មេប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត និងមេប៉ុស្ដិ៍នគរបាលច្រកទ្វារព្រំដែនអន្ដរជាតិអូរយ៉ាដាវ ដែលធ្លាប់ល្បីល្បាញរឿងអាស្រូវ ត្រូវបានផ្លាស់ប្ដូរ ពីលិចទៅកាន់ខាងកើត ចំណែកពីខាងកើតឲ្យមកាន់ខាងលិចវិញ។
បើតាមសេចក្ដីប្រកាសរបស់សម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានឲ្យដឹងថា ឧត្តមសេនីយ៍ត្រី អ៊ី ចំរើន ពីនាយប៉ុស្ដិ៍នគរបាលច្រកទ្វារព្រំដែនអន្ដរជាតិអូរយ៉ាដាវ នៃនាយកដ្ឋានច្រកទ្វារទី២ ទៅជានាយប៉ុស្ដិ៍នគរបាលច្រកទ្វារព្រំដែន អន្ដរជាតិប៉ោយប៉ែត នៃនាយកដ្ឋានច្រកទ្វារទី១។ ដោយឡែក លោកវរសេនីយ៍ឯក ខឹម ចិត្រា ពីនាយប៉ុស្ដិ៍នគរបាលច្រកទ្វារព្រំដែន អន្ដរជាតិប៉ោយប៉ែត ទៅជានាយប៉ុស្ដិ៍នគរបាលច្រកទ្វារព្រំដែន អន្ដរជាតិអូរយ៉ាដាវ។
នៅរសៀលថ្ងៃទី២០ ខែធ្នូ ឆ្នាំ២០១៩ នេះ មានរៀបចំពិធីប្រកាសផ្ទេរភារកិច្ច នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ក្រោមវត្តមានលោកនាយឧត្តមសេនីយ៍ ឃុន សំបូរ អគ្គនាយករងអន្តោប្រវេសន៍ តំណាងដ៏ខ្ពង់ខ្ពស់ លោក នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍, លោក ង៉ោ ម៉េងជ្រួន អភិបាលរងខេត្តបន្ទាយមានជ័យ, លោក មាស ច័ន្ទពិសិដ្ឋ ព្រះរាជអាជ្ញារង អមសាលាដំបូងខេត្តបន្ទាយមានជ័យ និងលោក ឧត្តមសេនីយ៍ឯក យូ សារុំ ប្រធាននាយកដ្ឋានច្រកទ្វារទី១ នៅប៉ុស្តិ៍នគរបាលច្រកទ្វារ ព្រំដែនអន្តរជាតិប៉ោយប៉ែត ខេត្តបន្ទាយមានជ័យ។
សូមបញ្ជាក់ថារឿងអាស្រូវរបស់លោកអ៊ី ចំរើន កាលនៅជានាយប៉ុស្ដិ៍នគរបាលច្រកទ្វារព្រំដែនអន្ដរជាតិអូរយ៉ាដាវ ធ្លាប់មានសារព័ត៌មានជាច្រើនបានចុះផ្សាយថាបានឃុបឃិតជាមួយក្រុមឈ្មួញឲ្យមានការដឹកជញ្ជូនឈើទៅប្រទេសវៀតណាមយ៉ាងអនាធិបតេយ្យបំផុត។ ចំណែកលោក ខឹម ចិត្រា កាលនៅជានាយប៉ុស្ដិ៍នគរបាលច្រកទ្វារព្រំដែន អន្ដរជាតិប៉ោយប៉ែត ក៏មានភាពមិនប្រក្រតី ជាច្រើន ដោយព័ត៌មានក៏ធ្លាប់ផ្សាយថា ឃុបឃិតគ្នាជាមួយមន្ត្រីរបស់ខ្លួន យកលុយធ្វើប័ណ្ណផាសពលករខ្មែរ ទៅប្រទេសថៃលើសសៀវភៅបន្ទុកផងដែរ៕
អត្ថបទ៖ សៀមរាបប៉ុស្តិ៍
