ជនសង្ស័យជាជនជាតិចិនម្នាក់ ក្នុងចំណោមបក្ខពួក ៤នាក់ មធ្យោបាយម៉ូតូ២គ្រឿង ត្រូវបាននគរបាលប៉ុស្តិ៍សំរោងក្រោម ឡោមព័ន្ធចាប់ខ្លួនបាន ដកហូតបានសម្ភារ: សម្រាប់គាស់ផ្ទះ ទ្វារ មួយចំនួនក្រោយពីកម្លាំងល្បាតប្រទះជួប ជនសង្ស័យព្យាយាមរត់គេច កាលពីវេលាម៉ោង១ និង៣០នាទីរំលងអធ្រាត្រចូលថ្ងៃទី១៨ ខែធ្នូ ឆ្នាំ២០១៩ លោតចុះត្រាំទឹកត្រពាំង ក្នុងភូមិចម្ការត្បែង សង្កាត់សំរោងក្រោមខណ្ឌពោធិ៍សែនជ័យ រហូតដល់វេលាម៉ោង ៦ព្រឹក ថ្ងៃដដែល ទើបចាប់ខ្លួនបានម្នាក់ រត់គេច៣នាក់បាត់ស្រមោល។
ជនសង្ស័យទី១ មានឈ្មោះ HUANG ZHENG ភេទប្រុសអាយុ៣៣ឆ្នាំ មុខរបរមិនពិត មិនមានលិខិតឆ្លងដែនជាប់ខ្លួន ស្នាក់នៅផ្ទះសំណាក់ ក្នុងបុរីញូថោន ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ។ទី២ឈ្មោះ ACHIN ភេទប្រុសអាយុ៣០ឆ្នាំ រត់គេចខ្លួន ចំនែកទី៣និងទី៤ រត់គេចខ្លួន ពុំស្គាល់អត្តសញ្ញាណ។
សមត្ថកិច្ច បានឲ្យដឹងថា នៅវេលាម៉ោង ១និង៣០នាទីរំលងអធ្រាត្រ ឆ្លងចូលថ្ងៃទី១៨ ខែធ្នូ ឆ្នាំ២០១៩ កម្លាំងល្បាត បានប្រទះជួបជនជាតិចិនចំនួន៤នាក់ ជិះម៉ូតូ២គ្រឿង ហើយគ្រាន់តែក្រឡេកឃើញកម្លាំងប៉ូលិសភ្លាម ជនសង្ស័យព្យាមរត់គេច ពេលនោះកម្លាំងដេញតាម រត់គេចបាត់៣នាក់ ហើយជនសង្ស័យម្នាក់ រត់ផ្លោះរបងផ្ទះប្រជាពលរដ្ឋ លោតចូលសំងំក្នុងទឹកត្រពាំង កំប្លោក បាត់មួយយប់ ទើបកម្លាំងរួមសហការជាមួយបងប្អូនប្រជាពលរដ្ឋឡោមព័ទ្ធត្រពាំង ពេញមួយយប់ រហូតដល់វេលាម៉ោង៦ព្រឹក ថ្ងៃដដែលជនសង្ស័យលូនចេញ ឡើងលើគោក ចាប់ខ្លួនបានតែម្តង ដោយដកហូតបានម៉ូតូមួយគ្រឿង និងសម្ភារ: ឧបករណ៍គាស់ផ្ទះ មួយកាបូបស្ពាយ ។
សម្ភារ:ដកហូត៖ ដែកថ្នាំងអំពៅកែឆ្នៃ សម្រាប់គាស់ទំលុះទំលាយ ចំនួន៣កំណាត់ ដែកកាប់ចំនួន១ ម៉ាស់មុខចំនួន៣ ទួលឡឹវីសចំនួន២ និងម៉ូតូចំនួន១គ្រឿង ម៉ាកហុងដារសេ១២៥ ពណ៍ខ្មៅពាក់ ស្លាកលេខភ្នំពេញ1G-0965 ។
ជនសង្ស័យត្រូវបាននាំយកទៅប៉ុស្តិ៍ រង់ចាំរកអ្នកបកប្រែភាសា មកជួយសាកសួរ មុននឹងបញ្ជូនទៅផ្នែកជំនាញខណ្ឌ ដើម្បីចាត់ការបន្តតាមនីតិវិធី៕
អត្ថបទ៖ KBN
