នៅព្រឹកព្រលឹមថ្ងៃទី២៨ ខែធ្នូ នេះ មានករណីគ្រោះថ្នាក់ចរាចរណ៍មួយកើតឡើង លើកំណាត់ផ្លូវលេខ៤ ចន្លោះគីឡូម៉ែត្រលេខ ៤៨-៤៩ ត្រង់ចំណុចភូមិព្រៃស្លឹក សង្កាត់ច្បារមន ក្រុងច្បារមន ខេត្តកំពង់ស្ពឺ បង្កដោយរថយន្តដឹកទំនិញកុងទីន័រមួយគ្រឿង ម៉ាក Hino ក្បាល ពណ៌ស ស្លាកលេខភ្នំពេញ 3E-5215 បានដាច់ទូរកុងទែន័រ ធ្លាក់មកលើដី ប៉ុន្ដែបានធ្លាក់លើចិញ្ចើមថ្នល់ដីក្រហម សំណាងល្អមិនបង្កគ្រោះថ្នាក់ដល់អាយុជីវិតអ្នកដំណើរ នៅវេលាម៉ោង ៤៖៤៥នាទីព្រឹក។
រថយន្ដដឹកទំនិញកុងទែន័រនេះបើកបរក្នុងល្បឿនលឿន ហើយជួបនឹងរថយន្ដមួយគ្រឿងបើកបញ្រ្ចាសទិសគ្នាក៏គេចចូលវិញដោយការបាត់ម្ចាស់ការធ្វើអោយរថយន្ដគ្រវីគ្រវ័តបណ្តាលអោយធ្លាក់ទូរកុងទែន័រតែម្ដង គាប់ជួនពេលនោះគ្មានរថយន្ដឬអ្នកធ្វើដំណើរ ទើបមិនបណ្តាលអោយគ្រោះថ្នាក់ដល់អាយុជីវិតមនុស្ស។ នេះបើតាមការបញ្ជាក់ពីលោកវរសេនីយ៍ឯក អ៊ូច ហៀង អធិការក្រុងច្បារមន។
បច្ចុប្បន្ន សមត្ថកិច្ចនគរបាលកំពុងជួយសម្របសម្រួលនៅគោលដៅកើតហេតុខាងលើ ហើយធ្វើការស្ទួចយករថយន្ដ និងទូកុងទែន័រចេញដើម្បីចំណាត់ការនីតិវិធីបន្ដ៕
អត្ថបទ៖ cpcnews
