ទីបំផុត លោកចោរជិះកង់ ឆក់ទូរស័ព្ទពីនារីជិះម៉ូតូម្នាក់ ដែលនាងឈប់ទិញម្ជូរហូបមុខក្លោងទ្វារវត្តស្ទឹងមានជ័យ ត្រូវបានសមត្ថកិច្ចតាមចាប់បាន ក្រោយរត់គេចខ្លួនបានរយៈពេល២ថ្ងៃ ។
ជនសង្ស័យមានឈ្មោះ ទៀង វិសាល ហៅចាស់ អាយុ២៨ឆ្នាំ មានទីលំនៅផ្ទះជួលផ្លូវលំ ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ មុខរបរ មិនពិតប្រាកដ (មានសារធាតុញៀនក្នុងខ្លួន) ។ ចំណែកនារីរងគ្រោះឈ្មោះ ឆាយ មិថុនា អាយុ១៦ឆ្នាំ មានទីលំនៅផ្ទះជួលផ្លូវលំ ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ មុខរបរសិស្ស ។
របាយការណ៍សមត្ថកិច្ច អោយដឹងថា មុនពេលកើតហេតុ កាលពីវេលាម៉ោង១១ និង៣០នាទីយប់ថ្ងៃទី២៣ ខែធ្នូ ឆ្នាំ២០១៩ ជនរងគ្រោះឈ្មោះ ឆាយ មិថុនា បានឈប់ម៉ូតូ ឈរទិញម្ជូរនៅចំណុចមុខ វត្តចង្ក្រានតាព្រហ្មស្ទឹងមានជ័យ ផ្លូវមុនីរ៉េត ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ ដោយបានកាន់ទូរស័ព្ទដៃ ១គ្រឿងម៉ាកហូវៃ ពណ៌ទឹកមាស ស្រាប់តែលេចជនសង្ស័យម្នាក់បានជិះកង់មួយគ្រឿងម៉ាក X-TREME ពណ៌ខ្មៅ មកពីក្រោយនាង ធ្វើសកម្មភាពឆក់យកទូរស័ព្ទដៃ១គ្រឿង រួចហើយជិះកង់គេចបាត់ លុះមកដល់ថ្ងៃទី២៥ ខែធ្នូ ឆ្នាំ២០១៩ វេលាម៉ោង១១ កម្លាំងនគរបាលប៉ុស្តិ៍ស្ទឹងមានជ័យទី១ បានស្រាវជ្រាវឃាត់ខ្លួនជនសង្ស័យឈ្មោះ ទៀង វិសាល នៅចំណុចផ្លូវបេតុង ភូមិមានជ័យ១ សង្កាត់ ស្ទឹងមានជ័យទី១ ខណ្ឌមានជ័យ យកមកសាកសួរចាត់ការតាមច្បាប់តែម្តង ។
ប្រជាពលរដ្ឋរស់នៅក្នុងសង្កាត់ស្ទឹងមានជ័យទី១ មានការព្រួយបារម្ភ ដែលក្នុងភូមិសាស្ត្រនោះវាជាគោលនៃក្រុមចោរឆក់ធ្វើសកម្មភាពជាញឹកញាប់ ជាក់ស្តែងនារីវ័យក្មេងម្នាក់ ជិះម៉ូតូចេញពីធ្វើការបំណងទៅផ្ទះ ពេលមកដល់មុខក្លោងទ្វារ វត្តស្ទឹងមានជ័យ នាងបានឈប់ទិញម្ជូរហូប ស្រាប់តែលេចមុខជនសង្ស័យម្នាក់ ជិះកង់ ធ្វើសកម្មភាពជិះមកពីក្រោយ ឆក់ទូរស័ព្ទដៃម៉ាក oppo មួយគ្រឿងពីដៃ នារីរងគ្រោះ រួចហើយជិះគេចខ្លួនបាត់តែម្ដង នោះនាងស្រែកឲ្យគេជួយដែរ ប៉ុន្តែគ្មានអ្នកណាជួយចាប់ចោរនោះទេ ។
ហេតុការណ៍នេះ កើតឡើងកាលពីវេលាម៉ោង១១ និង៣០នាទីយប់ថ្ងៃទី២៣ ខែធ្នូ ឆ្នាំ២០១៩ នៅម្តុំវត្តស្ទឹងមានជ័យ សង្កាត់ស្ទឹងមានជ័យទី១ ខណ្ឌមានជ័យ ។
បើតាមប្រជាពលរដ្ឋម្តុំនោះ លួចបង្ហើបថា ជនសង្ស័យ មិននៅឆ្ងាយនោះទេ ពោលគឺសម្បូរណាស់នៅម្តុំវត្តស្ទឹងមានជ័យ តែម្តង ហើយករណីចោរឆក់ទ្រព្យសម្បត្តិ មានជាញឹកញាប់ណាស់ តែមិនដែលឃើញមានសមត្ថកិច្ចបង្ក្រាបបានម្តងណាឡើង ។
ក្រោយកើតហេតុ ជនរងគ្រោះ បានត្រឹមតែទៅដាក់ពាក្យបណ្តឹងប៉ុណ្ណោះ ខណ:គ្មានសង្ឃឹមថា សមត្ថកិច្ចនឹងអាចតាមចាប់ជនសង្ស័យនិងយកទូរស័ព្ទបានមកវិញទេ ៕
អត្ថបទ៖ KBN
