លោកវរសេនីយ៍ទោ យី វណ្ណដា អត្តលេខ៦៥៦៥៧ នាយរងការិយាល័យព្រហ្មទណ្ឌកម្រិតធ្ងន់ កាលពីថ្ងៃទី៣ ខែធ្នូ ឆ្នាំ២០១៩ ថ្មីៗនេះ ត្រូវបានប្រកាសផ្ទេរតំណែងមកជាអធិការនៃអធិការដ្ឋាននគរបាលក្រុងតាខ្មៅ ។ ដោយឡែក លោកវរសេនីយ៍ឯក ស កែវពិសិដ្ឋ អធិការចាស់ ត្រូវផ្ទេរទៅកាន់មុខតំណែងថ្មី ជាអនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ វិញ ។
បន្ទាប់ពីកាន់តំណែងមិនបានប៉ុន្មានផង បទល្មើសបានកើតឡើងជាបន្តបន្ទាប់ ក្នុងក្រុងតាខ្មៅ ដូចជាករណី កាប់ចាក់គ្នា ចោរឆក់ទូរស័ព្ទ និង ករណីយកកាំភ្លើងភ្ជង់យកម៉ូតូពីនារីវ័យក្មេងម្នាក់ ។
ប៉ុន្តែ អ្វីជាការហួសចិត្តនោះ លោកអធិការក្រុងតាខ្មៅថ្មី បែរជាមកខឹងអ្នកសារព័ត៌មាន ដែលប្រើពាក្យថា “ប្លន់” ទៅវិញ ដោយហេតុអ្វីមិនព្រមប្រើពាក្យ “លួចមានស្ថានទម្ងន់ទោស” អោយត្រូវនឹងក្រមព្រហ្មទណ្ឌថ្មីឆ្នាំ២០០៩ ។
លោកវរសេនីយ៍ទោ យី វណ្ណដា អធិការនគរបាលក្រុងតាខ្មៅ បានសរសេរតាមបណ្តាញសង្គម WhatsApp ថា “ជម្រាបមក ចាន់ ថា អ្នកសារព័ត៌មាន សូមបងមេត្តាយល់អោយច្បាស់ពីក្រមព្រហ្មទណ្ឌថ្មីនៃប្រទេសកម្ពុុជាយេីង ! កាលពីមុនក្រមចាស់យេីងប្រេីពាក្យថាប្លន់តែបន្ទាប់យេីងធ្វេីវិសោធនកម្មច្បាប់ព្រហ្មទណ្ឌថ្មី យេីងប្រេីពាក្យថាលួចមានស្ថានទំងន់ទោសវិញ ។ អញ្ចឹងបេីបងមិនទាន់យល់ពីច្បាប់ទេ សូមបងកុំទាន់អាលវាយតម្លៃ មកលេីរូបខ្ញុំ បងត្រូវស្វែងយល់ពីច្បាប់បន្តិចទៅ ។ ដូច្នេះមុននិងបងដាក់បន្ទុកមកអោយខ្ញុំ សូមបងពិចារណាក្នុងផ្លូវច្បាប់បន្តិចក្នុងនាមជាអ្នកសារព័ត៌មាន”។
សំណេររបស់លោកអធិការក្រុងតាខ្មៅ ធ្វើឡើងបន្ទាប់ពីមានករណីជនល្មេីសភ្ជង់ប្លន់យកម៉ូតូពីនារីវ័យក្មេងម្នាក់ បានសម្រេច រួចគេចខ្លួនដោយសុវត្ថិភាព នៅវេលាម៉ោង១៨៖៣០នាទី ថ្ងៃទី១៧ ខែធ្នូ ឆ្នាំ២០១៩ នេះ ស្ថិតនៅក្លោងទ្វារវត្តឈូងលៀបផ្នែកខាងត្បូង ក្នុងសង្កាត់រកាខ្ពស់ ក្រុងតាខ្មៅ ខេត្តកណ្តាល ។
ជនរងគ្រោះឈ្មោះ ឆូ វឌ្ឍនា អាយុ១៦ឆ្នាំ ជាចៅស្រីរបស់លោក ឈឿង ឆូ ចៅសង្កាត់រកាខ្ពស់ ក្រុងតាខ្មៅ ជិះម៉ូតូម៉ាកហុងដា ស៊េរីឆ្នាំ២០២០ ផ្លាកលេខ៤៦៤០ ។
ជុំវិញបញ្ហានេះ លោកវរសេនីយ៍ទោ យី វណ្ណដា អធិការនគរបាលក្រុងតាខ្មៅ ថ្លែងប្រាប់ CPC NEWS ថា ករណីនេះ បេីតាមសេចក្តីរាយការណ៍បឋមពីលោកមេប៉ុស្តិ៍រកាខ្ពស់ គឺ កាច់កម៉ូតូ ។ ទោះបីយ៉ាងណា លោកអធិការកំពុងបញ្ជាកម្លាំងដេញបង្ក្រាបហេីយ ។
ទន្ទឹមនេះ អ្នកឃេីញហេតុការណ៍ផ្ទាល់មាត់ អះអាងថា ករណីនេះ ជាអំពេីភ្ជង់ប្លន់ម៉ូតូ១០០% មិនមែនជាករណីកាច់ក ម៉ូតូ ដូចការអះអាងរបស់លោកមេប៉ុស្តិ៍ទេ ព្រោះជនល្មេីសមានកាំភ្លេីង ហេីយបានភ្ជង់ប្លន់នៅក្លោងទ្វារវត្ត ខណៈជនរងគ្រោះកំពុងជិះម៉ូតូម្នាក់ឯង ដែលមិត្តភក្តិ២នាក់ ផ្សេងទៀត ជិះម៉ូតូមួយគ្រឿងផ្សេង ៕
អត្ថបទ៖ CPCnews
