មានហេតុការណ៍ដ៏រន្ធត់មួយបានកើតឡើង ដោយសារតែផ្លូវថ្នល់ប្រឡាក់ប្រេងម៉ាស៊ីន ធ្វើឲ្យយុវជនម្នាក់រងគ្រោះថ្នាក់រហូតដល់អាយុជីវិត ខណៈជិះម៉ូតូរអិល ដួលចូលក្រោមឡានដឹកដី ហើយក៏ត្រូវឡានកិន ស្លា ប់ភ្លាមៗនៅនឹងកន្លែងកើតហេតុ។
ហេតុការណ៍នេះបានកើតឡើងនៅថ្ងៃទី១៦ ខែធ្នូ ឆ្នាំ២០១៩នេះ វេលាម៉ោង១០៖៤០នាទីព្រឹក តាមបណ្ដោយផ្លូវបេតុងមួយកន្លែង កែងនិងផ្លូវលេខ៥៩៨ ក្បែរអង្គភាពចុះបញ្ជីរថយន្ត ស្ថិតក្នុងសង្កាត់ទួលសង្កែ២ ខណ្ឌឬស្សីកែវ។
ជនរងគ្រោះមានឈ្មោះ ឃៀង ចំរើន ភេទប្រុស អាយុ២៨ មានស្រុកកំណើតនៅខេត្តកណ្តាល។ ចំណែករថយន្តបង្ក បើកបរដោយបុរសម្នាក់មិនទាន់ស្គាល់អត្តសញ្ញាណ។
តាមប្រភពព័ត៌មានពីកន្លែងកើតហេតុបានឲ្យដឹងថា ដំបូងឡើយគេបានឃើញបុរសម្នាក់ជិះម៉ូតូមួយគ្រឿងម៉ាកHonda Vario សេរីឆ្នាំ២០១៩ ពណ៌ស ពាក់ស្លាកលេខ ភ្នំពេញ1HU.8547 ធ្វើដំណើរក្នុងទិសដៅពីកើតទៅលិច តាមបណ្ដោយផ្លូវបេតុងខាងលើ ក្នុងល្បឿនលឿន លុះមកដល់ចំណុចកើតហេតុ ក៏ស្រាប់តែរអិល ជាមួយនិងប្រេង ម៉ាស៊ីនដែលប្រឡាក់ លើថ្នល់ ក៏បណ្តាលឲ្យជនរងគ្រោះរអិល ដួលចូលក្រោមរថយន្តដឹក ដីតែម្តង ដែលកំពុងធ្វើដំណើរស្របទិសគ្នា បណ្តាលឲ្យជនរងគ្រោះស្លា ប់បាត់បង់ជីវិតភ្លាមៗនៅនឹងកន្លែងកើតហេតុ ចំណែកឯម្ចាស់រថយន្តបង្ក បានរត់គេចខ្លួនបាត់ស្រមោល បន្សល់រថយន្តប្រភេទ KIA ពណ៌ខៀវ ពាក់ស្លាកលេខ ព្រះសីហនុ 2A.4273 ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកដល់ទីតាំង ហើយបានទំនាក់ទំនងទៅកម្លាំងជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែង ដើម្បីយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ។ចំណែកសាក ស ពត្រូវបានប្រគល់អោយបងប្អូនសាច់ញាតិដឹកយកទៅផ្ទះដើម្បីធ្វើបុណ្យតាមប្រពៃណីនៅស្រុកកំណើត។សូមបើកបរដោយប្រុងប្រយ័ត្នគ្រប់ពេលវេលា ដើម្បីមនុស្សដែលអ្នកស្រលាញ់ដែលកំពុងរងចាំនៅឯផ្ទះ៕
អត្ថបទ៖ CPCnews
