រដ្ឋាករស្វយ័តគ្រប់គ្រងសំរាមនិងសំណល់រឹង រាជធានីភ្នំពេញ នៃរដ្ឋបាលរាជធានីភ្នំពេញ បានឱ្យដឹងថា រាជរដ្ឋាភិបាលអនុញ្ញាតឱ្យក្រុមហ៊ុនស៊ីនទ្រី មានសិទ្ធិបន្តប្រតិបត្តិការសម្អាត ប្រមូល និងដឹកជញ្ជូនសំរាម និងសំណល់រឹងជាបណ្តោះអាសន្នសិន ប៉ុន្តែមិនមានសិទ្ធិក្នុងការប្រមូលថ្លៃសេវា សម្អាត ប្រមូល និងដឹកជញ្ជូនសំរាម និងសំណល់រឹងតទៅទៀតទេ ។
នេះបើយោងតាមសេចក្តីណែនាំស្តីពីការផ្លាស់ប្តូរប្រព័ន្ធគ្រប់គ្រង និងនីតិវិធីនៃការបង់ថ្លៃសេវាប្រមូលសម្រាម និងសំណល់រឹង នៅរាជធានីភ្នំពេញ ក្នុងដំណាក់កាលអន្តរកាល របស់រដ្ឋបាលរាជធានីភ្នំពេញ ដែល CPC NEWS ទទួលបាននៅថ្ងៃទី១៦ ខែធ្នូនេះ ។
ចំពោះតម្លៃវិញ រដ្ឋបាលរាជធានីភ្នំពេញ ឱ្យរក្សាតម្លៃសេវាបច្ចុប្បន្នជាបណ្តោះអាសន្នសិន ហើយប្រើប្រាស់អត្រាតម្លៃសេវាប្រមូលសំរាម ដែលបានបង់រួចកាលពីខែតុលា ឆ្នាំ២០១៩ ជាមូលដ្ឋាន ដើម្បីបន្តបង់ថ្លៃសេវាប្រមូលសំរាម ក្នុងអំឡុងពេលអន្តរកាលនេះ ។
រដ្ឋបាលរាជធានីភ្នំពេញ បញ្ជាក់ថា ចាប់ពីខែមករា ឆ្នាំ២០២០ ទៅ អតិថិជនត្រូវបង់ថ្លៃសេវាតាមប្រព័ន្ធអេឡិចត្រូនិកនៅក្នុងទូរស័ព្ទដៃ ឬបញ្ជរទូទាត់តាមធនាគារ ឬភ្នាក់ងារទូទាត់ផ្សេងៗទៀត ។
គួរជម្រាបថា រដ្ឋបាលរាជធានីភ្នំពេញបានបង្កើត “រដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញ” ដែលមានភារកិច្ចទទួលបន្ទុកលើការគ្រប់គ្រងការផ្តល់សេវាប្រមូលសំរាម និងសំណល់រឹង ការអនុវត្តប្រព័ន្ធគ្រប់គ្រងសំរាម និងសំណល់រឹងថ្មី និងការប្រមូលចំណូលថ្លៃសេវាប្រមូលសំរាម និងសំណល់រឹង ដោយមិនដាក់ក្នុងវិក្កយបត្រអគ្គិសនីទៀតទេ ។
ការមិនឱ្យមានការដាក់ថ្លៃសេវាប្រមូលសម្រាមទៅក្នុងវិក្កយបត្រនេះ ដោយសារតែសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមើលឃើញពីទុក្ខលំបាករបស់ប្រជាពលរដ្ឋ ក៏ដូចជាការត្អូញត្អែរ និងការមិនស្មើរភាពគ្នា ខណៈដែលអ្នកខ្លះមិនមានសម្រាមឱ្យប្រមូលផងក៏ត្រូវបង់ថ្លៃសេវា ទៅក្នុងវិក្កយបត្រផងដែរ ៕
អត្ថបទ៖ CPCnews
