ក្រសួងកសិកម្ម និងអភិវឌ្ឍន៍ជនបទនៃប្រទេសវៀតណាម បានទទួលភ្លើងខៀវពីក្រសួងកសិកម្ម រុក្ខាប្រមាញ់ និងនេសាទ នៃប្រទេសជប៉ុន កាលពីថ្ងៃទី១៧ ខែធ្នូ ឆ្នាំ២០១៩ ដើម្បីឱ្យផ្លែគូលែនស្រស់របស់វៀតណាម អាចនាំចូលទៅកាន់ទីផ្សារនៅក្នុងប្រទេសជប៉ុន។
ផ្លែគូលែនស្រស់ដំបូងដែលត្រូវបានដាំដុះនៅក្នុងប្រទេសវៀតណាម នឹងត្រូវនាំចូលទៅកាន់ប្រទេសជប៉ុន ចាប់ពីឆ្នាំ២០២០តទៅ បន្ទាប់ពីការចរចារវាងភាគីវៀតណាម និងជប៉ុន ដែលប្រើប្រាស់អស់ពេល ៥ឆ្នាំ អមដោយការពិសោធន៍ ដោយអ្នកជំនាញជប៉ុនលើផ្លែគូលែនរបស់វៀតណាម។
ជប៉ុន បានតម្រូវឱ្យវៀតណាម វេចខ្ចប់ប្រកបដោយអនាម័យ និងស្ដង់ដារបស់ខ្លួន ដោយត្រូវមានមន្ត្រីជប៉ុនប្រចាំការនៅទីតាំងវេចខ្ចប់ផងដែរ។មុននាំទៅជប៉ុន ផ្លែគូលែនរបស់វៀតណាម ត្រូវបាននាំទៅកាន់បណ្ដាប្រទេសមួយចំនួនផងដែរ ដូចជា ចិន ឡាវ កម្ពុជា ថៃ សហរដ្ឋអាមេរិក សហភាពអឺរ៉ុប និង ប្រទេសអូស្ត្រាលី។
គួរបញ្ជាក់ថា នៅឆ្នាំ២០១៩ វៀតណាម នាំចេញផ្លែគូលែនស្រស់ ជាង ១សែនតោន ទៅកាន់ទីផ្សារខាងលើ។ នេះជាការចុះផ្សាយរបស់សារព័ត៌មានក្នុងស្រុក VietNamNet៕
អត្ថបទ៖ clicknews
