ក្រុមប្រឹក្សាខេត្តកណ្តាល បានប្តេជ្ញាខិតខំប្រឹងប្រែងដោះស្រាយរាល់បញ្ហាប្រឈមនានា ដោយរដ្ឋបាលខេត្តមិនយកឯកសារទុកលើតុ នឹងត្រូវដោះស្រាយជូននូវរាល់ទុក្ខកង្វល់ ក៏ដូចជាសំណូមពររបស់ប្រជាពលរដ្ឋផ្សេងៗ ដោយមិនទុកចន្លោះណាមួយ ពោលគឺដោះស្រាយតាមជំហ៊ានៗ ឲ្យមានប្រសិទ្ធភាព និងទាន់ពេល។
ឯកឧត្តម នួន ផា ប្រធានក្រុមប្រឹក្សាខេត្តកណ្តាល បានលើកឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកណ្ដាល លើកទី១ អាណត្តិទី៣ នៅសាលាស្រុកស្អាង ខេត្តកណ្តាល ថ្ងៃទី២៤ ខែធ្នូ នេះថា មកដល់ពេលបច្ចុប្បន្នរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី សម្តេចបានខិតខំអស់ពីកំលាំងកាយចិត្ត ដើម្បីជំរុញការអភិវឌ្ឍប្រទេសឲ្យមានការរីកចម្រើន ជាពិសេសនៅក្នុងអាណត្តិទី៣នេះ រាជរដ្ឋាភិបាលអនុវត្តន៍គោលនយោបាយ និងបានកំណែទម្រង់ជាច្រើនវិស័យ ក្នុងគោលដៅឲ្យកម្ពុជាឆ្ពោះទៅរកការអភិវឌ្ឍឥតឈប់ឈរ។
ឯកឧត្តម បន្តថា ចំពោះកង្វល់របស់ប្រជាពលរដ្ឋនៅតាមមូលដ្ឋាន ក្រុមប្រឹក្សាខេត្តនិងខិតខំប្រឹងប្រែងដោះស្រាយរាល់បញ្ហាប្រឈម និងសំណើរបស់ប្រជាពលរដ្ឋ ដើម្បីឆ្លើយតបភ្លាមៗនឹងទុក្ខកង្វល់ទាំងអស់ ក្នុងនោះរដ្ឋបាលខេត្តមិនយកឯកសារទុកលើតុ ពោល គឺត្រូវដោះស្រាយតាមជំហ៊ានៗ ឲ្យមានប្រសិទ្ធភាព និងទាន់ពេលជូនពលរដ្ឋ។
ថ្លែងក្នុងវេទិកាផ្សព្វផ្សាយនេះដែរ ឯកឧត្តម គីម រិទ្ធី អភិបាលរងខេត្តកណ្តាល បានជម្រាបជូន បងប្អូនប្រជាពលរដ្ឋថា រដ្ឋបាលខេត្តនឹងបន្តពង្រឹងយន្តការនៃការផ្ដល់សេវាសាធារណៈ តាមរយៈអង្គភាព និងការិយាល័យច្រកចេញចូលតែមួយរបស់រដ្ឋបាលក្រុង-ស្រុក ឲ្យបានកាន់តែប្រសើរឡើង ក្នុងការផ្ដល់សេវាជូនប្រជាពលរដ្ឋ ពង្រឹងលើការអនុវត្តគោលនយោបាយភូមិឥឃុំមានសុវត្ថិភាព ជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់ ជាពិសេស នឹងបន្តអប់រំផ្សព្វផ្សាយពីការគ្រប់គ្រង និងទុកដាក់សំរាមកាកសំណល់ដើម្បីធានាបាននូវបរិស្ថានល្អផងដែរ។អូ
ជាលទ្ធផលក្នុងវេទិកានេះ មានប្រជាពលរដ្ឋសំណូមពរជាច្រើនបញ្ហា ក្នុងនោះពាក់ព័ន្ធបញ្ហាស្នើសុំចាក់គ្រោះថ្មដើម្បីសម្រួលផ្លូវចូលក្នុងភូមិ, ការស្នើសុំស្ថាបនាផ្លូវបេតុង, ស្នើសុំទឹកស្អាតដើម្បីប្រើប្រាស់, ស្នើសុំដាក់លូតាមផ្លូវ, ស្នើសុំដាក់បង្គោលភ្លើង, បញ្ហាបាក់ច្រាំងទន្លេ, ស្នើសុំស្តារប្រឡាយមួយខ្សែ។ល។ ដែលបញ្ហាទាំងនេះត្រូវបានរដ្ឋបាលខេត្ត ស្រាយបំភ្លឺនិងទទួលយកដើម្បីពន្លឿនក្នុងការដោះស្រាយ៕
អត្ថបទ៖ btv
