កងទ័ពកម្ពុជា និងវៀតណាម ជាង ១ពាន់នាក់ នឹងធ្វើលំហាត់ហ្វឹកហ្វឺនរួមគ្នា សម្រាប់ការសង្រ្គោះពេលមានគ្រោះមហន្តរាយ នៅថ្ងៃទី១៨ ខែធ្នូ ឆ្នាំ២០១៩ស្អែកនេះ។ លំហាត់ហ្វឹកហ្វឺននេះ គឺដើម្បីបង្កើនសមត្ថភាពក្នុងការសង្រ្គោះប្រជាពលរដ្ឋនៃប្រទេសទាំងពីរ ដែលជួបបញ្ហាគ្រោះមហន្តរាយ ដោយកត្តាណាមួយជាដើមនោះ។
កាលពីថ្ងៃម្សិលមិញនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ជូនដល់ប្រជាពលរដ្ឋថា នៅថ្ងៃទី១៨ ខែធ្នូ កម្ពុជានឹងមានការរៀបចំសមយុទ្ធកងទ័ព រវាងកងទ័ពកម្ពុជា និងកងទ័ពវៀតណាម ទាក់ទងទៅនឹងការគ្រប់គ្រងគ្រោះមហន្តរាយនៅតាមព្រំដែន។ គោលបំណងនៃការធ្វើសមយុទ្ធនេះ គឺចង់បង្ការការពារប្រជាពលរដ្ឋឱ្យផុតពីគ្រោះថ្នាក់ក្នុងហេតុការណ៍ផ្សេងៗ ដែលអាចកើតមានឡើងជាយថាហេតុណាមួយ ដូចជា គ្រោះទឹកជំនន់ ភ្លើងឆេះព្រៃជាដើម។
ដូច្នេះតាមរយៈការធ្វើសមយុទ្ធនេះ សម្តេចតេជោ បានប្រាប់ប្រជាពលរដ្ឋកុំមានការយល់ច្រឡំអំពីទំនាក់ទំនងរវាងកម្ពុជា និងប្រទេសជិតខាងឱ្យសោះ ពីព្រោះនេះ គឺជាការធ្វើសមយុទ្ធដើម្បីបង្ការការពារនូវសេចក្តីសុខជូនដល់ប្រជាពលរដ្ឋតែប៉ុណ្ណោះ។
បើតាមនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានគណៈកម្មការលំហាត់ហ្វឹកហ្វឺនសង្រ្គោះគ្រោះមហន្តរាយ កម្ពុជា-វៀតណាម បានបញ្ជាក់ថា លំហាត់ហ្វឹកហ្វឺននេះ មានឈ្មោះថា «សង្រ្គោះគ្រោះមហន្តរាយ» នឹងធ្វើឡើងជាលើកដំបូងបំផុត នៅលើទឹកដីកម្ពុជា ស្ថិតនៅឃុំសួស្តី ស្រុកចន្ទ្រា ខេត្តស្វាយរៀង ជាប់នឹងព្រំដែនខេត្តឡុងអាន ប្រទេសវៀតណាម។
នាយឧត្តមសេនីយ៍ បានលើកឡើងទៀតថា ការធ្វើលំហាត់ហ្វឹកហ្វឺនជាមួយភាគីវៀតណាមនេះ គឺដើម្បីត្រៀមកម្លាំងរួមគ្នា ក្នុងការចុះជួយប្រជាពលរដ្ឋដែលជាប់នឹងព្រំដែននៃប្រទេសទាំងពីរ ខណៈដែលពួកគេជួបគ្រោះធម្មជាតិ ឬគ្រោះមហន្តរាយដោយយថាហេតុណាមួយកើតឡើងនោះ។
នាយឧត្តមសេនីយ៍ បានបញ្ជាក់បន្ថែមថា តាមការណែនាំរបស់រាជរដ្ឋាភិបាល, ក្រសួងការពារជាតិ នឹងត្រូវធ្វើលំហាត់នេះ ជាបន្តបន្ទាប់ទៀតជាមួយនឹងប្រទេសជិតខាង មិនថាជាមួយប្រទេសវៀតណាមនោះទេ គឺនឹងត្រូវធ្វើជាមួយប្រទេសថៃ និងប្រទេសឡាវផងដែរ ប៉ុន្តែនាពេលនេះ មិនទាន់ត្រូវបានកំណត់ពេលវេលាជាក់លាក់នៅឡើយទេ៕
អត្ថបទ៖ clicknews
