អ្នកស្រីអេង តុលា រស់នៅភូមិលាវ ឃុំព្រែកលាវ ស្រុកកងមាស ខេត្តកំពង់ចាម ជាកសិករដាំស្ពៃក្រញាញ់នៅក្នុងទំហំផ្ទៃដីទទឹង២០ម៉ែត្រនិងបណ្តោយ១០០ម៉ែត្រ បានសម្រេចចិត្តដកស្ពៃរបស់ខ្លួនអស់ជិត២តោនចោល អ្នកស្រីបានលើកឡើងថាមូលហេតុដែលអ្នកស្រីដកស្ពៃក្រញាញ់ចោលដោយសារតែស្ពៃឈ្មួញឲ្យតម្លៃថោក ថែមទាំងគ្មានអ្នកទិញទៀត ដោយអ្នកស្រីលក់វាបានតម្លៃត្រឹមតែ៣០០៛ ក្នុង១គីឡូក្រាម ផ្ទុយពីការប្រមូលផលកន្លងមកដែលអ្នកស្រីលក់បានតម្លៃពី២០០០ទៅ៤០០០រៀល ក្នុងមួយគីឡូក្រាម។
អ្នកស្រីបានរៀបរាប់ឲ្យដឹងថា ក្នុងទំហំដីដែលអ្នកស្រីបានដាំអាចផ្តល់ទិន្នផលជាប្រចាំខែដល់អ្នកស្រីតុលា ជិត៣តោន ប៉ុន្តែសម្រាប់ចុងវិច្ឆិកា និងខែធ្នូ ឆ្នាំ២០១៩នេះ អ្នកស្រី អេង តុលា បានដកស្ពៃនោះចោលអស់១,៨តោន ព្រោះគ្មានឈ្មួញកណ្តាល មកបញ្ជាទិញ ដូចសព្វដង។ អ្នកស្រីបានបន្តទៀតថា ជាទូទៅស្ពៃក្រញាញ់កសិករចំណាយពេលតែមួយខែប៉ុណ្ណោះ ស្ពៃក្រញាញ់នោះមានរូបរាងល្អ ហើយអាចកាត់លក់បានហើយ ប៉ុន្តែ បើកសិករទុកឈានដល់រយៈពេលចាប់ពីមួយខែ៣ថ្ងៃ ស្ពៃនោះ នឹងចាប់ផ្តើមរោល និងហូបលែងកើត។ ដូច្នេះ បើគ្មានអ្នកទិញ ក្នុងចន្លោះពេលវាមានអាយុមួយខែ ស្ពៃនោះត្រូវកាត់ឬដកចោល តែម្តង។
អ្នកស្រីបានលើកឡើងថា «ពេលស្ពៃក្រញាញ់ថ្លៃ មានឈ្មួញដណ្តើមគ្នាទិញ តែពេលស្ពៃថោក គ្មានឈ្មួញមកទិញទៅវិញ។ បន្លែត្រូវកាត់រាប់រយគីឡូ តើខ្ញុំយកទៅលក់នៅឯណាអស់ ពេលនេះ ស្ពៃហ្នឹងកុំថាឡើយមួយគីឡូ៥០០រៀល តែមួយគីឡូ៣០០រៀល ក៏ខ្ញុំកាត់លក់ឱ្យដែរ ព្រោះខ្ញុំមិនដឹងយកទៅលក់នៅណា បើស្ពៃយើងដល់អាយុកាត់លក់ហើយ។ ស្ពៃតម្លៃ៣០០រៀល ក្នុងមួយគីឡូហើយ វាគ្មានអ្នកទិញទៀត… គឺខាតលែងនិយាយតែម្តង» ៕
អត្ថបទ៖ KBN
