ក្នុងពិធីសម្ពោធផ្សារដោះដូរទំនិញកម្ពុជា-វៀតណាម(ផ្សារគំរូព្រំដែន កម្ពុជា) នៅព្រំដែនកម្ពុជា-វៀតណាម ខេត្តត្បូងឃ្មុំ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ លើកឡើងថា ក្រោយពេលដែលបានដាក់ចេញនយោបាយឈ្នះឈ្នះរួចមក គោលដៅរបស់សម្តេចគឺមាន២ចំណុចសំខាន់ៗ ដែលក្នុងនោះ ១)ប្រែក្លាយតំបន់សមរភូមិ ទៅជាតំបន់អភិវឌ្ឍន៍ និងតំបន់ទីផ្សារ និង ២) ប្រែក្លាយតំបន់ព្រំដែន ជាមួយប្រទេសជិត ខាងឲ្យទៅជាតំបន់ដែលមានសន្តិភាព សាមគ្គីភាព និងកិច្ចសហប្រតិបត្តិការល្អ។
ស្របគ្នានេះ សម្តេចតេជោ ហ៊ុន សែន បានរំលឹកឱ្យដឹងថា តំបន់ផ្សារដោះដូរទំនិញកម្ពុជានិងវៀតណាមនៅព្រំដែនកម្ពុជា-វៀតណាម ដែលសម្ពោធនាពេលនេះ គឺជាកន្លែងដែលសម្តេចធ្លាប់ប្រយុទ្ធក្នុងសមរភូមិមិនតិចជាង២០ដងនោះទេ។ សម្តេចតេជោហ៊ុន សែន បន្តមានប្រសាសន៍ថា ពីអតីតកាលកម្ពុជា និងវៀតណាមផ្លោងគ្រាប់ដាក់គ្នា តែបច្ចុប្បន្នផ្លោងទំនិញដាក់គ្នាទៅវិញទៅមក។
សម្តេចតេជោ ហ៊ុន សែន បានសង្កត់ធ្ងន់ថារាជរដ្ឋាភិបាលកំពុងប្រែក្លាយតំបន់ព្រំដែនទាំងអស់ទៅជាតំបន់សន្តិភាព មិត្តភាព កិច្ចសហប្រិបត្តិការនិងអភិវឌ្ឍន៍៕
អត្ថបទ៖ swiftnews
