អតីតមន្ត្រីក្រសួងការពារជាតិ លោកផែង វណ្ណៈ បានគាំទ្រចំពោះការលើកឡើងរបស់រដ្ឋមន្ត្រីក្រសួងអប់រំ ដែលបានហាមប្រាមមិនអនុញ្ញាតអោយសិស្សានុសិស្ស និយាយគ្នារឿងនយោបាយក្នុងសាលារៀនបាន ព្រោះជាទង្វើខុសច្បាប់។កាលលើកឡើងរបស់លោកផែង វណ្ណៈ ត្រូវបានធ្វើឡើងកាលពីថ្ងៃទី២៤ ខែធ្នូ ឆ្នាំ២០១៩ នៅលើទំព័រហ្វេសប៊ុករបស់លោក។
លោកផែង វណ្ណៈ បានលើកឡើងយ៉ាងដូច្នេះថា៖ គាំទ្រ ឯកឧត្ដម ពេញទំហឹង ព្រោះនៅសាលា ឈេីតុំ ស្រុក ក្រគរ ខេត្តពោធិ៍សាត់ គ្រូបង្រៀន ដែលគេដូរចេញ ព្រោះតែ បំពាក់បំប៉ននយោបាយអោយសិស្សនៅក្នុងថ្នាក់ ។ បេីចង់ធ្វេីនយោបាយ ឈប់បង្រៀនសិស្ស ទៅធ្វើនយោបាយទៅ ។
សូមរំលឹកថា រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ថា សិស្សមិនអាចជជែកគ្នាអំពីរឿងនយោបាយនៅក្នុងសាលារៀនបានទេ ព្រោះជាការហាមឃាត់ដោយច្បាប់ ។ នេះបើតាមលោកពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សា និងពិគ្រោះយោបល់ ។
លោកពេជ្រ ស្រស់ បានឲ្យដឹងថា ការបញ្ជាក់ថា បន្ទាប់ពីសមាជិកឧត្តមក្រុមប្រឹក្សានឹងពិគ្រោះយោបល់សួរក្នុងកិច្ចប្រជុំ កាលពីថ្ងៃទី២៣ ខែធ្នូនេះ លោកហង់ ជួនណារ៉ុន រដ្ឋមន្ត្រីក្រសួងអប់រំបានបញ្ជាក់ថា«សិស្សមិនអាចជជែកគ្នាបានទេ អំពីរឿងនយោបាយនៅក្នុងសាលារៀន ពីព្រោះច្បាប់បានហាមឃាត់ ហើយកន្លែងសាលារៀន គឺជាកន្លែងអព្យាក្រឹត ដូច្នេះបើចង់ឲ្យសិស្សជជែកគ្នាអំពីរឿងនយោបាយបាននៅក្នុងសាលារៀនគឺ ត្រូវវិសោធនកម្មច្បាប់ហាម ឃាត់នោះចោលជាមុនសិន» ។
ពាក់ព័ន្ធនឹងការនឹងសំណួរស្វែងរកសាធាតុញៀននៅតាមសាលារៀនវិញ លោកពេជ្រ ស្រស់ក៏បានឲ្យដឹងថា ក្នុងកិច្ចប្រជុំលោករដ្ឋមន្ត្រីក្រសួងអប់រំបានលើកឡើងថា សាលារៀនគ្មាន លុយ ដើម្បីពិនិត្យទឹកនោម ស្វែងរកសារធាតុញៀនក្នុងខ្លួនសិស្សបានទេ ហើយក៏ត្រូវបង្កើតច្បាប់ ដើម្បីពិនិត្យទឹកនោមសិស្សក្នុងការស្វែងរកនូវសារធាតុញៀនលើខ្លួនសិស្ស ដោយរដ្ឋមន្ត្រីបានអះអាងថា បើពិនិត្យទឹកនោមរបស់សិស្ស ដើម្បីស្វែងរកសារធាតុញៀន គឺប៉ះពាល់សិ ទ្ធិរបស់សិស្ស ។ លោកក៏បានលើកឡើងថា ចំពោះការទាមតម្លើងនូវប្រាក់ខែជូនលោកគ្រូ អ្នកគ្រូ គឺមិន អាចធ្វើបាននោះទេ ដោយសាររដ្ឋាភិបាលគ្មានលុយ ។
សូមជម្រាបថា បើតាមលោកពេជ្រ ស្រស់ បានសរសេរលើបណ្តាញសង្គម កាលពីថ្ងៃទី២៣ ធ្នូ កន្លងមក លោកបានសួរទៅកាន់លោករដ្ឋមន្ត្រីក្រសួងអប់រំចំនួន៦សំណួរដូចជា ៖ ១. សុំឲ្យសិស្សសាលាមានសិទ្ធិពេញលេញនៅក្នុងការជជែកគ្នាពីរឿងនយោបាយពេលម៉ោងសម្រាកក្នុងសាលារៀន បើពួកគេចង់ជជែកគ្នា ។ ២. កំណត់ស្ថានភាពជាក់ស្តែងក្នុងការរៀនគួរ និងគួរបញ្ឈប់ការរៀនគួរពីថ្នាក់បឋមដល់ថ្នាក់វិទ្យាល័យ ហើយងាកមកពង្រឹងគុណភាពនៃការបង្រៀនក្នុងម៉ោងរបស់រដ្ឋវិញ ពីព្រោះថា ការរៀនគួរខុសរបៀបបែបនេះ គឺធ្វើឲ្យមាតាបិតាសិស្សគ្មានលទ្ធភាពបញ្ជូនកូនឲ្យទៅរៀន ដោយហេតុកូនសិស្សត្រូវគ្រូបង្ខំឲ្យរៀនគួរ តាមរយៈការដាក់ពិន្ទុទាប ឬធ្លាក់តែម្តង បើសិនជាកូនសិស្សនោះមិនរៀនគួរ កត្តានេះធ្វើឲ្យកូនសិស្សជំរិតទារប្រាក់ពីឪពុកម្តាយយកទៅរៀនគួរ ។
៣.បង្កើតនូវកម្មវិធីពិនិត្យទឹកនោមសិស្សនៅថ្នាក់អនុវិទ្យាល័យ និងវិទ្យាល័យ ដើម្បីស្វែងរកសារធាតុញៀនរៀងរាល់៣ខែម្តងសំរាប់ជំហ៊ានដំបូង គឺដើម្បីបង្ការ និងទប់ស្កាត់សិស្សសេពគ្រឿងញៀន ។ ៤.រឹតបន្តឹងការប្រឡងបញ្ចប់ថ្នាក់ទី៩ ដើម្បីពង្រឹងសមត្ថភាពសិស្សពីថ្នាក់អនុវិទ្យាល័យទៅក្នុងការធានានូវគុណភាពនៃការសិក្សារបស់សិស្ស និងបង្កើនគុណភាពធនធានមនុស្ស នៅក្នុងប្រទេសកម្ពុជាយើងផងដែរ ។
៥.ពង្រឹងគុណភាពរបស់គ្រូបង្រៀននៅក្នុងម៉ោងបង្រៀនរដ្ឋ ដើម្បីលុបបំបាត់ការបង្រៀនសិស្សក្រៅម៉ោងយកលុយខុសរបៀប ជាហេតុធ្វើឲ្យឪពុកម្តាយរបស់សិស្សកាន់តែក្រីក្រទៅៗ នាំឲ្យពួកគាត់បញ្ឈប់កូនមិនឲ្យទៅរៀនបន្តទៀតទេ ។ ៦.ខ្ញុំស្នើសុំរដ្ឋមន្ត្រីក្រសួងអប់រំជួយតម្លើងប្រាក់ខែជូនដល់លោកគ្រូ អ្នកគ្រូយ៉ាងតិច គឺ ២លានរៀលក្នុង១ខែ ដើម្បីលុបបំបាត់នូវការយកថវិកាពីកូនសិស្សមិនសម ហេតុផលនៅបណ្តាសាលារៀនមួយចំនួន នឹងដើម្បីបង្កើននូវគុណភាពនៃការបង្រៀនរបស់លោកគ្រូ អ្នកគ្រូ ព្រមទាំងមានហេតុផលដាក់ទណ្ឌកម្មទៅលើលោកគ្រូ អ្នកគ្រូណាមួយមិនខំយកចិត្តទុកដាក់ក្នុងការបង្រៀនកូនសិស្សនៅក្នុងម៉ោងរដ្ឋ……៕
