មិនរង់ចាំការបង្រួបបង្រួម មេដឹកនាំគណបក្សខ្មែររួបរួមជាតិ បានប្រកាសបន្តសកម្មភាព របស់ខ្លួនចុះទៅតាមបណ្តារាជធានី ខេត្ត ទាំង២៥ ជួបជាមួយសមាជិក សមាជិកា ដើម្បីពង្រឹងរចនា សម្ព័ន្ធ។ ការចុះមូលដ្ឋានរបស់មេដឹកនាំគណបក្សខ្មែររួបរួមជាតិ គឺនឹងចាប់ផ្តើមនៅដើមឆ្នាំ ២០២០ខាងមុខនេះ។
តាមគម្រោងគណបក្សខ្មែររួបរួមជាតិ របស់លោកញឹក ប៊ុនឆៃ និងគណបក្សហ្វ៊ុនស៊ិនប៉ិច របស់សម្តេចក្រុមព្រះ នរោត្តម រណឫទ្ធិ គ្រោងនឹងធ្វើសមាជច្របាច់បញ្ចូលគ្នានៅថ្ងៃទី២៣ ខែធ្នូ ឆ្នាំ២០១៩ ប៉ុន្តែត្រូវបានលុបចោលទៅវិញ ដោយសារតែគណបក្សហ្វ៊ុនស៊ិនប៉ិច ដោះស្រាយបញ្ហា ផ្ទៃក្នុងរបស់ខ្លួនមិនចប់។លោកញឹក ប៊ុនឆៃ បានថ្លែងទៅកាន់សមាជិក សមាជិការបស់ខ្លួននៅក្នុងកិច្ចប្រជុំបូកសរុបការងារប្រចាំខែធ្នូ កាលពីព្រឹកថ្ងៃទី២៨ ខែធ្នូ ថា គណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច គ្រោងធ្វើសមាជច្របាច់បញ្ចូលគ្នានៅថ្ងៃទី២៣ ខែធ្នូ កន្លងមកនេះ តែត្រូវបានលើកពេល រហូតមកដល់ពេលនេះមិនទាន់កំណត់ថ្ងៃច្បាស់លាស់។
លោកញឹក ប៊ុនឆៃ បានបញ្ជាក់យ៉ាងដូច្នេះថា “ខ្ញុំឯកភាពរួបរួម តែសុំឲ្យគណបក្សហ្វ៊ុនស៊ិនប៉ិច ដោះស្រាយបញ្ហាផ្ទៃក្នុងឲ្យចប់សព្វគ្រប់សិនទៅ ដោះស្រាយឲ្យជ្រះស្រឡះ ហើយខ្ញុំមិនអាចទៅលូកដៃលូកជើងបានទេ កុំឲ្យគេជេរខ្ញុំ។ មិនទាន់ដោះស្រាយបញ្ហាយកខ្ញុំទៅ គេខឹងខ្ញុំ។ ខ្ញុំប្រាប់ហ្វ៊ុនស៊ិនប៉ិចថា ឲ្យដោះស្រាយឲ្យជ្រះស្រឡះទៅ ចាំគិតពីការរួបរួមគ្នា។
ខ្ញុំសម្រេចចិត្តហើយ យើងដំណើរការងាររបស់យើងទៅមុខ ការរួបរួមមិនដឹងពេលណានោះទេ។ ខ្ញុំបានសម្រេចចិត្តរួចហើយថា អត់ចាំទេ (អត់ចាំការរួបរួម) មិនដឹងកោះត្រើយណាទេ មកដល់ពេលនេះ បើសិនជាយើងចេះតែចាំៗ វាយ៉ាប់ទាំងយើង យ៉ាប់ទាំងគេ។ យើងអត់ចាំទេ។ យើងដំណើរការរបស់យើងទៅ។ ចាំដល់ពេលណាដែលមានឱកាសដែលអាចនិយាយគ្នាបានរួមគ្នាបានចាំគិតទៀតទៅ ។ឥឡូវយើងគិតតែប្រឹងប្រែងក្នុងក្របខ័ណ្ឌគណបក្សខ្មែររួបរួមជាតិ”។
សូមជម្រាបថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រាប់ទៅសម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច ផ្អាកការធ្វើសមាជវិសាមញ្ញរបស់ខ្លួន និងដោះស្រាយបញ្ហាផ្ទៃក្នុងរបស់គណបក្សចប់សព្វគ្រប់ជាមុនសិន។ តាមគម្រោងគណបក្សហ្វ៊ុនស៊ិនប៉ិច គ្រោងរៀបចំធ្វើសមាជវិសាមញ្ញនៅថ្ងៃទី២៣ ខែធ្នូ ដើម្បីកែសម្រួលរចនាសម្ព័ន្ធផ្ទៃរបស់ខ្លួន។
ជម្លោះផ្ទៃគណបក្សហ្វ៊ុនស៊ិនប៉ិច បានផ្ទុះឡើងបន្ទាប់ពីព្រះអង្គម្ចាស់ នរោត្តម ចក្រាវុឌ្ឍ ប្រធានស្តីទីគណបក្សហ្វ៊ុនស៊ិនប៉ិច បានដកមន្ត្រីជាន់ខ្ពស់មួយចំនួនកាលពីពេលថ្មីៗនេះ ដោយមិនត្រឹមត្ររូវតាមលក្ខន្តិកៈរបស់គណបក្ស។ ការដកនេះ បានធ្វើឲ្យមន្ត្រីមួយចំនួនតវ៉ាប្តឹងផ្តល់ទៅក្រសួងមហាផ្ទៃ។
ព្រះអង្គម្ចាស់ នរោត្តម ចក្រាវុឌ្ឍ ប្រធានស្តីទីគណបក្សហ្វ៊ុនស៊ិនប៉ិច បានចេញសេចក្តីសម្រេចបញ្ចប់សមាជិកភាពមន្ត្រីចំនួនបួនរូប ពីគណបក្សហ្វ៊ុនស៊ិនប៉ិច ។ នេះបើតាមសេចក្តីសម្រេច ចុះថ្ងៃទី១៦ ខែវិច្ឆិកា ឆ្នាំ២០១៩។មន្ត្រីចំនួនបួនរូប ដែលត្រូវបញ្ចប់សមាជិកភាពពីគណបក្សហ្វ៊ុនស៊ិនប៉ិច មានដូចជា៖ ១. លោក ពេជ្រ សូជេថ្ថា អគ្គលេខាធិការ។ ២. លោក រស់ សាផន។ ៣. លោក ណុប សុធារិទ្ធិ អគ្គលេខាធិការរង។ ៤. លោកស្រី កង បូរាណ នាយកខុទ្ទកាល័យសម្តេចក្រុមព្រះ នរោត្តម រណឫទ្ធិ។បន្ទាប់ពីបញ្ចប់សមាជិកភាព មន្ត្រីទាំងបួនរូបនេះ រួមទាំងមន្ត្រីមួយចំនួនទៀត បានប្រមូលផ្តុំគ្នាតវ៉ានៅមុខស្នាក់ការគណបក្សហ្វ៊ុនស៊ិនប៉ិច កាលពីព្រឹកថ្ងៃទី១៧ ខែវិច្ឆិកា ឆ្នាំ២០១៩ ដោយបានសម្តែងការមិនពេញចិត្តចំពោះការបញ្ចប់សមាជិកភាព របស់ពួកគេពីគណបក្សហ្វ៊ុនស៊ិនប៉ិច។
ចំណែកការធ្វើសមាជបង្រួបបង្រួមរវាងគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ដែលគ្រោងនឹងធ្វើនៅថ្ងៃទី២៣ ខែធ្នូ ក៏ត្រូវបានលើកពេលផងដែរ៕
អត្ថបទ៖ រស្មីកម្ពុជា
