រដ្ឋាភិបាលវៀតណាមប្រកាសធ្វើកំណែទម្រង់ឱ្យកាន់តែប្រសើរឡើង រួមទាំងការផ្គត់ផ្គង់ទឹកភ្លើង និងកែប្រែវិស័យជាច្រើនទៀត ដើម្បីទាក់ទាញអ្នកវិនិយោគទុនឱ្យបានច្រើនជាងគេនៅក្នុងតំបន់អាស៊ាន។
នៅក្នុងវេទិកាធុរកិច្ចដែលជជែកពិភាក្សាជាមួយអ្នកជំនួញ កាលពីម្សិលមិញ ក្នុងទីក្រុងហាណូយ នាយករដ្ឋមន្ត្រីវៀតណាម លោក ង្វ្រៀន សួនហ្វុក បានលើកឡើងពីគោលនយោបាយធ្វើយ៉ាងណាប្រកួតប្រជែងចាប់យកអ្នកវិនិយោគឱ្យបានច្រើនជាងគេ។
នាយករដ្ឋមន្ត្រីរូបនេះ បានបញ្ជាទៅឧបនាយករដ្ឋមន្ត្រី និងរដ្ឋមន្ត្រីពាក់ព័ន្ធជាច្រើនរូបទៀត ឱ្យបង្ហាញរបាយការណ៍ពីបញ្ហាប្រឈម និងវិធីសាស្ដ្រថ្មី ក្នុងការជួយដល់ក្រុមហ៊ុនដែលកំពុងតែបោះទុននៅក្នុងប្រទេសវៀតណាម។
ចំណុចទី១ លោកបានបញ្ជាឱ្យមានការពិនិត្យលើការធ្វើកំណែទម្រង់រដ្ឋបាល ដំណើរការប្រមូលពន្ធក្នុងប្រទេស មន្ត្រីប្រមូលពន្ធតាមព្រំដែន ការផ្គត់ផ្គង់ទឹក និងអគ្គិសនី ដែលមានឥទ្ធិពលខ្លាំងក្នុងដំណើរការផលិត។
ចំណុចទី២ លោកជំរុញឱ្យមានការសិក្សាឱ្យបានទូលាយ ពីសម្ពាធបរិយាកាសសេដ្ឋកិច្ចខាងក្រៅ និងបរិបទពិភពលោកធ្វើឱ្យសេដ្ឋកិច្ចកំពុងតែធ្លាក់ចុះ ការធ្វើសមាហរណកម្មសេដ្ឋកិច្ចថ្នាក់ជាតិ និងបដិវត្តន៍ឧស្សាហកម្មក្នុងដំណាក់កាលទី៤។ លោកក៏បានស្នើឱ្យមានការរៀបចំផែនការរយៈពេល៥ឆ្នាំ ជួយដល់ក្រុមហ៊ុនឯកជនដែលកំពុងស្ថិតនៅក្នុងដំណាក់កាលប្រកួតប្រជែងយ៉ាងស្ងប់ស្ងាត់សារជាថ្មី។
ចំណុចទី៣ នាយករដ្ឋមន្ត្រីវៀតណាម ស្នើទៅក្រុមហ៊ុនទាំងអស់រៀបចំជាយន្តការកាន់តែងាយស្រួលក្នុងការសហការឱ្យរដ្ឋាភិបាលជួយដល់ពួកគេក្នុងតម្រូវការណាមួយ។
ចំណុចចុងក្រោយ លោកបានជំរុញដល់អ្នកជំនួញទាំងអស់ ប្រឹងប្រែងរករបកគំឃើញថ្មី ដើម្បីធ្វើឱ្យមានភាពកាន់តែប្រសើរឡើង ក្នុងការធ្វើការងាររួមគ្នារវាងក្រសួងស្ថាប័នរដ្ឋ និងសម្ព័ន្ធក្រុមហ៊ុនទាំងអស់ អាចផ្តល់ភាពជាគំរូ និងការអនុវត្តជាក់ស្ដែង។
ការកើនឡើងទុនវិនិយោគ កំពុងជួយឱ្យប្រសើរឡើងក្នុងការបង្កើតការងារ ពលរដ្ឋទទួលបានចំណូលកើនឡើង កាត់បន្ថយភាពក្រីក្រ និងធានាដល់ស្ថិរភាពសង្គមនៅវៀតណាម។
របាយការណ៍រដ្ឋាភិបាលវៀតណាមបង្ហាញថា ក្នុង១ឆ្នាំៗ ប្រទេសនេះទទួលបានក្រុមហ៊ុនថ្មីចូលវិនិយោគជាង១២៦ ០០០ក្រុមហ៊ុន ហើយក្នុងឆ្នាំ២០១៩នេះ រំពឹងថា មានក្រុមហ៊ុនចំនួន១៣៦ ០០០ក្រុមហ៊ុន ដែលទទួលបានទឹកប្រាក់ប្រមាណជាង៧៣ប៊ីលានដុល្លារអាមេរិក។
របាយការណ៍ធនាគារពិភពលោកកាលពីឆ្នាំ២០១៧ បង្ហាញថា វៀតណាមស្ថិតនៅក្នុងចំណាត់ថ្នាក់លេខ៧ ក្នុងចំណោមប្រទេសទាំង១០នៅអាស៊ានដែលមានបរិយាកាសល្អក្នុងការទាក់ទាញវិនិយោគិនបរទេស។
អត្ថបទ៖ VOD
