រហូតមកដល់ពេលនេះ វិនិយោគិនចិននៅតែបន្តសម្រុកមកកម្ពុជា ដើម្បីស្វែង រកការបណ្ដាក់ទុនវិនិយោគលើវិស័យនានា ស្របពេលទំនាក់ទំនងរវាងកម្ពុជា និងចិនកំពុងតែល្អូកល្អិននឹងគ្នាកាន់តែខ្លាំង។
ក្រុមហ៊ុន 58cam.comសហការជាមួយក្រុមហ៊ុនអចលនទ្រព្យMeridian International Holding បានរៀបចំកម្មវិធីជួបជុំលើកទី៥នៃក្រុមពាណិជ្ជករជនជាតិចិននៅកម្ពុជា CBNE នៅសណ្ឋាគារសុខាភ្នំពេញដោយមាន ការចូលរួមពីបណ្តាលពាណិជ្ជករចិនជាង ៣០០នាក់ មកពីគ្រប់វិស័យ ដូចជា វិស័យសំណង់ អចលនទ្រព្យច្បាប់ ហិរញ្ញវត្ថុ ដឹកជញ្ជូន និងទទួលបានការយកចិត្តទុកដាក់យ៉ាងខ្លាំងពីវិស័យពាក់ព័ន្ធ។
លោក ហុង ហ្វីលូ(Hong Fei Liu) ស្ថាបនិកក្រុមហ៊ុន 58cam.com បាន មានប្រសាសន៍ថា ការបង្កើត កម្មវិធីនេះឡើងគឺដើម្បី ពង្រឹង ទំនាក់ ទំនងនឹង ជម្រុញការធ្វើពាណិជ្ជកម្ម អាជីវកម្មរបស់ វិនិយោគគិនចិន នៅកម្ពុជា អោយកាន់ តែប្រសើរឡើងថែមទៀត។ លោកបន្តថា រហូតមកទល់ពេលនេះ ចិនបានក្លាយជាម្ចាស់ជំនួយបរទេសធំជាងគេសម្រាប់កម្ពុជា។
រដ្ឋាភិបាលចិនបានសន្យាជួយកម្ពុជាក្នុងទំហំទឹកប្រាក់៦០០លានដុល្លារអាមេរិក ចាប់ពីឆ្នាំ២០១៩ដល់ឆ្នាំ២០២១ ក៏ដូចជាជំរុញឲ្យភ្ញៀវទេសចរចិនមកកម្សាន្តនៅកម្ពុជា ឲ្យបានដល់៥លាននាក់ក្នុងឆ្នាំនេះនិងឆ្នាំបន្ទាប់។ នៅក្នុងវិស័យពាណិជ្ជកម្មនិងវិនិយោគចិននៅកម្ពុជាវិញ គឺមានជាង៦ពាន់៤រយលានដុល្លារក្នុងឆ្នាំ២០១៨ កើនឡើងជាង១៥ភាគរយបើធៀបនឹងឆ្នាំ២០១៧។
សូមបញ្ជាក់ថា ក្នុងទំនាក់ទំនងកិច្ចសហប្រតិបត្តិការ និងភាពជាដៃគូយុទ្ធសាស្ត្រ គ្រប់ជ្រុង ជ្រោយរវាងកម្ពុជា-ចិន ក្នុងគន្លងខ្សែក្រវាត់ និងផ្លូវ បានជំរុញឱ្យទំហំពាណិ ជ្ជកម្មទ្វេ ភាគី កម្ពុជា-ចិន ឡើងដល់កម្រិតដែលប្រមុខរដ្ឋាភិបាលនៃប្រទេសទាំងពីរចង់បាន។ ជាក់ស្តែង ចិននៅតែឈរក្នុងលំដាប់ឈានមុខគេនៃការធ្វើវិនិយោគ និងទេសចរណ៍ នៅកម្ពុជា៕
អត្ថបទ៖ BTV
