រដ្ឋាភិបាលថៃ បានបង្ហាញគម្រោងក្នុងការផ្តល់កម្ចីជាទឹកប្រាក់ប្រមាណជា ១,២ពាន់លានបាត ស្មើនឹង ៤០លានដុល្លារអាមេរិកដល់កម្ពុជា ដើម្បីសាងសង់ផ្លូវប្រវែង ១៣១គីឡូម៉ែត្រ កាត់តាមស្រុកអន្លង់វែង ខេត្តឧត្តមានជ័យ មកខេត្តសៀមរាប។ នេះបើយោងតាមសេចក្តីរាយការណ៍របស់កាសែត បាងកកប៉ុស្តិ៍ របស់ថៃ នាថ្ងៃទី២៣ ខែធ្នូ ឆ្នាំ២០១៩ នេះ។
ការផ្តល់កម្ចីថ្មីសម្រាប់កម្ពុជានេះ គឺជាផ្នែកមួយនៃកម្ចីសរុបចំនួន ៨,៥ ពាន់លានបាត ស្មើនឹង ២៨១,៧ លានដុល្លារអាមេរិក ដែលថៃគ្រោងផ្តល់កម្ចីនៅឆ្នាំ២០២០ ដល់ប្រទេសមីយ៉ាន់ម៉ា ឡាវ និងកម្ពុជា ដើម្បីសាងសង់ផ្លូវឆ្លងដែនថ្មីចំនួន ៤ ក្រោមគំនិតផ្តួចផ្តើមតភ្ជាប់អាស៊ាន។
លោក Perames Vudthitornetiraks ប្រធានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង បានគូសបញ្ជាក់ថា អត្រាការប្រាក់សម្រាប់គម្រោងផ្លូវនីមួយៗ គឺមានត្រឹមតែ ០,១ ភាគរយប៉ុណ្ណោះ។ក្នុងនោះ រដ្ឋាភិបាលថៃ នឹងត្រូវបានស្នើសុំឱ្យធ្វើការអនុម័ត លើកម្ចីសម្រាប់ការអភិវឌ្ឍហេដ្ឋារចនាសម្ព័ន្ធនេះ ដើម្បីដំណើរការផ្តល់កម្ចីនៅឆ្នាំក្រោយ (២០២០)។
ឆ្លើយតបនឹងតម្រូវការជាក់ស្តែង និងដោយយោងតាមសេចក្តីព្រាងច្បាប់ថវិកាជាតិ ដែលត្រូវបានរដ្ឋសភា អនុម័តកាលពីចុងខែវិច្ឆិកា ឆ្នាំ២០១៩ កន្លងទៅ គឺនៅឆ្នាំ២០២០ ខាងមុខ រាជរដ្ឋាភិបាលកម្ពុជា គ្រោងទទួលកម្ចី ១,៤ ពាន់លាន SDR (ជិត ២ពាន់លានដុល្លារអាមេរិក) ដើម្បីបំពេញគម្រោងចំណាយថវិកាជាតិសរុប ៨,២ពាន់ លានដុល្លារអាមេរិក។
សូមជម្រាបថា គិតត្រឹមខែមិថុនាឆ្នាំ ២០១៩ បំណុលសាធារណៈរបស់កម្ពុជា មានសរុប ៧,២ ពាន់លានដុល្លារអាមេរិក ក្នុងនោះ បំណុលពាក់កណ្តាល ជាកម្ចីពីប្រទេសចិន៕
អត្ថបទ៖ clicknews
