ប្រជាពលរដ្ឋរស់នៅតាមបណ្ដោយផ្លូវលេខ៣៦៧ ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅរាជធានីភ្នំពេញ បាននាំគ្នារអ៊ូរទាំថា ក្រុមហ៊ុនម៉ៅការជីកដាក់លូ ដែលកំពុងជីកកាយមុខលំនៅឋានពួកគាត់ គឺធ្វើប៉កល្វើយដូចឲ្យលុយមិនដល់។
ប្រជាពលរដ្ឋ បាននិយាយថា ពួកគាត់ធុញទ្រាន់នឹងសកម្មភាពរបស់ក្រុមហ៊ុនម៉ៅការនេះ គឺធ្វើការយឺតហួសនឹងថ្លែង ដែលបង្កឲ្យពួកគាត់ពិបាកធ្វើដំណើរចេញចូលក្នុងផ្ទះខ្លាំងណាស់។
ទាក់ទិនទៅនឹងការរអ៊ូរទាំរបស់ប្រជាពលរដ្ឋបែបនេះ លោកពៅ ហួត ចៅសង្កាត់ច្បារអំពៅទី១បានប្រាប់កម្ពុជាថ្មីនៅព្រឹកថ្ងៃទី២៦ ខែធ្នូនេះថា មូលហេតុចំនួន២ដែលក្រុមហ៊ុនធ្វើយឺតនោះ គឺទី១ដោយកាលពីថ្ងៃទី២៥ ខែធ្នូ គ្រឿងចក្រកាយដីបានខូចអស់មួយថ្ងៃពេញ។ ទី២គឺដោយសារតែប្រជាពលរដ្ឋតាមផ្ទះលោកនាំគ្នាសុំដាក់រ៉ឺហ្គែលូមុខផ្ទះរៀងៗខ្លួន ដោយពុំចង់ប្រើរ៉ឺហ្គែរួម ដែលតម្រូវឲ្យដាក់ចម្ងាយ២៤ម៉ែត្រចំនួន១។
លោកពៅ ហួត បន្តថា បើធ្វើតាមសំណូមពររបស់ប្រជាពលរដ្ឋគឺខុសទៅនឹងលក្ខណៈបច្ចេកទេសនៃការប្រើប្រាស់រ៉ឺហ្គែ។ ចំពោះការយឺតយ៉ាវនោះ គឺលោកទទួលស្គាល់ផងដែរ។ ប៉ុន្តែការជីកដាក់លូនៅតាមបណ្ដោយផ្លូវ ដែលស្ថាបនា បានស្អាតហើយនោះ គឺប៉ះពាល់ខ្លាំងដល់ក្រុមកម្មករគឺពេលជីកទៅប៉ះទុយោបណ្តាញទឹកស្អាត រួមទាំងបណ្ដាញខ្សែកាបផ្សេងៗទៀតផង។ បើសិនជាជីកដាក់លើផ្លូវថ្មីគឺអាចពន្លឿន បានព្រោះមិនប៉ះពាល់បណ្ដាញផ្សេងៗ ដែលបង្កប់ក្នុងដី។
លោកពៅ ហួត បានសំណូមពរដល់បងប្អូនប្រជាពលរដ្ឋ កុំមានការអាក់អន់ស្រពន់ចិត្តឲ្យសោះដើម្បីទុកពេលឲ្យលោកជំរុញដល់ក្រុមហ៊ុនឲ្យពន្លឿនកិច្ចការនេះ។ លោកបញ្ជាក់ទៀតថា ការជីកដាក់លូថ្មីក្នុងមូលនិធិសង្កាត់សម្រាប់ឆ្នាំ២០១៩នេះ គឺមានប្រវែង៨០០ម៉ែត្រ ដោយដាក់លូថ្មីមានមុខកាត់០,៦០ម៉ែត្រលើលូចាស់ ដែលត្រូវប្តូរចេញមានមុខកាត់ត្រឹម០,៣០ម៉ែត្រប៉ុណ្ណោះ៕
អត្ថបទ៖ កម្ពុជាថ្មី
