ក្រុមអាជីវករលក់ដូរនៅផ្សារកំពង់ធំបានសម្ដែងនូវការមិនសប្បាយចិត្តទៅនឹងអាជ្ញាធរក្រុងស្ទឹងសែន ដែលបានចុះចាប់សម្ភារ:របស់គាត់ យកទៅជាងមួយខែហើយ មិនព្រមប្រគល់ឲ្យពួកគាត់វិញ។ក្រុមអាជីវករក៏ដូចជាប្រជាពលរដ្ឋ បាននិយាយប្រាប់អ្នកសារព័ត៌មានថា ពួកលោកគាំទ្រយ៉ាងពេញទំហឹងចំពោះគោលការណ៍របស់សាលាក្រុងស្ទឹងសែន ក្នុងការរៀបចំសណ្តាប់ធ្នាប់ ដើម្បីកែលម្អរសោភ័ណភាពក្រុង ឲ្យបានល្អនោះ។
អាជីវបានឲ្យដឹងថាការដែលសាលាក្រុងស្ទឹងសែនចាប់យកសម្ភារ:របស់របរលក់ដូររបស់ពួកគាត់ទៅអស់រយ:ពេលជាង១ខែហើយ យកទៅទុកចោល ពិន័យក៏មិនឃើញការពិន័យ ប្រគល់សម្ភារ:ទាំងអស់នោះ មកឲ្យពួកគាត់វិញក៏មិនប្រគល់ឲ្យ នឹងបានពួកគាត់យកសម្ភារ:ទាំងនោះ ទៅប្រកបរបរអាជីវកម្មលក់ដូរបន្តរទៀត គ្រាន់បានប្រាក់ចិញ្ចឹមក្រពះដែលកំពុងតែស្រែកឃ្លានរាល់ថ្ងៃនេះ! ។
ក្រុមអាជីវកបានបញ្ជាក់ថាការចាប់យកឥវ៉ាន់របស់ពួកគាត់តាំងពីថ្ងៃទី០៧ ខែវិច្ឆិកា ឆ្នាំ២០១៩ រហូតមកដល់ថ្ងៃទី២៣ ខែធ្នូ ឆ្នាំ២០១៩ រយ:ពេលជាង១ខែមកហើយ នៅមិនទាន់ប្រគល់ឲ្យវិញនោះទេ ដែលជាហេតុធ្វើឲ្យសម្ភារ:មួយចំនួនរបស់ពួកគាត់ត្រូវរលួយខូចអស់. ពួកគាត់ឆ្ងល់ណាស់ថាចាប់យកទៅទុករាប់ខែ មិនព្រមប្រគល់ឲ្យមកពួកគាត់វិញយ៉ាងដូច្នេះ? ឬមួយក៏សម្ភារ:ដែលបានចាប់យកទៅនោះ ត្រូវរសាត់បាត់អស់ទៅហើយឬ? ។
បញ្ហាខាងលើនេះ លោក គង់ វុទ្ធី នាយករដ្ឋបាលបានសាលាក្រុងស្ទឹងសែនបានប្រាប់អ្នកសារព័ត៌មានថាកាលនោះ លោកបានដឹកនាំកម្លាំងចម្រុះចុះរៀបចំសណ្តាប់ធ្នាប់ជុំវិញផ្សារកំពង់ធំ រយ:ពេលមួយព្រឹកជំនួសមុខឲ្យលោក ពេញ កែម អភិបានរងក្រុងស្ទឹងសែន ទទួលបន្ទុកខាងផ្សារ ដោយតែលោកជាប់រវល់ប្រជុំ ក្នុងនោះក៏បានដកហូតយកសម្ភារ:របស់បងប្អូនអាជីវករច្រើននាក់ យកមករក្សាទុកនៅសាលាក្រុង និងបានប្រគល់ ឲ្យទៅខាង លោកអភិបាលរង ពេញ កែម រួចអស់ហើយ នៅរសៀលថ្ងៃដដែល។ ចំណែករឿងប្រគល់សម្ភារ:ដែលចាប់មកនោះ ឲ្យទៅខាងអាជីវករវិញពេលណានោះ ស្ថិតនៅលើលោកអភិបាលក្រុងទើបមានសិទ្ធសម្រេច ។
ចំណែកលោក ពេញ កែម ដែលជាអភិបាលរងក្រុងស្ទឹងសែន បានប្រាប់អ្នកសារព័ត៌មានថាជុំវិញបញ្ហាចាប់យកសម្ភារ:របស់បងប្អូនអាជីវករនៅក្នុងការរៀបចំសណ្តាប់ធ្នាប់ផ្សារកំពង់ធំខាងលើនេះ យោងតាមគោលការណ៍មេក្រុង គឺមិនប្រគល់សម្ភារ:ជូនគាត់វិញទេ ដើម្បីឲ្យពួកគាត់រៀងចាល ពីព្រោះពិបាករៀបចំពេក ដូចវែកចក ហើយទ្រព្យសម្បត្តិដែលចាប់មកទាំងអស់នោះ ត្រូវបានទុកជារបស់សាលាក្រុងស្ទឹងសែន.
ពាក់ព័ន្ធករណីនេះចំណែកលោក ម៉ាក់ ប៊ុនហុង អភិបាលក្រុងស្ទឹងសែន បានថ្លែងប្រាប់អ្នកសារព័ត៌មានថា បញ្ហារឿងចាប់យកសម្ភារ:របស់បងប្អូនអាជីវករ យកមករក្សាទុកនេះ រយ:ពេលជាង១ខែមកហើយ ដោយសារតែលោកជាប់រវល់មមាញឹកក្នុងការងារពេក ទើបធ្វើឲ្យខកពេលយូរបន្តិច។សាលាក្រុងនឹងប្រគល់ជូនសម្ភារ:ទាំងអស់នោះជូនពួកគាត់វិញក្នុងពេលឆាប់ៗនេះ ដោយគ្រាន់តែតម្រូវឲ្យពួកគាត់ធ្វើកិច្ចសន្យាជាមួយនឹងសាលាក្រុង សូមកុំឲ្យដាក់តាំងទំនិញលក់ដូរហ៊ៀហូរមកលើចំណីផ្លូវតទៅទៀតតែប៉ុណ្ណោះ ដែលជាហេតុធ្វើឲ្យបាត់បង់សណ្តាប់ធ្នាប់ សោភ័ណភាព និងសេចក្តីថ្លៃថ្នូរ ក៏ដូចជាមុខមាត់របស់ក្រុងស្ទឹងសែន ផងដែរ៕
អត្ថបទ៖ សៀមរាបប៉ុស្តិ៍
