្នុងពិភពលោកសម្រាប់ឆ្នាំ២០១៩។
ប្រជាជនទូទៅស្គាល់ប្រទេសនេះតាមរយៈទីក្រុងឌូបៃ ដែលជាក្រុងទំនើបនិងសំបូរទៅដោយអគារខ្ពស់យ៉ាងច្រើន។ ចំពោះវិស័យការងារវិញប្រទេសអារ៉ាប់រួមក៏ត្រូវបានគេស្គាល់ ថា ជាប្រទេសដែលមានប្រជាជនចំរុះច្រើនជាតិសាសន៍ប្រមាណជា២០០ជនជាតិ ដែលកំពុងតែស្នាក់និងប្រកបការងារជាច្រើនវិស័យនៅក្នុងប្រទេស អ្នកមានមួយនេះ។ នេះបើតាមការអោយដឹងពីឯកឧត្តមអគ្គរដ្ឋទូតប្រទេសអារ៉ាប់រួម ឯកឧត្តម សាអីហ្វ អាប់ឌុលឡា មហាម៉េដ ខាល់ហ្វាន អាល់ស្ហាមីស៊ី ក្នុងជំនួបជាមួយរដ្ឋមន្រ្តីក្រសួងការងារកម្ពុជា ឯកឧត្តម អ៊ិត សំហេង។
តាមការអោយដឹងពីឯកឧត្តមអគ្គរដ្ឋទូតប្រទេសអារ៉ាប់រួម នៅក្នុងចំណោមជនជាតិជាង២០០ជនជាតិនោះ ក៏មានប្រជាជនកម្ពុជាមួយចំនួនតូចកំពុងតែធ្វើការនៅទីនោះផងដែរ។ តែដោយសារក្រសួងការងារកម្ពុជា និងក្រសួងការងារប្រទេសអារ៉ាប់រួមមិនទាន់មានកិច្ចសហប្រតិបត្តិការលើវិស័យការងារជាមួយគ្នានៅឡើយ ទើបមិនទាន់មានតួលេខច្បាស់លាស់ពីចំនួនពលរដ្ឋកម្ពុជាដែលចំណាកស្រុកទៅធ្វើការនៅក្នុងប្រទេសនេះ។
ប៉ុន្តែឆាប់ៗនេះ ក្រសួងការងារនិងបណ្តុះបណ្តាលវិជ្ជាជីវៈរបស់កម្ពុជា និងចុះអនុស្សារណៈយោគយល់គ្នាមួយជាមួយប្រទេសអារ៉ាប់រួមលើវិស័យការងារនេះ ខណៈដែលបច្ចុប្បន្នក្រុមការងាររបស់ក្រសួងការងារកម្ពុជា កំពុងពិនិត្យមើលអោយបានម៉ត់ចត់ចំពោះសេចក្តីព្រាងអនុស្សារណៈដែលខាងប្រទេសអារ៉ាប់រួមបានផ្ញើមក។
យោងតាមគេហទំព័របរទេស UN.News បានបង្ហាញថា ក្រៅពីប្រទេសអារ៉ាប់រួមខ្លួនឯង នៅមានជនអន្តោប្រវេសន៍មកពីប្រទេសចំនួន៩ផ្សេងទៀត ដែលមានវត្តមានធ្វើការនៅក្នុងប្រទេសនេះច្រើនជាងគេ រួមមានប្រទេសអាមេរិក អាល្លឺម៉ង់ រុស្សី អារ៉ាប៊ីតសៅអូឌីត ចក្រភពអង់គ្លេស កាណាដា បារាំង អូស្រ្តាលីនិង អេស្ប៉ាញ៕
អត្ថបទ៖ khmernas
